Müəllimlərin sayı növbəti dəfə azaldılacaq - kimlər işini itirə bilər?..
Rizvan Fikrətoğlu: “Sertifikasiya imtahanından kəsilən müəllimlərin gələcəkdə yenidən pedaqoq olmaq şansı azdır”
"Hazırda biz təhsil sistemində mühüm dəyişikliklər etmək yolundayıq". Bu barədə Elm və təhsil naziri Emin Əmrullayev Dünya Bankının illik qlobal hesabatının təqdimat tədbirində deyib.
Nazirin sözlərinə görə, əgər bu islahatlar həyata keçirilməsə, bəzi müəllimlər sözün əsl və ya məcazi mənasında daha 20-30 il sistemdə qalacaq və bu, təhsil üçün müsbət nəticələr verməyəcək: “Əgər 2026-cı ilə qədər uğur qazansaq, müəllimlərin sayı azalacaq, lakin hər bir müəllimin dərs saatı artacaq, bu da onların maaşlarının yüksəlməsinə səbəb olacaq. Eyni zamanda, sistemdə çalışan gənclərin sayı 20 faizə qədər artacaq".
Nazirin dediyindən belə aydın olur ki, qarşıdakı illərdə müəllimlərin sayı azalacaq. Maraqlıdır, hansı müəllimlərin sayı azalacaq?
“Müəllimlərin azalması rasionallaşdırılma nəticəsində ləğv edilən, tipi dəyişdirilən, birləşdirilən məktəblərin müəllimlərinin bir qisminin işsiz qalması ilə də baş verəcək”
Təhsil eksperti Rizvan Fikrətoğlu “Bakı-Xəbər”ə şərhində bunları bildirdi: “Tədris etdiyi fənn üzrə sertifikasiya imtahanından keçə bilməyən müəllimə ikinci dəfə şans yaradılır və belə müəllimlər növbəti illərdə yenidən sertifikasiya imtahanında iştirak edir. Bu müddət ərzində onun dərs saatları azaldıla bilər. Hər iki imtahandan uğur qazanmayanlar müəllimlikdən azad edilir. Nəzərə almaq lazımdır ki, müəllimlərin işə qəbul imtahanı ilə müqayisədə sertifikasiya imtahanı asandır. Bunu nəzərə alsaq, sertifikasiya imtahanından kəsilən müəllimlərin gələcəkdə yenidən pedaqoq olmaq şansı azdır. İşdən çıxarılan müəllimlərin dərs yükünün necə bölünəcəyinə gəlincə, deyim ki, bir qismi vakansiyaya çıxarılır, bir hissəsi isə dərs saatı az olan müəllimlərə verilir. Maaş artımı sertifikasiyadan kəsilən müəllimin bu prosesdə uğur qazanan müəllimin dərs saatlarına yiyələnməsi sayəsində baş verir. O da məlumdur ki, hardasa 5000-ə yaxın müəllim sertifikasiyadan keçə bilmədiyi üçün işdən çıxarılıb. Sertifikasiyadan uğur qazananların təkrar sertifikasiya imtahanları birincidən daha çətin olmaqla, bu mərhələdə də bəzi müəllimlər işindən olacaq. Onu da deyim ki, sertifikasiyada uğur qazananların əmək haqqında artım olur. Belə ki, 30 baldan artıq bal toplayanların əmək haqqısı 10 faiz, 51 balı keçənlərin maaşı isə 35 faiz artır. Bu da artım deməkdir. Müəllimlərin azalması rasionallaşdırılma nəticəsində ləğv edilən, tipi dəyişdirilən, birləşdirilən məktəblərin müəllimlərinin bir qisminin işsiz qalması ilə də baş verəcək”.
Həmsöhbətimiz onu da əlavə etdi ki, sertifikasiya və MİQ-dən uğur qazananlar əsasən gənc nəslin nümayəndələridir. Pedaqoqlar arasında gəncləşmə daha da artacaq.
Günel CƏLİLOVA
