KİV DF-nin müsabiqə üçün mövzu seçimlərinin vətənpərvərlik roluna dəstəklər var

Tarix: 22.07.2014 / 09:43
Bölmə: Gündəm

Məlum olduğu kimi, 2008-ci il iyulun 30-da Azərbaycan Respublikasının Prezidenti İlham Əliyevin Sərəncamı ilə "Azərbaycan Respublikasında Kütləvi İnformasiya Vasitələrinin İnkişafına Dövlət Dəstəyi Konsepsiyası" təsdiq edilib.
Kütləvi informasiya vasitələrinin inkişafına dövlət dəstəyinin əsas məqsədi vətəndaş cəmiyyəti quruculuğu prosesində KİV-in rolunu nəzərə almaqla fikir, söz və məlumat azadlığını inkişaf etdirmək, kütləvi informasiya vasitələrinin müstəqilliyini dəstəkləmək, redaksiyalara yardım mexanizmini təkmilləşdirmək, informasiya sektorunda yeni informasiya-kommunikasiya texnologiyalarının tətbiqini stimullaşdırmaq, cəmiyyət və kütləvi informasiya vasitələri arasında səmərəli əməkdaşlığı gücləndirmək, jurnalistlərin peşəkarlığının və məsuliyyətinin artmasına şərait yaratmaq, sosial müdafiəsini gücləndirmək, dövlət və cəmiyyət üçün prioritet təşkil edən məsələlərin həllində kütləvi informasiya vasitələrinin potensialından səmərəli istifadə etməkdən ibarətdir. 2009-cu il aprelin 3-də isə Konsepsiyanın tələblərinə uyğun olaraq Azərbaycan Respublikasının Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondu yaradılıb. Fondun əsas vəzifəsi söz və məlumat azadlığının, kütləvi informasiya vasitələrinin inkişaf etdirilməsi üçün Konsepsiyada nəzərdə tutulmuş müddəaların həyata keçirilməsini, habelə KİV-lərin proqram, layihə və digər tədbirlərini maliyyələşdirməkdir. Fond fəaliyyət göstərəndən bu günədək jurnalistlər üçün dəfələrlə yazı müsabiqəsi elan edilib. Fərdi yazı müsabiqələrində seçilən mövzular əsasən milli şüur, milli ruh, gənclərin mənəvi tərbiyəsi və vətənpərvərlik mövzusunda olur. KİV DF-nin fərdi yazı müsabiqələri üçün müəyyən etdiyi mövzular jurnalistikanın inkişafında və jurnalistlərdə vətənpərvərliyin yüksəlməsində hansı rolu oynayır?
"Azərbaycan" qəzetinin baş redaktoru Bəxtiyar Sadıqov "Bakı-Xəbər"ə açıqlamasında qeyd etdi ki, Azərbaycan müstəqil olandan sonra azad mətbuat yarandı: "Mətbuata senzura nəzarəti ləğv olunandan sonra söz və mətbuat azadlığı yarandı. Müstəqil mətbuatın yaranması medianın inkişafında müsbət rol oynadı. Müstəqil qəzet o deməkdir ki, sərbəst şəkildə öz işini planlaşdırır. Harda nə yazacağını özü müəyyən edir. Sovet dövründə hər qəzet hansısa qurumun orqanı idi. Müstəqil mətbuat heç bir qurumun qarşısında hesabat vermir. Bu müstəqillik eyni zamanda bir sıra problemlərin yaşanmasına səbəb oldu. Problem deyəndə, milli və dövlət maraqlarının mətbuat səhifələrində görünməməsi idi. Müstəqil qəzet sensasiyalı xəbərlərə yer ayırır, amma milli, vətənpərvərlik mövzularına yer ayırmır. Bu problemlərin aradan qaldırılması üçün ölkə başçısı İlham Əliyev KİV-ə Dövlət Dəstəyi Konsepsiyasının hazırlanması ilə bağlı göstəriş verdi. Və həmin konsepsiya hazırlanaraq qəbul olundu. Konsepsiyanın fəlsəfəsi də ondan ibarətdir ki, dövlət üçün əhəmiyyətli olan mövzular mətbuat səhifələrində işıqlandırılsın".
B.Sadıqovun sözlərinə görə, vətənpərvərlik mövzusunda yazılan mövzular jurnalistlərdə vətən sevgisinin yüksəlməsinə səbəb olur: "Düşünürəm ki, milli ruh, milli şüur, vətənpərvərlik, dövlətçilik istiqamətində yazan jurnalistlər sanki bu sahə üzrə peşəkarlaşır. Dövlət üçün zəruri olan mövzular müstəqil mətbuat səhifələrində yer alır. Uğurlar da əldə olunur".

"Xalq Cəbhəsi" qəzetinin baş redaktoru Elçin Mirzəbəyli "Bakı-Xəbər"ə açıqlamasında bildirdi ki, KİV-ə Dövlət Dəstəyi Konsepsiyasında yer alan fikirlər fərdi yazı müsabiqələrinə mövzu kimi təqdim olunur: "Seçilən mövzular ilk öncə jurnalistlərin peşəkarlığına təsir göstərir, onlara ruh yüksəkliyi verir. Bu gün yazılı mətbuatda əsasən sensasiyalı xəbərlərə üstünlük verilir. Amma bir çox sosial mövzular var ki, bəzi hallarda mətbuatın diqqətindən kənarda qalır. Bu baxımdan da, düşünürəm ki, keçirilən müsabiqələrdə təqdim olunan mövzular jurnalistikanın inkişafına xidmət edir və mətbuat nümayəndələrində vətənpərvərlik hissinin daha da yüksəlməsinə səbəb olur".

"Kaspi" qəzetinin baş redaktoru Natiq Məmmədli bizimlə söhbətində bildirdi ki, fərdi yazı müsabiqələri üçün seçilən mövzuların mətbuatın inkişafında müstəsna əhəmiyyəti var. Həmin mövzular üzrə keçirilən fərdi yazı müsabiqələri mətbuatın inkişafına təkan verir, jurnalistlər daha da peşəkarlaşır. Xüsusən də mövzular peşəkarlıq baxımından seçilir: "Mövzular Azərbaycan dövləti üçün mühümdür. Xüsusilə də vətənpərvərlik istiqamətində yazılan məqalələr. Bu sahədə yazan jurnalistlərdə vətənpərvərlik hissi daha da yüksək olur".