Qəbələ Rayon Polis Şöbəsinin əməkdaşları tərəfindən keçirilmiş əməliyyat-axtarış tədbirləri nəticəsində Azərbaycan Respublikası Cinayət Məcəlləsinin 177.2.1 ( Oğurluq- qabaqcadan əlbir olan bir qrup şəxs tərəfindən törədildikdə) və 177.2.2-ci (təkrar törədildikdə) maddələri ilə axtarışda olan İsmayıllı rayon sakini Elçin Məmmədov fevralın 23-də Bakı şəhəri ərazisində saxlanaraq Qəbələ RPŞ-yə gətirilib və İstintaq bölməsinə təhvil verilib.
Faktla bağlı araşdırma aparılır.
Kürdəmir Rayon Polis Şöbəsinə fevralın 23-də saat 1 radələrində Atakişili kəndi ərazisindən Xırdapay kənd sakini H.Səlimovun “VAZ-21074” markalı avtomobilinin qaçırılması barədə müraciət daxil olub.
Müraciətlə əlaqədar dərhal müvafiq araşdırmalar aparılıb. Keçirilmiş əməliyyat-axtarış tədbirləri nəticəsində nəqliyyat vasitəsini qaçırmaqda şübhəli bilinən Böyük Kəngərli kənd sakini N.İsmayılov həmin avtomobili idarə edərkən polis əməkdaşları tərəfindən saxlanıb.
Kürdəmir RPŞ-də araşdırma aparılır.
Fevralın 23-də Astara rayonunun Züngüləş kəndi ərazisində dövlət sərhədini qanunsuz keçmiş İran vətəndaşı T.Əbduləli Dövlət Sərhəd Xidmətinin əməkdaşları tərəfindən saxlanıb.
Dövlət Sərhəd Xidməti və Astara Rayon Polis Şöbəsi əməkdaşları tərəfindən aparılmış araşdırmalarla onun özü ilə gətirdiyi narkotik vasitəni kənd ərazisində naməlum şəxslərə verməsi müəyyən edilib.
Keçirilmiş əməliyyat-axtarış tədbirləri nəticəsində T.Əbduləlidən narkotik vasitəni almaqda şübhəli bilinən Ərçivan qəsəbə sakini, əvvəllər oğurluq və qəsdən adam öldürməyə görə məhkum olunmuş V.Hacıyeva və Astara şəhər sakini A.Məmmədov qısa müddətdə müəyyən edilərək saxlanıb.
Davam etdirilən tədbirlərlə V.Hacıyevanın yaşadığı evdən 8 ədəd plastik bankaya qablaşdırılmış, çəkisi 2 kiloqram 550 qram heroin, 540 qram marixuana, 64 ədəd “Tropikamid mydrax” göz damcısı, 300 qram metamfetamin və 1000 ədəd “Pregabalin” həbləri aşkar edilərək götürülüb.
Nəqliyyatda Baş Polis İdarəsi əməkdaşlarının əldə edilmiş məlumat əsasında Gəncə dəmir yolu stansiyası ərazisində keçirdikləri əməliyyat tədbirləri nəticəsində üzərində narkotik daşımaqda şübhəli bilinən Gəncə şəhər sakini E.İbrahimov saxlanıb. Şəxsi axtarış zamanı ondan 488 qram marixuana aşkar edilərək götürülüb.
Şəki Şəhər Rayon Polis Şöbəsi əməkdaşlarının keçirdiyi əməliyyat tədbirləri nəticəsində saxlanılan şəhər sakini S.Abdulrəhimovdan 475 qram, Naftalan Şəhər Polis Şöbəsinin əməkdaşları tərəfindən saxlanan şəhər sakini, əvvəllər məhkum olunmuş P.Ruzicəngidən isə 426 qram marixuana aşkar edilərək götürülüb.
Hər üç faktla bağlı araşdırma aparılır.
Binəqədi RPİ-nin 5-ci Polis Bölməsi əməkdaşlarının keçirdiyi əməliyyat-axtarış tədbirləri nəticəsində ayrı-ayrı vaxtlarda rayon ərazisində “AzSamand”, “Nissan”, “Ford-Transit”, “Daewoo” və “London Taxi” markalı 5 avtomobildən pul, mobil telefon və sənədlər oğurlamaqda şübhəli bilinən Abşeron rayon sakini E.İsayev saxlanıb.
Araşdırma aparılır.
Xətai RPİ-nin 37-ci Polis Şöbəsinə müraciət edən əcnəbi vətəndaş yanvarın 25-də “BMW” markalı avtomobilindən içərisində 1600 manat olan pulqabısının oğurlandığını bildirib.
Polis əməkdaşlarının keçirdiyi əməliyyat-axtarış tədbirləri nəticəsində oğurluğu törətməkdə şübhəli bilinən İmişli rayon sakini, əvvəllər məhkum olunmuş M.Mirbabayev saxlanıb.
Şəki Şəhər Rayon Polis Şöbəsinin əməkdaşları tərəfindən narkotiklərin qanunsuz dövriyyəsinə qarşı növbəti uğurlu əməliyyat tədbiri keçirilib.
Fevralın 22-də ŞRPŞ əməkdaşlarının əldə edilmiş məlumat əsasında keçirdiyi əməliyyat-axtarış tədbirləri nəticəsində şəhər sakini Sərxan Abdurəhimov şübhəli şəxs qismində saxlanıb. Onun üzərinə şəxsi axtarış keçirilən zaman 475 qram narkotik vasitə-qurudulmuş marixuana aşkar edilərək götürülüb.
Faktla bağlı cinayət işi başlanılıb, araşdırma aparılır.
