“Bundan sonra sülh sazişinin tezliklə imzalanması daha asan olacaqdır”. Bu barədə Prezident İlham Əliyev Zəngilanda keçirilən “Davamlı şəhərlər iqtisadi inkişafın hərəkətverici və bərabərsizliklərlə mübarizə aparan qüvvəsi kimi” mövzusunda 2-ci Milli Şəhərsalma Forumunun açılış mərasimində çıxışı zamanı bildirib.
Ölkə başçısının sözlərinə görə, sülhün əldə olunması ilə bağlı artıq zaman yetişib: “Sentyabrın 20-dən sonra artıq zaman yetişib ki, bizim nümayəndələr əyləşsin və sülh sazişinin layihəsi üzərində işləsin. 20 sentyabrda biz suverenliyimizi artıq bərpa etmişik. Bundan sonra da sülh sazişinin tezliklə imzalanması daha asan olacaqdır. Bununla yanaşı, təbii ki, gərək sərhədlərin delimitasiyası üzərində fəal surətdə çalışaq və uzun müddət sürən bu qarşıdurmaya son qoyaq. Azərbaycanda biz sülh istəyirik. Zəngilanda bu gün gördükləriniz onu sübut edir ki, biz sülh istəyirik, biz bu əraziləri bərpa etmək istəyirik, soydaşlarımızı vətəninə qaytarmaq istəyirik. Biz Qafqazda sülh və sabitlik istəyirik. Bu, mümkündür və seçim Ermənistanındır”.
Sözügedən məsələni baki-xeber.com-a şərh edən siyasi şərhçi Azər Həsrətin fikrincə, Ermənistanın sülhdən başqa alternativi yoxdur: “Azərbaycan dövləti 44 günlük müharibədən dərhal sonra ermənilərə və onların havadarlarına silahlı qarşıdurmanı istəmədiyini açıq şəkildə deyirdi. Ümumiyyətlə, iki xalq arasında düşmən münasibətlərin davam etməsində maraqlı deyilik. Nə qədər mümkünsə, bir o qədər tez sülh sazişi imzalayaq. Xalqlar arasında qarşılıqlı etimadın yaradılmasına nail olaq. Bunun üçün də Azərbaycan müharibəni tam başa çatdırmamış, torpaqlarımız üzərində suverenliyimizi tam bərpa etməmiş ciddi işlərə start verə bilməzdi. Azərbaycan ümid edirdi ki, 10 noyabr razılaşmasına əsasən əraziləri üzərində suverenliyini tam bərpa edəcək. Ancaq təəssüflər olsun ki, Ermənistan götürdüyü öhdəliklərə əməl etmədi. Ermənistan Ağdam, Kəlbəcər və Laçından könüllü çıxsa da, Xankəndi daxil olmaqla Qarabağın bəzi ərazilərindən çıxmadı. Nəinki çıxmaq istəmədi, əksinə ora əlavə ordu qüvvələri yeritdi, silah-sursat daşıdı. Bununla da Ermənistan qarşıdurmada maraqlı olduğunu göstərdi. Azərbaycan dəfələrlə Ermənistana bunun dinc yolla həllini təklif etdi, amma müsbət qarşılıq görmədi. Xəbərdarlıq etdi ki, gərginlik yaradarsızsa, biz sizi sülhə məcbur etməyə qərar verəcəyik. 19-20 sentyabrda həyata keçirilən lokal xarakterli antiterror tədbirləri də bunun nəticəsidir. Bu, erməni tərəfini sülhə məcbur etdi. Əlbəttə, şəhidlər verdik, ermənilərdən çoxsaylı itkilər oldu. Halbuki, ermənilər öz öhdəliklərinə əməl etsəydilər, bunlarsız keçinə bilərdik. Ona görə də Cənab Prezident növbəti dəfə onlara xoşməramlı çağırış edir. Yəni, artıq bu cür qarşıdurmalardan qaçmaq və məsələni birdəfəlik həll etmək üçün sülh sazişi imzalayaq. Mübahisəli məsələlər varsa, onların həlli üçün masa arxasında oturub danışıqlar aparaq. Belə məsələləri danışıqlar yolu ilə həll etmək mümkündür. Axı niyə hər iki tərəfdən insanlar ölməlidir? Əgər bir şeyi sülh yolu həll etmək mümkündürsə, o zaman qan tökülməsinə nə gərək var? Ona görə də Prezident İlham Əliyev bu çağırışı növbəti dəfə edir. O üzdən, Ermənistan rəhbərliyi ağıllı davranmalıdır və bu şansı düzgün dəyərləndirməlidir. Bir sözlə, iki ölkə sülh sazişini imzalamalıdır. Delimitasiya, təzminat kimi məsələlər, qarşılıqlı güzəştlərə getmək masa arxasında öz həllini tapa bilər. Əsas odur ki, Ermənistan ortaya ciddi siyasi iradə qoysun”.
Vidadi ORDAHALLI
