Şuşada keçirilən “4-cü Sənaye İnqilabı dövründə Yeni Media” mövzusunda Qlobal Media Forumu və Prezident İlham Əliyevin Forumun açılış mərasimində çıxışı zamanı səsləndirdiyi fikirlər dünya mediasının diqqət mərkəzində qalmaqda davam edir.
Təbii ki, beynəlxalq mətbuatı təmsil edən jurnalistlərin, ekspert və politoloqların dövlət başçımıza verdiyi sualların cavablandırılması təkcə Azərbaycan reallıqlarını əks etdirmirdi, həm də regionda və beynəlxalq aləmdə gedən proseslərə rəsmi Bakının münasibətinin öyrənilməsi baxımından əhəmiyyətli idi. Diqqətlə izlədiyimiz məqamlardan biri də o idi ki, tədbir iştirakçılarının əksəriyyəti dövlət başçımızdan eşitdiyi fikirləri dərhal öz redaksiyalarına və lazımi ünvanlara ötürürdülər. Müasir informasiya texnologiyaları hər şeyi asanlaşdırıb.
Prezidentin tapşırığına əsasən, “Heydər Əliyev İli” çərçivəsində və Azərbaycan Milli Mətbuatının 148-ci ildönümü ilə bağlı keçirilən bu forumda 49 ölkədən 150 xarici qonaq, o cümlədən dünyanın 34 ölkəsinin dövlət informasiya agentliyi, 12 beynəlxalq təşkilat və media qurumu təmsil olunurdu. Bundan başqa, tədbirdə 60 yerli media rəhbəri və nümayəndəsi də iştirak edirdi.
Şuşada keçirilən forumda yaddaqalan və maraqlı məqamlar çox idi. Cənab Prezident dedi ki, biz işğalçı dövlət üzərində qələbə çalsaq da, ərazilərimizi düşmən tapdağından azad etsək də, arxayınlaşıb oturmur, ordu quruculuğunu daha prinsipial şəkildə davam etdiririk. Bu isə yeni çağırışlara lazımi cavab verdiyimizin göstəricisidir. Bu gün Azərbaycanın daxili işlərinə qarışmaq istəyənlər də var, erməniləri revanşa ruhlandıranlar da, yeni qarşıdurmalar yaradaraq “bulanıq suda balıq tutmaq istəyənlər” də. Ona görə də Azərbaycan Ordusu indi daha güclü olmalıdır. Təbii ki, beynəlxalq mətbuatı təmsil edən jurnalistlərin, ekspert və politoloqların dövlət başçımıza verdiyi sualların cavablandırılması təkcə Azərbaycan reallıqlarını əks etdirmirdi, həm də regionda və beynəlxalq aləmdə baş verənləri əhatə edirdi.
Prezident: “Həm sosial media, həm ənənəvi KİV mənə kömək edir ki, məsələlərdən xəbərdar olum və dərhal ona reaksiya verim”
Dövlət başçısı Forumdakı çıxışında sosial medianın və KİV-in əhəmiyyətindən danışıb:
“Media ilə təməslarımda həmişə deyirdim ki, siz mənim gündəlik işlərimdə yardımçı olursunuz.
Çünki hər bir Prezidentin bir-birinə bənzər fəaliyyəti var. Xüsusilə Azərbaycan kimi ölkədə insan 24 saat işləməlidir. Bölgələrə səfər edirəm, insanlarla görüşürəm. Təbii ki, sosial mediadan istifadə edirəm. Azərbaycanda baş verən bir çox hadisələri, mənə məruzə edilməmiş bəzi hadisələri, istər bürokratik manelər və ya bilərəkdən mənə məruz edilməyən məsələlər olur.
Nəvələrim hətta mənə müəyyən məlumatları verirlər. Övladlarım sosial mediada gördüklərini mənə deyirlər. Mən özüm də sosial medianı izləyirəm. O mənə çox yardımçı olur. Müəyyən şeylər var ki, məni də qıcıqlandırır. Digər bizim həmvətənlərimiz kimi, ədalətsizlik, bürokratiya və pis idarəçilik və digər mənfi hallar əlbəttə məni də qıcıqlandırır. Mənim diqqətimdən müəyyən məsələlər yayına bilər. Həm sosial media, həm ənənəvi KİV mənə kömək edir ki, məsələlərdən xəbərdar olum və dərhal ona reaksiya verim. Bir çox hallarda sizə deyə bilərəm ki, müəyyən dövlət məmurlarına reaksiya verilib. Hətta bir ağacın kəsilməsini mediadan bilmişəm və bu, məmurlarda da intizam yaradır”.
Göründüyü kimi, Prezident ənənəvi və sosial mediada yayılan məlumatlara ciddi önəm verdiyini deyir. Təbiidir ki, Prezidentin verdiyi bu mesajlar dövlət - media arasında sağlam əməkdaşlığı da özündə əhatə edir. Bu, eyni zamanda ictimai və dövlət maraqlarının birliyinə dəlalət edən daha bir göstəricidir.
İctimai və dövlət maraqlarının qorunması məzmununda ənənəvi və sosial medianın da roluna böyük önəm verilir
Milli maraq Azərbaycan xalqının fundamental dəyər və məqsədlərini, həmçinin insan, cəmiyyət və dövlətin tərəqqisini təmin edən siyasi, iqtisadi, sosial və digər tələbatların məcmusudur. Nəzərə alsaq ki, müasir Azərbaycan cəmiyyəti intellektual əsaslarda formalaşmış modern bir cəmiyyətdir, o zaman əminliklə söyləyə bilərik ki, Azərbaycan cəmiyyəti ictimai maraq və dövlət marağı məfhumlarının mahiyyətini dərk edir. Son illər prezident İlham Əliyevin rəhbərliyi ilə dövlət maraqlarının qorunması istiqamətində mühüm və vacib addımlar atılıb. Sirr deyil ki, beynəlxalq müstəvidə Azərbaycanın dövlət və milli maraqlarının qorunması istiqamətində sistemli siyasət yürüdülür. Xüsusilə mövcud Ermənistan-Azərbaycan gərginliyinin sonlanması, yekun sülh müqaviləsinin imzalanması və Zəngəzur dəhlizinin açılması məsələlərində görülən işlər, aparılan uğurlu xarici siyasət təqdirəlayiqdir. Ölkə başçısının çıxışlarından görünür ki, ictimai və dövlət maraqlarının qoruması məzmununda ənənəvi və sosial medianın da roluna böyük önəm verilir. Biz media təmsilçiləri də bu böyük etmadı doğrultmalı, öz fəaliyyətimizlə ictimai və dövlət maraqlarının mühafizəsində yaxından iştirak etməlidir.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
