Kamran Məmmədli: “Bank öz fəaliyyətini yüksək səviyyədə qurmaq istəyirsə, problemli kreditləri sağlamlaşdırmalıdır”
Bu il iyunun 1-nə Azərbaycanda vaxtı keçmiş kreditlərin məbləği 508,3 milyon manat təşkil edib. Mərkəzi Bankın məlumatına əsasən, bu, mayın 1-i ilə müqayisədə 1,1 % çoxdur. Ölkədə problemli kreditlərin məbləği ilin əvvəlinə nisbətən 13,2 %, son 1 ildə isə 9 % artıb.
Bəs görəsən, problemli kreditlərin artmasının səbəbi nədir?
“Bəzən insanlar istehlak kreditlərini lazım oldu-olmadı, məişət əşyaları almaq və digər vacib olmayan ehtiyaclarını ödəmək üçün götürür, nəticədə isə…”
Iqtisadçı Kamran Məmmədli “Bakı-Xəbər”ə şərhində bildirdi ki, insanlar maliyyə problemləri ucbatından götürdüyü vəsaiti ödəyə bilmir: “Belə olan halda da faiz borcları da üzərinə gələrək ödəniləcək borc daha da artır. Hər kəs kredit götürərkən öz öhdəliyini yaxşı ölçüb-biçməlidir. Bəzən insanlar istehlak kreditlərini lazım oldu-olmadı, məişət əşyaları almaq və digər vacib olmayan ehtiyaclarını ödəmək üçün götürür. Ödənmədikdə isə problemlər yaranır. İstehlak kreditləri hesabına mobil telefon, saatlar, noutbuklar alan insanlar var ki, onları ildə iki-üç dəfə dəyişirlər. Bu o qədər də yaxşı tendensiya deyil. Ümumiyyətlə, insanlar öz gələcək problemlərini bu gün daha çox kreditlər vasitəsilə həll etməyə çalışırlar. Bu, həmçinin, Azərbaycan əhalisinin məişət davranışından da irəli gələn problemlərdir. Banklar daha liberal maliyyə-kredit siyasəti həyata keçirməli, kreditləri aşağı faizlə insanlara təklf etməlidirlər ki, son illərdə yaranmış maliyyə problemlərini kreditlər vasitəsilə həll etsinlər”.
Həmsöhbətimiz onu da əlavə etdi ki, problemli kreditlərin həcminin artması tək vətəndaşların deyil, bankların da problemidir: “Banklar vəziyyətin getdikcə pisləşdiyini nəzərə alıb, ona görə davranmalıdır. Bu sahədə atıla biləcək ən doğru addım kreditlərin sağlamlaşdırılmasıdır. Bank öz fəaliyyətini yüksək səviyyədə qurmaq istəyirsə, problemli kreditləri sağlamlaşdırmalıdır. Şəxslərə və ya sahibkarlara şərait yaradılır ki, mövcud problemli kreditin ödənişini təmin etsinlər.
Onu da deyim ki, problemli kreditlər iki yerə ayrılır - biznes məqsədilə götürülmüş problemli kreditlər və istehlak kreditləri. Danılmaz faktdır ki, istehlak kreditləri birinci yerdədir”.
Günel CƏLİLOVA
