Kişilərdən ibarət cüdo millimizin Tokio Olimpiadasındakı uğursuz çıxışı əsas götürülərək, millimizin məşqçilər heyəti bütünlüklə istefaya göndərilib. Bu barədə avqustun 2-də Azərbaycan Cüdo Federasiyasında (ACF) vitse-prezident Sadıq Sadıqovun rəhbərliyi altında keçirilən iclasda qərar qəbul edilib.
Mətbuatda gedən məlumatlara görə, iclasda federasiyanın baş katibi Elmar Babanlı, Daimi Fəaliyyət Komissiyasının sədri Ağayar Axundzadə, baş katibin müavini Elnur Əşrəfoğlu, əsas və gənclərdən ibarət milli komandaların aparıcı cüdoçuları iştirak edib və ukraynalı baş məşqçi Ruslan Maşurenko başda olmaqla, onun bütün köməkçiləri - Elxan Məmmədov, Nazim Hüseynov və Mehman Əzizovun komandadan göndərildiyi açıqlanıb.
Həmçinin yüksək əmək haqqı alan cüdoçuların maaşlarının onların son bir ildə beynəlxalq nüfuzlu yarışlardakı nəticələrinə uyğun ödəniləcəyi barədə qərar verilib. Kişilərdən ibarət cüdo üzrə milli komandanı çalışdırmaq müvəqqəti olaraq gənclərdən ibarət millinin baş məşqçisi Elçin İsmayılova tapşırılıb.
Qeyd edək ki, cüdo ilə yanaşı digər idman növləri üzrə də idmançılarımızın nəticələri, bir-iki istisnanı nəzərə almasaq, sıfırdır.
Cüdo Federasiyasının bu addımı başqa federasiyalarda da təkrarlana bilərmi? Digər federasiyaların da baş məşqçiləri başda olmaqla məşqçi heyətinin istefaya göndərilməsi ehtimalları varmı?
“Məşqçinin qarşısına konkret vəzifə qoyulur və olimpiadanın yekununda da həmin məşqçidən hesabat istənilir, sonra onunla yola davam edilib-edilməməsi ilə bağlı qərar qəbul edilir”
"İctimai TV"nin İdman Departamentinin rəhbəri Kənan Hakimov “Bakı-Xəbər”ə bildirdi ki, cüdo ilə bağlı atılan bu addım gözlənilən idi, çünki cüdo üzrə milli komanda Tokio Olimpiyadasında gözləntiləri doğrultmadı: “Düşünürəm ki, cüdo ilə bağlı bu qərar gözlənilən idi. Qeydə alınan uğursuz nəticələrdən sonra dəyişikliklərin olması, hətta deyərdim ki, qaçılmaz idi. Söhbət təkcə cüdodan getmir, digər idman növlərini də bura aid etmək olar. Təbii ki, uğursuzluq varsa, demək nələrsə səhv edilib və nələrisə dəyişmək lazımdır. Azərbaycan Cüdo Federasiyası çox tez bir zamanda təcili iclas keçirib belə bir addım atdı. Cüdodan həqiqətən də medal gözləntilərimiz çox idi. Düşünürəm ki, hər halda kənardan belə görünürdü ki, həqiqətən də federasiya tərəfindən milli komandanın üzvləri üçün hər bir şərait yardılmışdı. Lakin gördüyünüz kimi, bu, nəticələrdə öz əksini tapmadı”.
Digər federasiyaların da Azərbaycan Cüdo Federasiyasının addımlarını təkrarlamasına gəldikdə, K.Hakimovun sözlərinə görə, bu istisna olunmur. “O ki qaldı digər idman növlərinə, başqa idman növləri üzrə də bu kimi addımlar atılacağı istisna deyil. Bu bilavasitə həmin idman qurumlarının, federasiyaların rəhbərlərinin səlahiyyətində olan məsələdir. Ola bilər ki, qarşıdakı günlərdə digər idman növlərində də biz məşqçi dəyişikliyi görək, bu mümkündür. Çünki hər bir məşqçinin qarşısına bir vəzifə qoyulur. Söhbət olimpiya idman növlərindən gedir. İdmançı ilə məşqçinin qarşısına konkret vəzifə qoyulur və olimpiadanın yekununda da həmin məşqçidən hesabat istənilir, sonra onunla yola davam edilib-edilməməsi ilə bağlı qərar qəbul edilir. Ümumiyyətlə, Tokio-2020 Olimpiadası istər cüdoda, istər güləşdə, istərsə də digər idman növlərində bir çox idmanşılarımız var ki, onlar üçün son olimpiadadır. İstənilən halda, biz 2024-cü ildə Parisdə keçiriləcək Yay Olimpiya Oyunlarında yeni simalar görəcəyik” - deyə K.Hakimov bildirdi.
İradə SARIYEVA
