Gömrükçülərin həyata keçirdiyi daha bir uğurlu əməliyyat nəticəsində 306 kiloqram 710 qram narkotik vasitə-heroin aşkar edilib.
DGK Mətbuat və İctimaiyyətlə Əlaqələr İdarəsindən “Bakı-Xəbər”ə bildirildiyinə görə, Cənub Ərazi Baş Gömrük İdarəsinin Əməliyyat və Təhqiqat İdarəsinə daxil olan əməliyyat məlumatı əsasında Biləsuvar gömrük postunda İran İslam Respublikasının “Nader Morvarıd Astara” şirkəti tərəfindən Azərbaycan ərazisindən tranzit keçməklə Gürcüstanın “Marıana Younes Saeı Dızajyekan” şirkətinə göndərilən “daş bloklar” yükü daşıyan yük avtomobilləri saxlanaraq stasionar rentgen qurğusundan keçirilib.
Yoxlama zaman avtomobillərin qoşqularında olan “Daş bloklar” yükünün təsvirlərində şübhəli cizgilər müşahidə edilib.
İİR vətəndaşı Azızıkoshkı Majıd Hassanın idarə etdiyi “SCANIA” markalı yük avtomobilindəki paletlərdən birinə gömrük baxışı zamanı 28 ədəd daş blokun hər birinin daxilində 1 ədəd olmaqla şəffaf rəngli polietilen torbalarda qablaşdırılan, ümumi çəkisi 45 kq 446 qram narkotik vasitə-heroin aşkar edilib. Bundan sonra həmin avtomobildəki digər daş bloklarda da narkotik vasitələrin olub-olmadığını təkrar yoxlamaq məqsədilə yük avtomobili idxal xəttinə yönləndirilib. Yoxlama yerinə çatarkən sürücü Azızıkoshkı Majıd Hassan qəfildən idarə etdiyi nəqliyyat vasitəsinin surətini artıraraq İran istiqamətinə hərəkət etməyə başlayıb. Gömrük əməkdaşları bunun qarşısını almağa səy göstərsələr də, sürücü yük avtomobili ilə İran istiqamətindəki çıxış xəttində olan “şlaqbaumu” sındıraraq Azərbaycan Respublikasının ərazisini tərk edib. Qanunsuz şəkildə, müvafiq sənədlər olmadan dövlət sərhədini keçən sürücü İran İslam Respublikasının Biləsuvar gömrük postunun nəzarət zonasının girişində yük avtomobilini darvazanın kandarına çırparaq dayanıb və nəqliyyat vasitəsindən düşüb qaçaraq İran ərazisinə daxil olub.
Bundan sonra nəzarətdə olan İran islam Respublikasının digər vətəndaşı İmanı Rouhollah Alıakbarın idarə etdiyi “VOLVO” markalı yük avtomobilinin qoşqusunda olan 15 paletdəki 960 ədəd daş blok rentgen qurğusundan keçirilərək yoxlanıb. Yoxlama zamanı 161 ədəd standart ölçülü, düzbucaqlı formalı daş blokların hər birinin içərisində 1 ədəd olmaqla şəffaf rəngli polietilen torbalarda qablaşdırılmaları ilə birlikdə ümumi çəkisi 261 kq 264 qram təşkil edən narkotik vasitə - heroin aşkar edilib.
Beləliklə, iki yük avtomobilindən aşkar edilən narkotik vasitə - heroinin ümumi çəkisi 306 kq 710 qramdır.
Qeyd edək ki, aşkar olunan 306 kq 710 qram heroinin “qara bazar”da dəyəri 21 milyon 500 min manat təşkil edir.
Faktla bağlı araşdırma aparılır.
