Azərbaycan Prezidenti İlham Əliyev “4-cü Sənaye İnqilabı dövründə Yeni Media” mövzusunda Şuşa Qlobal Media Forumunda çıxışında deyib ki, sosial mediadan ölkəmizin həyatı ilə bağlı bir çox mühüm məsələləri öyrənir.
Dövlət başçısı çıxışında sosial medianın və KİV-in əhəmiyyətindən danışıb:
“Media ilə təməslarımda həmişə deyirdim ki, siz mənim gündəlik işlərimdə yardımçı olursunuz.
Çünki hər bir Prezidentin bir-birinə bənzər fəaliyyəti var. Xüsusilə Azərbaycan kimi ölkədə insan 24 saat işləməlidir. Bölgələrə səfər edirəm, insanlarla görüşürəm. Təbii ki, sosial mediadan istifadə edirəm. Azərbaycanda baş verən bir çox hadisələri, mənə məruzə edilməmiş bəzi hadisələri, istər bürokratik maneələr və ya bilərəkdən mənə məruz edilməyən məsələlər olur.
Nəvələrim hətta mənə müəyyən məlumatları verirlər. Övladlarım sosial mediada gördüklərini mənə deyirlər. Mən özüm də sosial medianı izləyirəm. O mənə çox yardımçı olur. Müəyyən şeylər var ki, məni də qıcıqlandırır. Digər bizim həmvətənlərimiz kimi, ədalətsizlik, bürokratiya və pis idarəçilik və digər mənfi hallar, əlbəttə, məni də qıcıqlandırır. Mənim diqqətimdən müəyyən məsələlər yayına bilər. Həm sosial media, həm ənənəvi KİV mənə kömək edir ki, məsələlərdən xəbərdar olum və dərhal ona reaksiya verim. Bir çox hallarda sizə deyə bilərəm ki, müəyyən dövlət məmurlarına reaksiya verilib. Hətta bir ağacın kəsilməsini mediadan bilmişəm və bu, məmurlarda da intizam yaradır”.
Göründüyü kimi, Prezident ənənəvi və sosial mediada yayılan məlumatlara ciddi önəm verdiyini deyir. Təəssüflər olsun ki, bəzi məmurlar ənənəvi və sosial mediada gedən tənqidlərə olduqca dözümsüs yanaşır, hətta belə tənqidləri susdurmaq üçün müxtəlif qanunsuz üsullara da əl atırlar. Maraqlıdır, ənənəvi və sosial media ilə işləməyə Prezidentin yanaşması ilə məmurların münasibətində bir sinxronluq varmı?
“Cümhuriyət” qəzeti və “cebhe.info” saytının rəhbəri Rəfail Becanov “Bakı-Xəbər”ə açıqlamasında bildirdi ki, Prezidentin bu mövqeyi istər ənənəvi, istər sosial mediaya nə qədər dəyər və önəm verdiyinin göstəricisidir: “Dövlət başçısı zaman-zaman mediaya və jurnalistlərə olan etimadı, onlara verdiyi dəyərlə bağlı mövqeyini açıqlayıb. Bu gün jurnalsitlərin Prezidentə bəslədikləri ehtiramın, inamın, hörmətin, xoş duyğuların mənbəyi elə Prezident özüdür. Çünki jurnalistlər bilir ki, Prezident onlara nə qədər böyük dəyər verir. Hətta 2017-ci ildə Prezident bir çıxışında bildirdi ki, jurnalistlər mənim köməkçilərimdir. Bu münasibətlər Prezidentin mediaya münasibətinin sübutudur. Dövlət başçısı jurnalistlərin əməyini dəyərləndirir, medianın bir institut olaraq əhəmiyyətinin böyüklüyünü qiymətləndirir. Media böyük təsir dairəsi olan subyektdir. Onun təsir gücü, əhatə dairəsi böyükdür. Bu münasibət eyni zamanda söz və media azadlığının təminat altında olduğunu göstərir. Məmurlar Prezidentin bu mövqeyindən nümunə götürməlidirlər. Təəssüf ki, hələ də məmur qrupu var ki, onlar Prezidentin mediaya münasibətinə uyğun davranış sərgiləyə bilmirlər. Təbii ki, bunu hər kəsə aid etmək olmaz. Bəziləri bu münasibətlə ayaqlaşmağa çalışır, bəziləri isə prosesi ya aydın dərk etmir, ya da uyğunlaşa bilmirlər. Bunun da bir çox səbəbi var. Təcrübəsizlik, medianın gücünü düzgün qiymətləndirməmək, ona yuxarıdan aşağı baxmaq, yaxud “mən vəzifə sahibiyəm, mediaya hesabat vermirəm” kimi yanaşmalardır. Kimsə hansısa məmurdan hesabat tələb etmir, yaxud hər hansı bir məmur mediaya hesabat vermir, sadəcə onun vasitəsilə ictimaiyyəti məlumatlandırır. Bu belə bilinməlidir. Məmurun hesabat verdiyi dairələr var, subordinasiyaya uyğun hesabatlılıq var. O sırada media yoxdur. Amma media xalqla, ictimaiyyətlə məmurlar arasında informasiya körpüsüdür. Ona görə də hesab edirəm ki, Prezidentin mövqeyinə uyğun davranış hər bir məmurun borcudur. Prezident aydın nümunə göstərir ki, media ilə münasibətlər hansı səviyyədə qurulmalıdır. Məmurlar da buna uyğun davranış sərgiləməyə borcludur və Prezidentdən nümunə götürməlidirlər”.
Baş redaktor hesab edir ki, istər ənənəvi mediada, istərsə də sosial mediada jurnalistin fəaliyyətinin məhdudlaşdırlması yolverilməzdir: “Bu, ilk növbədə söz azadlığına basqıdır. Jurnalist və yaxud bir kimsə özünün sosial media hesabında fikrini bölüşməkdə, hansısa məsələyə münasibətdə qanunlar çərçivəsində sərbəstdir, azaddır. Kiməsə təzyiq etmək, demək, xahiş etmək ki, yazdığını sil və s. kimi metodlar yolverilməzdir və imkandan, vəzifədən sui-istifadədir. Jurnalist və yaxud hər hansı sadə vətəndaş qanunları pozmayıb, yalan, böhtan, şantaj yazmayıbsa, kimisə təhqir etməyibsə, fikirlərini bölüşməkdə sərbəstdir. Qanunları pozubsa, təhqirə, böhtana yol veribsə qanun qarşısında cavabdehdir və qarşı tərəfin ondan şikayət hüququ var. Bütün bu dediklərimiz adi həyat normalarıdır. Amma kimisə qorxutmaqla, hədəylə, təzyiqlə fikrini sildirmək, - xüsusən də məmurdursa, - bunun adı təzyiqdir və yolverilməzdir. Kimliyindən asılı olmayaraq, istər məmur olsun, istər biznesmən olsun, istər sadə vətəndaş, kiməsə təzyiq edə bilməz, imkanından, vəzifəsindən sui-istifadə edə bilməz. Bunun üçün məsuliyyət məsələsi var”.
Məhəmmədəli QƏRİBLİ
