Cavanşir Əliyev: “Uşaqlarda riyaziyyat fənninə marağın azalmasının bir səbəbi proqramın çətinliyidir”
Adətən şagirdlərin dərsdə və imtahanlarda daha çox çətinlik çəkdiyi fənn məhz riyaziyyatdır. Biz bunu buraxılış imtahanlarından sonra səslənən fikirlərdə də müşahidə edə bilirik.
Artıq müəllimlər də etiraf edir ki, şagirdlərin bu fənnə həvəsi və marağı çox azdır.
Dövlət İmtahan Mərkəzinin (DİM) İdarə Heyətinin sədri Məleykə Abbaszadə də bu günlərdə media nümayəndələrinə açıqlamasında deyib ki, riyaziyyat fənni üzrə hələ ki, nəticələr istənilən səviyyədən aşağıdır.
Maraqlıdır, riyaziyyata marağın az, nəticələrin isə aşağı olması nə ilə bağlıdır?
“Bir sıra mövzulara maraq yaratmaq üçün əyləncəli elementlərdən istifadə etmək də lazımi nəticə verir”
Təhsil eksperti Cavanşir Əliyev “Bakı-Xəbər”ə şərhində bildirdi ki, uşaqlarda riyaziyyat fənninə marağın azalmasının bir səbəbi proqramın çətinliyi ola bilər: “Riyaziyyatdan izahlar doğru, ardıcıl, həmin izahların həyatda tətbiqi müəllimlər tərəfindən göstərilərsə, heç bir çətinlik olmaz. Yəni problemin birinci və əsas səbəbi şagirdin dərsi başa düşməməsidir. Məktəbdə riyaziyyat fənninin tədrisi və müəllim yanaşması şagirdlərin bu sahəyə müsbət və ya mənfi münasibətlərinin formalaşmasında böyük rol oynayır. Ancaq şagirdlərin riyazi düşünmək və danışmaq bacarıqlarına yiyələnmələri onlar üçün son dərəcə vacibdir. Bu məqsədə çatmaq üçün təhsil sahəsində aparılan islahatlarda müəllimin üzərinə mühüm vəzifələr düşür. Bu vəzifələrdən ən mühümü müəllimin yüksək tədris keyfiyyətinə nail olmasıdır. Bunun ən səmərəli yolu şagirdlərdə fənnə maraq yaratmaqdır. Şagirdin dərsə marağı isə onun müstəqilliyindən, prosesdə fəal iştirak etməsindən asılıdır. Bir sıra mövzulara maraq yaratmaq üçün əyləncəli elementlərdən istifadə etmək də lazımi nəticə verir. Təhsilverənlər dərsi həvəslə keçməlidirlər. Şagirdlər müəllimlərinin dərsi həvəslə keçdiyini görməlidir. Bunu görən şagirdlər, əlbəttə ki, dərsə həvəsli olacaq. Bununla yanaşı, şagirdlər üçün riyazi düşüncəni inkişaf etdirən təhsil texnologiyaları, mobil tətbiqlər, açıq dərslər və müsabiqələr daha əlçatan olmalıdır”.
Günel CƏLİLOVA
