Azərbaycanda toy məclisi zamanı bir qrup şəxsin namaz qılması sosial şəbəkə istifadəçiləri tərəfindən xoş qarşılanmayıb. Belə ki, dini toyda iştirak edən xeyli inanclı şəxsin namaz qılması müzakirəyə səbəb olub. Toy sahibi bu haqda açıqlamasında vəziyyətdən narazı qaldığını deyib.
Sosial şəbəkə istifadəçiləri toyda namaz qılınmasını "şou" adlandıraraq tənqid ediblər.
Tural İrfan: "Evlərinin qibləsini öyrənmirlər, düşüb ortaya şeytana uyub ibadət edənlərə daş atırlar…"
İlahiyyatçı, Milli Cəbhə Partiyasının sədr müavini Tural İrfan "Bakı-Xəbər"ə açıqlamasında qeyd etdi ki, müsəlman olan hər kəs bilir ki, gündə beş vaxt namaz vacibdir: "Təxirə salmaq isə günahdır. Hətta bizim qəhrəman qazi və şəhidlərimiz düşmən gülləsi altında belə namazlarını, Allahla görüşlərini təxirə salmırdılar. Bizim camaat 70 il Sovet əsarətində dini, bir çox mental dəyərləri, tariximizi təəssüf ki, unutdu. Toyda namaz qılmaq nə vaxtdan qəbahət olub? Başqa müsəlman ölkələrə baxsınlar. Toy ancaq günah işlər etmək, çaxır içib şıllaq atmaq üçündür? Toyda savab iş görmək olmaz? Namaza 10-15 dəqiqə vaxt sərf olunur ki, bu da toyda çalınan bir mahnının apardığı vaxt qədərdir. Toy sahibi çağırdığı adamların müsəlman olduğunu, namaz qılan olduğunu bilmirdimi? Təbii ki, toya araq içəni çağırsan araq içəcək, namaz qılanı çağırsan namaz qılacaq. Toy sərbəstlik yeridir. İstəyən hətta örtülü salonda siqaret də çəkir, sərxoş olub özünü biabır edən də, yıxılan da, hətta dava salan da olur. Demək bunlar hamısı olar, ancaq təkcə namaz qılmaq olmaz? Görməmiş adamlar sosial şəbəkədə o qədər sıxma - boğma, şantaj etdilər ki, toy sahibi də yəqin bilməyib nə desin. Yoxsa adam da öz qonaqlarının ibadətinə narazılıq edərmi?
Namaz qılan qonaqlar toyun ortasında tutaq ki, axşam namazı vaxtı dəstə ilə məscidə gedib namazlarını qılıb təzədən toyamı dönməli idilər?
Buna irad tutanlar toyu ancaq qarın doldurmaq yeri hesab edənlərdir. Ancaq unutmaq lazım deyil ki, qəlbi, ruhu da təzələmək lazımdır. Daha da gözəl. Adamlar namaz qılıb, Allaha dua ediblər. Toy sahibinə, səbəbkarlara xoşbəxtlik arzu ediblər. Yox, gərək araq badələri əldə ermənilər kimi sağlıq deyərək Allaha üz tutaydılar? Çox adam Allahı yalnız içki içəndə yada salır. Əlində badə sanki dua edir. Bu, Sovet dövründən qalma, kommunist düşüncədən qalan çirkin işdir. Allahın qadağan etdiyi şeyi istifadə edərək hansı üzlə Allaha üz tutmaq olar? Heç ermənilər belə əlində araq Allaha dua etmir. Ömründə alnını səcdəyə qoymayan, kəlimeyi - şəhadətini, evinin qibləsini bilməyənlər indi namaza irad tutur.
Bu gün bizim mömin qardaş-bacılarımız hətta ən çətin anlarında belə namazı, Allahla ünsiyyəti təxirə salmırlar. Qarda, yağışda, işdə, döyüşdə, təyyarədə, avtomobildə belə ibadət edirlər. Başa düşsələr anlayarlar ki, içki içilib günah işlər görülən toy deyil, məhz ibadət və dua edilən toy xoşbəxtlər sırasına yazılır Allah dərgahında. Bu, göstəriş və reklam da deyil. Cəm halda namaz qılmaq haçandan göstəriş sayılır? Onda məscidlərdə minlərlə adam namaz qılanda bu göstərişdir? Yüzlərlə adam dininə, dədə-baba adətlərinə əməl edərək özünü müsəlman saydığı halda ermənilər kimi əlində badə günah edə bilir, ancaq bir dəstə adam namaz qılıb Allahdan toy sahibinə xeyir istəyə bilmir? Nə qədər gülünc, nə qədər cılız düşünən cahillər varmış. Niyə gedib kəlimeyi-şəhadət öyrənmirlər? Evlərinin qibləsini öyrənmirlər, düşüb ortaya şeytana uyub ibadət edənlərə daş atırlar, başa düşmək olmur".
Ceyhun Məmmədov: "Toyda iştirak edən qonaqlar namaz qılmaq istəyirlərsə, şadlıq evinin başqa otaqlarında da ibadət edə bilərlər"
Millət vəkili Ceyhun Məmmədov isə hesab edir ki, toyda iştirak edən qonaqlar namaz qılmaq istəyirlərsə, şadlıq evinin başqa otaqlarında da ibadət edə bilərlər: "Namazı təbliğ etmək üçün şadlıq evlərində bu formada nümayişkaranə şəkildə namaz qılmağı doğru saymıram. Hər bir müsəlman namaz qılmalıdır. Amma toyun ortasında bu formada addımın atılması insanlar tərəfindən birmənalı qarşılanmır. Həmçinin geniş müzakirəyə səbəb olur. Dindar, ibadət əhli olan qardaşlarımız bu reallığı nəzərə almalıdırlar. Əvvəlcədən danışıb, şadlıq evinin başqa boş ərazisində namaz qıla bilərlər. Bu formada nümayişkaranə şəkildə namaz qılmağa ehtiyac yoxdur".
Cəmşid Əliyev: "Namaz təmiz yerdə qılınmalıdır, ancaq şadlıq evi namaz üçün münasib yer deyil"
Ilahiyyatçı Cəmişid Əliyev "Bakı-Xəbər"ə şərhində bildirdi ki, hər bir müsəlman namaz qılmalıdır. Ancaq namaz təmiz, səliqəli yerdə qılınmalıdır: "Danılmaz faktdır ki, şadlıq evlərinin salonu namaz üçün münasib deyil. Namaz qılan şəxslər restoranın səlahiyyətli nümayəndəsindən ibadət üçün otaq rica edə bilərdilər. Əminəm ki, heç kim onlara 5-10 dəqiqəlik namaz üçün yox deməyəcəkdi. Namaz göstəriş sevmir. Ümid edirəm ki, toyda namaz qılanlar bunu göstəriş xətrinə etməyiblər".
Günel CƏLİLOVA
