Azərbaycana İrandan idxal olunan bir sıra məhsullara fitosanitar baxış keçirilib. Qida Təhlükəsizliyi Agentliyi tərəfindən aparılan laborator analizlər nəticəsində sözügedən məhsullarda təhlükəli viruslar aşkarlanıb. Buna görə də, agentlik tərəfindən İran ixracatçılarının Azərbaycana bəzi məhsul idxalına 2023-cü il 5 aprel tarixindən müvəqqəti qadağa qoyulub.
Ehtimal edilir ki, qeyd edilən ölkə ilə yaşanan gərgin münasibət səbəbindən idxal olunan qida məhsullarına məhdudiyyət qoyulacaq. Buna səbəb isə həmin ölkədən idxal olunan məhsullara xüsusi maddələrin vurulmasıdır. Bu səbəbdən də həmin ölkədən məhsul idxalının qadağan olunması gözlənilir.
Eyyub Hüseynov: “İranda geni modifikasiya olunmuş qidalar istehsal edilir – kartof, bibər və s.”
Azad İstehlakçılar Birliyinin (AİB) sədri Eyyub Hüseynov bildirdi ki, “İstehlakçıların hüquqlarının müdafiəsi haqqında” Qanuna, Nazirlər Kabinetinin 94 saylı Qərarı və “Azərbaycan Respublikasında dövlət dili haqqında” Qanuna görə Azərbaycan əmtəə bazarında olan bütün mallar xarici dillə yanaşı Azərbaycan dilində də markanalanmalıdır: “Bu məsələdə uzun illər böyük istehlakçı narazılığı ilə qarşılaşmışıq. 2023-cü ilin yanvarından AQTA markalanma işini nəzarətə götürüb. Bildiyim qədərilə müəyyən işlər gedir. Onu da qeyd edim ki, İranda geni modifikasiya olunmuş qidalar istehsal edilir – kartof, bibər və s. Bu barədə biz illər öncə məlumatlı idik. Bunlar ölkəyə hibrid adı ilə gətirilir. AQTA çox təəssüf ki, həmin GMO-ları tədqiq etmir. Düşünürəm ki, İrandan idxal olunan məhsullarda GMO-lar tədqiq olunmalıdır. Digər hibrid və pestisidlərə isə Agentlik nəzarət edir. Dəfələrlə İrandan gələn mallara qadağa qoyulub”.
Pərvanə Mustafayava: “İrandan gətirilən kənd təsərrüfatı məhsullarının yetişdirilməsi üçün kimyəvi gübrələrdən həddindən artıq istifadə edilir”
Həkim ekspert Pərvanə Mustafayeva “Bakı-Xəbər”ə açıqlamasında qeyd etdi ki, İrandan gətirilən kənd təsərrüfatı məhsulları əsasən genetik modifikasiya olunmuş (GMO) mallardır. Çünki İranda GMO malları daha çox hazırlanır. Həddindən artıq insan orqanizminə təhlükəli olan bu məhsulların hazırlanması ilə İran fəxr edir: “İnsanlar bunun zərərini dərk edib belə mallardan imtina etməlidirlər. Bu cür mallar ya GMO məhsullarıdır, ya da həddindən artıq təhlükəli gübrələrlə yetişdirilir ki, məhsuldarlıq cox olsun. İrandan gətirilən kənd təsərrüfatı məhsullarında problemlər var. Bunun səbəbi isə həmin malların GMO məhsulu olması və yetişdirilməsi üçün kimyəvi gübrələrdən həddindən artıq istifadə edilməsidir. Bu məhsulların tərkibi ciddi yoxlanılmır və sonda həmin məhsullar Azərbaycan bazarlarına yol açır”.
Günel CƏLİLOVA
