Azərbaycanda əhalinin əsas istehlak səbətinə daxil olan ətin qiyməti avqustda yüksəlib. Bu barədə Dövlət Statistika Komitəsinin yaydığı məlumatda qeyd olunur. Bildirilir ki, bütün qiymətlər orta ölçüdə götürülür.
Ətin satış qiymətinin artmasını satıcılar da təsdiq edir. Onlar qeyd edir ki, artım son 1 həftədə baş verib. O da qeyd edilir ki, ətin qiymətinin bahalaşmasına bir səbəb də rayonlarda heyvanın bahalaşmasıdır. Qiymətlərin daha da artacağı da istisna edilmir.
Ekspertlər hesab edir ki, gələn həftədən toy mövsümünün başlaması ilə də ətin satış qiymətində artım yaşanacaq.
Onu da bildirək ki, 2022-ci il iyul ayının 1-i vəziyyətinə ölkədə iribuynuzlu mal-qaranın sayı 2 milyon 654 min 474 baş olub. Ötən ilin müvafiq dövründə bu rəqəm 2 milyon 663 min 658 baş olmuşdu. Beləliklə, ölkəmizdə bu il ötən ilə nisbətən iribuynuzlu mal-qaranın sayı 0,3 faiz azalıb.
Xatırladaq ki, bu ilin yanvar-iyun aylarında Azərbaycana 20,1 min ton ət idxal edilib. İdxal edilən ətin dəyəri 33,9 milyon dollar olub. 2021-ci ilin eyni dövründə dəyəri 31,8 milyon dollar olmaqla 18,3 min ton ət idxal edilib.
“Qiymət artımına səbəb olan amillərdən biri də yemin, baytarlıq xidmətlərinin, dərmanların, iynələrin bahalaşmasıdır”
Iqtisadçı Kamran Məmmədli bildirdi ki, ət və ət məhsullarındakı qiymət dəyişikliyi daxili bazarda gedən proseslərin nəticəsidir. Üstəlik, mövsüm amili də bazara təsir göstərir: “Nəzərə almaq lazımdır ki, qış aylarında fermerin xərcləri artır. Bu da öz növbəsində ət və ət məhsullarının qiymətinin yüksəlməsinə səbəb olur”.
Ekspertin sözlərinə görə, dana ətinin bahalaşması əsasən yemin qiymətinin qalxması ilə bağlıdır: “Daxildə yemlik istehsalı artarsa, idxaldan asılılıq azalarsa bu hal ətin qiymətinə təsir edər. Qiymət artımına səbəb olan amillərdən biri də baytarlıq xidmətlərinin, dərmanların, iynələrin bahalaşmasıdır. Bundan əlavə, əgər digər məhsulların qiyməti qalxırsa, ət istehsalçıları da öz ehtiyaclarını ödəmək üçün qiyməti qaldırmaq məcburiyyətindədirlər. Danılmaz faktdır ki, dizelin qiymətinin artması aqrar sektorun istənilən sahəsinə təsir edir. Ümumiyyətlə, ölkədə qiymətlər kəskin artır, inflyasiya sürətlənir, fermerlərin, ət istehsalçılarının gündəlik xərcləri artır, onlar da qiyməti qaldırmalı idilər ki, öz gündəlik xərclərini ödəsinlər”.
Günel CƏLİLOVA
