Bu ilin yanvar-aprel aylarında Azərbaycana 168 ölkədən 522,9 min və yaxud ötən ilin eyni dövrü ilə müqayisədə 1,6 dəfə (təxminən 60 % çox) çox əcnəbi və vətəndaşlığı olmayan şəxs gəlib. Bu barədə Dövlət Statistika Komitəsi xəbər verir.
Ötən ilin eyni dövrü ilə müqayisədə Çindən gələnlərin sayı 4,3 dəfə, Hindistandan - 4,2 dəfə, Türkmənistandan - 3,8 dəfə, Özbəkistandan - 3,3 dəfə, Belarusdan - 3,3 dəfə, Qazaxıstandan - 2,1 dəfə, Pakistandan - 1,9 dəfə, Rusiyadan - 1,9 dəfə, Böyük Britaniyadan - 1,9 dəfə, Niderlanddan - 1,9 dəfə, ABŞ-dan - 1,7 dəfə, Ommandan - 1,6 dəfə, Küveytdən - 48,9 %, BƏƏ-dən - 44,5 %, Gürcüstandan - 43,8 %, Türkiyədən - 31 % artıb.
Maraqlı məqam ondan ibarətdir ki, 2022-ci ildə İsraildən Azərbaycana səfər edənlərin sayı əvvəlki illə müqayisədə 4 dəfə artaraq 23 935 nəfər təşkil edib.
Dövlət Turizm Agentliyinin yaydığı məlumatda qeyd edilir ki, 2023-cü ilin son 5 ayında isə Azərbaycana səfər edən İsrail vətəndaşlarının sayı ötən ilin eyni dövrü ilə müqayisədə 70% artaraq 8 611 nəfər olub. Məlmat üçün bildirək ki, hazırda Təl-Əvivdən Bakıya həftədə 7 dəfə olmaqla birbaşa uçuşlar təşkil olunur.
Ölkəmizə marağın məhz bu ildə yüksəlməsi nə ilə bağlı ola bilər? Burada turizmlə yanaşı siyasi amillərin də rolu varmı?
“Qarşılıqlı diplomatik əlaqələr bugünkü gündə dostluq münasibəti zəminində davam etməkdədir, bunun nəticəsi olaraq aviareyslərin sayı artıb, gəliş-gedişlərin də sayı inkişaf səviyyəsindədir”
“Smart Hotel Menecment” şirkətinin direktoru, Skal Turizm Peşəkarları Assosasiyasının prezidenti, turizm eksperti Ceyhun Aşurov “Bakı-Xəbər”ə açıqlamasında qeyd etdi ki, İsraildən Azərbaycana gələn turistlərin sayı artıb: “Məlumat üçün deyim ki, 2019-cu ilə qədər ölkəmizə ən çox gələn turistlər sırasında israillilər də var idi. Pandemiya dövründə əlaqələr dayandı. Lakin 2021-ci ildən əlaqələrin yenidən bərpa olunması ilə ölkəmizə həmin ölkədən gələn səyahətçilərin sayının artmasına səbəb oldu. Bu ölkədən gələn vətəndaşların sayının çox olmasında iki ölkə arasında diplomatik əlaqələrin güclənməsinin də xüsusi rolu var. Siyasi əlaqələrin güclənməsi nəticəsində Azərbaycanın İsraildə səfirliyi açıldı. Qarşılıqlı diplomatik əlaqələr bugünkü gündə dostluq münasibəti zəminində davam etməkdədir. Bunun nəticəsi olaraq aviareyslərin sayı artıb, gəliş-gedişlərin də sayı inkişaf səviyyəsindədir”.
Həmsöhbətimiz onu da əlavə etdi ki, hər iki ölkə arasında siyasi əlaqələrlə yanaşı, iqtisadi mədəni münasibətlərin də inkişaf etməsi turizmə öz təsirini göstərir: “İsrail əhalisi üçün Azərbaycan elə də uzaq ölkə deyil. Azərbaycandan da İsrailə gedənlər daha çox turizm və müalicə məqsədi ilə gedir. İsraildə yaşayan soydaşlarımızın sayı çoxdur. Onların qohumları, müəyyən biznes işləri Azərbaycanda olduğu üçün mütəmadi olaraq ölkəmizi ziyarət edirlər. Qeyd edim ki, Azərbaycandan İsrailə birbaşa hava yolu əlaqəsi olduğu üçün gəlmək rahatdır. Bununla yanaşı, İsrail öz vətəndaşlarının Azərbaycana səyahətlərini də dəstəkləyir. Həmçinin, Azərbaycanı turizm məkanı kimi yeni kəşf edənlər gəlir. İsraildən Azərbaycana gələnlərin buranı seçməkdə bir neçə səbəbi var. Əvvəla, onlar özlərini Azərbaycanda güvəndə hiss edirlər. Bundan başqa, İsraildən Azərbaycana gəlmək rahatdır və büdcə baxımından ucuzdur. İsrail vətəndaşları təkcə Bakıya deyil, digər bölgələrimizə də səfərlər edirlər. Beş gündən bir həftəyə qədər qalan israilli turistlər olur. Düşünürəm ki, diplomatik əlaqələr dərinləşdikcə səfər günlərinin sayı artacaq”.
Ekspert onu da əlavə etdi ki, israillilərin Azərbaycana səfər etmələrinin bir səbəbi də bizdə qiymətlərin ucuz olmasıdır. Həmin ölkədə həyat Azərbaycanla müqayisədə çox bahalıdır.
Günel CƏLİLOVA
