İyunun 13-də Prezident İlham Əliyevlə Türkiyə Prezidenti Rəcəb Tayyib Ərdoğan mətbuata bəyanatlarında Türkiyə-Azərbaycan birgə universitetinin yaradılacağını bildiriblər. Prezident İlham Əliyev
“...Müzakirə olunan məsələlərdən biri də təhsil sahəsi ilə bağlıdır. Türkiyə-Azərbaycan birgə universitetinin yaradılması istiqamətində danışıqlar indi son mərhələdədir. Biz çox ümid edirik ki, yaxın aylarda bu məsələ də öz həllini tapacaq və bizim qardaşlıq münasibətlərimizə daha bir töhfə veriləcəkdir”- deyə bəyan edib.
“Əziz qardaşım İlham Əliyevə və azərbaycanlı qardaşlarımıza göstərdikləri bu qonaqpərvərliyə görə də şəxsən öz adımdan və heyətim adından çox təşəkkür edirəm. Hazırda atdığımız və atacağımız addımlardan biri də Türkiyə-Azərbaycan Universiteti məsələsidir. Bu məsələ ilə əlaqədar Ali Təhsil İdarəsinin sədri öz həmkarı ilə bu məsələni bu gün nəzərdən keçiriblər. Qanuni prosedurun vacibliyini isə İlham qardaşım ifadə etdi. Bu məsələni də tez bir zamanda həyata keçirərək, inşallah, Türkiyə ilə Azərbaycan arasında belə bir universitetin qurulmasına nail olacağıq. Beləliklə, azərbaycanlı gənclərimiz Türkiyəyə rahatlıqla gələ biləcəkləri kimi, türk gəncləri də eyni qaydada Azərbaycandakı universitetdə oxumaq şansı əldə edəcəklər”. Bu fikirləri isə qardaş ölkənin prezidenti Rəcəb Tayyib Ərdoğan bildirib.
Bu universitetin perspektivi necə görsənir? Orada başqa türk xalqlarının nümayəndələri də təhsil almaq imkanı əldə edə bilərmi?
“İndidən demək mümkündür ki, bu, türk xalqları universiteti rolunu oynayacaq”
AVCİYA-nın vitse-prezidenti, professor Məhərrəm Zülfüqarlı “Bakı-Xəbər”ə şərhində bildirdi ki, Türkiyə-Azərbaycan Universitetinin yaradılması təkcə Türkiyə və Azərbaycan üçün deyil, həm də bütövlükdə türk dünyası üçün əhəmiyyətlidir. “Hesab edirəm ki, Türkiyə-Azərbaycan universitetinin yaradılması çox önəmli bir məsələdir. Bu universitet çoxdan açılmalı idi. Çünki Azərbaycanda artıq Rusiya universitetlərinin filialları, Fransız universiteti, universitetlərdə ingilis dilli fakültələr və qruplar var. “Bir millət, iki dövlət” prizmasından yanşsaq əlbəttə, burada birinci Türkiyənin universitetləri açılmalı idi. Bu ali məktəbin yaradılmasının Azərbaycan təhsili üçün faydaları nə olacaq? Türkiyə təhsil sistemində olan müsbət cəhətləri biz Azərbaycan təhsil sisteminə inteqrasiya edəcəyik. Daha doğrusu, Azərbaycan Türkiyə təhsil sisteminə inteqrasiya edəcək. Demək olar ki, burada Azərbaycan təhsil sistemində olan bir sıra problemlərin həllinə nail olunacaq”.
M.Zülfüqarlının fikrincə, qardaş Türkiyə ilə birgə yaradılacaq universitet bütün türk dünyasına bir töhfə olacaq. “Türkiyə-Azərbaycan universitetinin yaradılmasının bütün türk dünyası üçün böyük əhəmiyyəti olacaq. Bu, türk ölkələri arasında təhsil sahəsində əlaqələrin genişlənməsinə səbəb olacaq. Digər türkdilli xalqların nümayəndələri də gəlib orada təhsil alacaqlar. Bu da türk birliyinin möhkəmlənməsinə, türk xalqları ilə əməkdaşlığın, dostluğun inkişafına böyük kömək göstərəcək. Azərbaycanda bu təcrübə var. Dövlət müstəqiliyimizi bərpa etdikdən sonra Moldovada yaşayan qaqauzlar gəlib ölkəmizdə təhsil alırdılar. Eyni zamanda Özbəkistandan, Türkmənistandan gəlirdilər. Amma bu universitet yaranandan sonra bura digər türkdilli xalqların marağı da kütləviləşər. Bu universitet gələcəkdə Azərbaycanla, Türkiyə ilə digər qardaş xalqlar arasında bir körpü rolunu oynayacaq. Bu universitetin yaradılması barədə Azərbaycan və Türkiyə Prezidentlərinin təşəbbüsləri alqışlanmalıdır. İndidən demək mümkündür ki, bu, türk xalqları universiteti rolunu oynayacaq. Gecikmədn bu proses həyata keçirilməlidir”-deyə M.Zülfüqarlı əlavə etdi.
M.Zülfüqarlı hesab edir ki, belə bir ali məktəbin yaradılması bütün hallarda xalqımızın, dövlətimizin, bütövlükdə türk dünyasının xeyrinədir və bu bir türk ocağı kimi başına dünya türklərini toplayacaq bir təhsil məkanı olacaq.
İradə SARIYEVA
