44 günlük İkinci Qarabağ müharibəsində Vətən və millət yolunda canından keçən minlərlə qeyrətli oğullardan biri də şəhid kiçik gizir Elnur Əsədullayevdir. Lerikdə dünyaya göz açan bu Vətən sevdalısı ilə indi bütün Azərbaycan xalqı fəxr edir. Qəhrəman Elnur qəlblərdə yaşamaqla, hər an, hər yerdə ehtiramla xatırlanır, layiqli vətəndaş kimi keçdiyi şərəfli ömür yolu örnək göstərilir.
Elnur Əsədullayev 22 yaşında Vətən torpaqlarının azadlığı və bütövlüyü uğrunda dünyasını dəyişdi. Bu şərəfli ölüm ona günəş ömrünü qazandırdı. Cismən aramızdan gedən dağlar diyarının qartal balası ömrünün 25-ci ilinə keçdi. Bu münasibətlə bütün leriklilər onun doğum gününə toplaşdı. Belə ki, əhali ilə bərabər Lerik Rayon İcra Hakimiyyətinin müavini Arzu Vəlimmədova, Yeni Azərbaycan Partiyasının Lerik rayon Təşkilatının sədr müavini Elnur Məmmədov, Lerik Rayon İcra Hakimiyyəti Vətən müharibəsi iştirakçıları və şəhid ailələri ilə işin təşkili şöbəsinin nümayəndələri, Qarabağ Müharibəsi Əlilləri, Veteranları və Şəhid Ailələri İctimai Birliyinin Lerik rayon filialının sədri Veysəl Məlikov, Səfərbərlik və Hərbi Xidmətə Çağırış üzrə Dövlət Xidmətinin Lerik rayon şöbəsinin nümayəndəsi Kamran Əliyev, Lerik Rayon Ağsaqqallar Şurasının sədri Elxan Qənbərov, eləcə şəhidin ailə üzvləri igid Vətən oğlunun yatdığı müqəddəs torpağı ziyarət edib, məzarı önünə gül-çiçək dəstələri düzərək, əziz xatirəsinə ehtiramını bildirdilər. Eyni zamanda ziyarətçilər şəhidin xatirəsinə ucalmış bulaq kompleksində və ev muzeyində oldular.
...Elnur İmran oğlu Əsədullayev 18 yanvar 2018-ci ildə həqiqi hərbi xidmətini başa vurub evinə qayıdır. Qaldı ki, erməni dığaların Qarabağa təcavüzü onu rahat buraxmır. Könüllü olaraq Vətənə xidmət etməyə gedir, Beyləqan rayonunun "N" saylı hərbi hissəsində manqa komandiri vəzifəsində çalışır. Kiçik gizir Elnur nümunəvi xidmətə görə manqa komandiri vəzifəsindən tank komandiri vəzifəsinə yüksəlir.
27 sentyabr 2020-ci il başlayan İkinci Qarabağ müharibəsinin ilk günündə düşmənin kabusuna dönür. Vətənini canından əziz bilən qəhrəman döyüşçü ağır müharibə meydanlarında dığalara sarsıdıcı zərbələr vurmaqla xeyli sayda canlı qüvvəsini, neçə-neçə hərbi texnikasını məhv edir. Elnur oktyabr 30-da Füzuli istiqamətində gedən şiddətli döyüşlərdə qəhrəmancasına şəhidlik məqamına yüksəlir.
Şəhid kiçik gizir Elnur İmran oğlu Əsədullayev ölümündən sonra Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən 3-cü dərəcəli "Vətənə xidmətə görə", "Vətən uğrunda", "İgidliyə görə" və digər medallarla təltif edilib.
Zəfər ORUCOĞLU Azərbaycan Jurnalistlər Birliyinin üzvü
