“Nağdsız hesablaşmalar haqqında" Qanunda pərakəndə ticarətdə nağd hesablaşmalar üçün nəzərdə tutulan limit 4 min manat müəyyən edilib. Bu barədə Milli Məclisin İqtisadi siyasət, sənaye və sahibkarlıq komitəsinin iclasında qanun layihəsinin müzakirəsi zamanı bildirilib. Lakin bu, narazılığa səbəb olub.
Bank sahəsi üzrə ekspert Əkrəm Həsənov bildirdi ki, məlum qərar pərakəndə ticarətə aiddir: “Nəzərdə tutulan dəyişiklikdə əsas məqsədin nədən ibarət olduğu naməlumdur və məntiqli görünmür. Qəbul olunan qərar pərakəndə ticarətə aiddir. Lakin Milli Məclisin saytında bu rəqəm 4000 manat deyil, 2000 manat qeyd olunub. Ola bilər ki, 4000 manat son variantdır. İndiyə kimi belə bir limit mövcud deyildi. Bu qərar yeni ildən etibarən bir yenilik kimi həyata keçiriləcək. Qanuna görə, vətəndaş bir dəfəyə 4000 manatdan artıq nağd alış-veriş edə bilməz. Limitdən artıq alış-verişi ancaq kartla etmək mümkündür. Maraqlıdır ki, istisna hallar da var. Məsələn, mebel və məişət texnikası üçün tətbiq olunan limit 10 000 manatdır. Əslində, bu dəyişiklik gülməlidir. Hansı vətəndaş marketdən 2000 və ya 4000 manatlıq alış-veriş edir ki?! Bu qaydanın mahiyyəti tam olaraq başadüşülən deyil”.
Anar Bayramov: “Qanuna dəyişikliklər təklif edilməzdən öncə ciddi araşdırmalar aparılıb və limitlər ona görə müəyyən edilib”
İqtisadçı ekspert, Auditorlar Palatasının üzvü Anar Bayramov bildirdi ki, Vergi Məcəlləsinə təklif edilən dəyşikliklər paketi çərçivəsində “Nağdsız hesablaşmalar haqqında” qanuna da müəyyən düzəlişlər ediləcək və bu düzəlişlərə görə bir çox xidmət sahələrində nağd ödənişlər üçün yuxarı hədd müəyyən ediləcək: “2022-ci ildən etibarən “Nağdsız hesablaşmalar haqqında" Qanuna da müəyyən əlavə və dəyişikliklər nəzərdə tutulur. Bu qanunda əhaliyə təsir edən istiqamətlərdən biri budur ki, sadə vətəndaş tibb müəssisələrində aldığı tibbi xidmətlərin dəyəri 500 manatdan artıq olduqda, aldığı mebel və məişət texnikalarının dəyəri 10 min manatdan artıqdırsa, mağazalardan, ticarət obyektlərindən aldığı malların dəyəri 2 min manatdan artıqdırsa, həmin ödənişləri mütləq nağdsız qaydada həyata keçirməlidir. O cümlədən, ticarət təşkilatlarından alınan avtomobillərin ödənişi (ödəniş miqdarından asılı olmayaraq) mütləq nağdsız qaydada həyata keçirilməlidir. Təbii, limitlər bir əməliyyat çərçivəsində baş verən ödənişlərə şamil edilir. Yəni eyni gün ərzində eyni ticarət obyektindən bir neçə dəfə alış-veriş etdikdə, hər dəfə məbləğ limiti keçmədikdə, nağd alış-veriş baş tuta bilər”.
Ekspertin sözlərinə görə, qanuna dəyişiklər təklif edilməzdən öncə ciddi araşdırmalar aparılıb və limitlər ona görə müəyyən edilib: “2 min manatlıq bir limit bütün alışlara tətbiq edilsəydi, bildiyimiz kimi, mebel avadanlıqlarının, məişət texnikası avadanlıqlarının qiyməti yüksək olduğu üçün qanunla bir qədər ziddiyyət təşkil edərdi və əhalinin - istehlakçıların hüquqlarını pozardı. O səbəbdən, mebellər üçün, məişət texnikası üçün statistik olaraq 10 min manat minimum götürülüb. Yəni 10 min manata qədər nağd qaydada alına bilər. 10 min manatdan yuxarıdırsa, mütləq nağdsız qaydada ödəniş edilməlidir. Həmçinin tibbi xidmət, yəni orta statistik vətəndaşın aldığı tibbi xidmət 500 manata qədərdirsə, ola bilər, vətəndaş gün ərzində kiçik bir tibbi xidmət alar ki, qiyməti 30-40 manatdır, belə olan halda nağdsız ödəniş edə bilməyən vətəndaşların fəaliyyəti məhdudlaşmış olur, hüquqları pozulur, çünki, bildiyimiz kimi, əhalinin nağdısız ödənişlərlə bağlı maarifləndirilməsi hələ o səviyyədə deyil. Bir çox insanlar var ki, gəlirləri yalnız nağd qaydadadır".
Günel CƏLİLOVA
