Ermənistanın xarici işlər naziri Ararat Mirzoyan İran İslam Respublikasının Ermənistan Respublikasına yeni təyin olunmuş səfiri Mehdi Sobhani ilə görüşüb. Ermənistan Xarici İşlər Nazirliyindən bildirilir ki, Mirzoyan Mehdi Sobhanini vəzifəyə təyin olunması münasibətilə təbrik edib, səfirin iki dost və qonşu ölkə arasında əlaqələrin daha da inkişafına mühüm töhfə verəcəyinə ümid etdiyini bildirib.
Ermənistan və Azərbaycan arasında münasibətlərin nizamlanması ətrafında son müzakirələrə toxunan Ararat Mirzoyan vurğulayıb ki, erməni tərəfinin səyləri Cənubi Qafqazda bütün region xalqları üçün faydalı olacaq davamlı sülhün bərqərar olmasına yönəlib. Tərəflər mövcud problemlərin sülh və danışıqlar yolu ilə həllinin vacibliyini vurğulayıblar. A.Mirzoyan ənənəsinə sadiq qalaraq yenə də Azərbaycanın əleyhinə saxta ittihamlar səsləndirib, Laçın yolunun guya bağlandığı barədə şər-böhtanlarını səsləndirib.
Yeri gəlmişkən, Mehdi Sobhani İranın Azərbaycandakı səfirliyinin 2-ci katibi, Ukraynadakı səfirinin müavini, Türkmənistandakı səfirin müavini, Pakistanın Kəraçi şəhərində baş konsul, İranın Suriyadakı səfiri, İran XİN-in Qərbi Asiya İdarəsinin baş direktoru və nazirliyin Strategiya İdarəsinin baş direktoru vəzifəsində çalışıb.
Bu görüşdən sonra Ermənistan xarici işlər naziri Ararat Mirzoyan Tehrana səfər edib. Bu barədə Ermənistan XİN sözçüsü "Twitter"də bildirib. Səfər çərçivəsində Ermənistan və İran XİN başçılarının görüşü, mətbuata birgə bəyanat nəzərdə tutulur.
Maraqlıdır ki, Ermənistan-İran yaxınlaşması həm də Rusiya ilə İran arasındakı münasibətlərin gərgin olduğu bir dönəmə təsadüf edir. Ermənistan belə həssas məqamda İrandan nə istəyir?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, təqribən 2 ay əvvəl ABŞ-ın Respublikaçılar İnstitutu Ermənistanda rəy sorğusu keçirib və maraqlı nəticələr ortaya çıxıb. Məlum oldu ki, ermənilər özlərinin təhlükəsizliyinin təminatçısı kimi birinci yerdə İranı görürlər. Əhalinin 54 faizi Ermənistanın təhlükəsizliyinin əsas təminatçısının İran olduğunu deyir. İkinci yerdə Fransa, yalnız üçüncü yerdə Rusiyanın adı çəkilib. Ermənistan rəsmilərinin İrana tez - tez səfər etməsinin kökündə də bu səbəb dayanır. Demək istəyir ki, “biz səni özümüzün əsas təhlükəsizlik qarantisi sayırıq və istəyirik ki, bu istiqamətdə real addımlar atılsın”. Göz qabağındadır ki, Ermənistanın Avropadan silah almaq ümidləri özünü doğrultmur. Fransa da nə qədər vədlər versə də, müasir silahları vermək fikrində deyil. Hətta versə belə, o silahları Ermənistana çatdırmaq məsələsində ciddi problemlər var. O da məlumdur ki, İranın ucuz kamikadze dronları Ukraynada çoxlu faciələr törədib. Rusiya bu dronlardan gen - bol istifadə edib. Demək olar, hər gün yüzlərlə dron Ukrayna cəbhəsində həm hərbiçilərə, həm də dinc əhaliyə qarşı dırnaqarası uğurla istifadə olunur. Ermənistan nəyin bahasına olursa olsun, İrandan ucuz və onların tələbatını ödəyəcək silahlar almaq istəyir. Burda da birinci yerdə, təbii ki, İran istehsalı olan dronlardır. İranın bu yaxınlaşmada məqsədi nədir? Məlumdur ki, bu ay İsrailin müdafiə naziri Bakıda səfərdə oldu. Həm Azərbaycan rəhbərliyi ilə, həm Müdafiə Nazirliyinin rəhbərliyi ilə danışıqlar apardı. Hər dəfə baş tutan bu cür səfərlər İranda çox böyük narazılıqla və qısqanclıqla qarşılanır. Erməni rəsmilərinin səfərlərini təşkil etməklə İran Azərbaycana öz növbəti narazılıq mesajını göndərmək istəyir. Ancaq bu cəhdlər mənasızdır. Azərbaycan İranla münasitlərinin normallaşmasını arzulayır və bunun üçün hər şey etməyə hazırdır. Yalnız bir məsələdə güzəşt olmayacaq. Azərbaycan öz xarici siyasətini özü müəyyən edir və kiminsə burda yol göstərməsinə, məsləhət verməsinə Azərbaycanın heç bir ehtiyacı yoxdur. İsraillə hərbi əməkdaşlıq Azərbaycanın prioritet istiqamətlərindən hesab olunur. Bu əməkdaşlıq hər gün daha da artmağa davam edəcək. İran bu reallığı artıq qəbul etməlidi və hər dəfə bu cür səfərlərə qısqanclıqla yanaşmaqdan imtina etməlidir. Bir şey aydındır - Azərbaycan öz müstəqil xarici siyasətindən heç vaxt imtina etməyəcək. İranın bu addımlara qarşı gedişləri də məlumdur. İlk növbədə İran Ermənistanla yaxınlaşmaq cəhdlərini, səfərlərin sayını artıracaq. Ola bilsin ki, müəyyən razılaşmalara da gəlinə bilər. Aydındır ki, İranla Ermənistan yaxınlaşması Qərbdə yaxşı qarşılanmayacaq. Ancaq hər iki tərəf əməkdaşlığa məhkumdur. Onların başqa çarəsi yoxdur. Bu səbəbdən də Ermənistan rəsmilərinin İrana səfəri bundan sonra da davam edəcək. Azərbaycan buna əhəmiyyət vermədən öz müstəqil xarici siyasətini yeridəcək, iqtisadi gücünü, hərbi potensialını artırmaqda davam edəcək”.
Məhəmmədəli QƏRİBLİ
