"Hafka"nın başında nə var?

Tarix: 01.07.2014 / 10:08
Bölmə: Gündəm

"Baghlan Group"un rəhbəri kimi tanınan "Hafka" ləqəbli biznesmen Azərbaycanın ən uğurlu iş adamlarından biri sayılırdı. Qısa müddətdə baş gicəlləndirə biləcək sərvətə sahib olmağı bacaran "Hafka"nın işləri birdən-birə düyünə düşdü. Uğursuzluq bir-birinin ardınca gəlir.
Əvvəlcə müəmmalı xəbərlər "Hafka"nın sahib olduğu "Bank of Azeribaijan"ın ətrafında yayılmağa başladı.
Sonra ölkə mətbuatında yayılan informasiyalardan bəlli oldu ki, "Hafka" yığdığı sərvətləri ölkədən kənara çıxarmağa başlayıb. İddialara görə, gizli maxinasiyalarla bağlı. Məmmədov qrupunun ən ciddi yayındırmalarının qaçaq yanacaq daşınması sahəsində olduğu üzə çıxıb. Bu isə hakimiyyətin ən həssas və strateji yanaşdığı sahələrdən biridir.
Deyilənlərə görə, həmin məlumatlar aparılan dəqiqləşdirmələrlə öz təsdiqini tapıb. Bundan başqa, o da bəlli olub ki, əslində Hafiz Məmmədov Fransanın "Lans" klubunu alaraq və İspaniyanın "Atletiko Madrid" klubuna investorluq edərək dünyada Azərbaycan təbliğatı apardığını göstərərkən xərclədiyi vəsaitlərlə bağlı rəqəmlər xeyli şişirdilib. Yəni bu təbliğat kampaniyasının qarşılığında ona para qazanmaq üçün geniş imkanlar yaradılıb. Amma sonradan məlum olub ki, əslində "Hafka" çəkdiyi xərcləri xeyli şişirdərək, rəhbərliyi aldatmağa çalışıb. Bu isə hakimiyyət tərəfindən qəbuledilməz bir hal sayılır. Buna görə də "Hafka" həm özünün, həm də ona "krışalıq" edən Ziya Məmmədovun vurulacağını görərək biznesini müflis elan etmək yolunu tutub.
"Hafka" yaxşı bilir ki, hakimiyyətin gözündən düşən, hər hansı yanlışlığa yol verən məmurlar, iş adamları tezliklə siyasi səhnədən, biznes aləmindən yola salınır. Buna gedən yolda isə onların qol-budaqları vurulur, bizneslərinin böyük hissəsi əlindən alınır. Bu prosesdə həmçinin müflis olduğunu göstərmək istəyən Hafiz Məmmədov da öz sərvətini xaricə daşıyır.
H.Məmmədovun "Lans" və "Atletiko Madrid" klublarına böyük pullar xərcləməsini, eləcə də guya bir sıra şəxslərin ələ alınmasına böyük vəsaitlər ayırmasının tənqid olunmasını da "Hafka"nın düşünülmüş planı kimi sayanlar var. "Hafka" bununla sərvətinin böyük hissəsini xərclədiyini, əlində az vəsaitinin qaldığını göstərmək istəyir. Buna görə də bildirilir ki, xarici mətbuat orqanlarında haqqında yazılanların bəzilərinin sifarişini onun özü verir.
Maraqlıdır ki, Azərbaycanda müflis olduğu görüntüsünü yaratmağa çalışan H.Məmmədov Britaniyada yeni futbol klubu alıb. H.Məmmədov 75 yaşlı Milan Mandariçi bu ölkənin "Sheffield Wednesday" klubunu 50 milyon dollara ona satmağa razı sala bilib. Amma nədənsə "Atletiko Madrid"lə reklam müqaviləsi bağlamasını, "Lans"ı almasını geniş reklam etdirən H.Məmmədov "Sheffield Wednesday"ı alması haqda danışmır.
Hər halda, özü haqqında müflis olması xəbərləri yaydıran "Hafka"nın Britaniyada yeni klub alması maraqlıdır. Görünür, bunun özü də H.Məmmədovun sərvətini xaricə daşımasının bir yoludur.
"Hafka"nın ölkə daxilində üzləşdiyi digər problem isə onun nəzarətində olan futbol qumarı ilə bağlıdır. Deyilənə görə, mərc oyunlarının təşkilini həyata keçirən "Topaz"la iş adamı Hafiz Məmmədovun yolları ayrılır.
"Bank of Azerbaijan"ın sahibi H.Məmmədovun "Topaz"dakı payının əlindən alınması bankın fəaliyyətindəki böhranla əlaqədardır. Belə ki, sözügedən bankın düşdüyü böhranlı vəziyyət "Hafka" ilə "Topaz"ın vidalaşmasına gətirib çıxarıb.
Gündəlik yığılan mərc vəsaiti "Bank of Azerbaijan"da toplanıb, uduşlar bu bank tərəfindən təqdim olunub. Lakin "Bank of Azerbaijan"ın qarşılaşdığı ağır dövr belə bir qərar verməyə əsas yaradıb. Çünki bankın külli miqdarda borcu var. "Topaz" "Bank of Azerbaijan"da yığılan borcları geri qaytara bilmir.
Məlum olduğu kimi, "Topaz"da nəqliyyat nazirinin oğlu Anar Məmmədovun da payı var. Xeyli vaxtdır ki, nazir oğlu ilə iş adamının münasibətlərində bir soyuqluq yaranıb. Belə görünür ki, "Hafka"nın "Topaz" payı bir əldə cəmləşdirilir və köhnə şəriklə biznesə son qoyulur.
"Hafka"nın sahibi olduğu "Bakı" klubunda da işlər normal getmir. Xeyli müddətdir davam edən maliyyə böhranı onun ortaqlarının işə qarışmasına və qalmaqallı biznesmenlə haqq-hesab çürütməsinə səbəb olub. Xəbərə görə, iyunun 28-də "Bakı" futbol klubu rəhbərliyinin fövqəladə toplantısı keçirilib. İclasda klubun səhmlərinin yenidən bölüşdürülməsi məsələsi əsas müzakirə mövzusu olub.
"Bakı" klubundakı mənbələrdən mətbuata ötürülən məlumatdan məlum olub ki, klubun "Hafka"dan alınması prosesi bu iclasda əsasən yekunlaşıb. Nəticədə klubun səhmlərinin 90-95 faizi Ziya Məmmədovun oğlu Anar Məmmədovla Beynəlxalq Bankın sədri Cahangir Hacıyevin nəzarətinə keçib.
Mənbələr bildirir ki, C.Hacıyev "Hafka"nın ona olan borcunun bir hissəsini belə bağlayıb. Belə ki, H.Məmmədovun Beynəlxalq Banka yüz milyonlarla dollar kredit borcu olduğu və oliqarxın bu borcu qaytarmaq iqtidarında olmadığı bildirilir.
"Bakı"nın Anar Məmmədovla C.Hacıyev arasında hansı proporsiyada bölüşdürüləcəyi bəlli deyil. C.Hacıyev həm də Zaqatalanın "Simurq" və Bakının "İnter" klublarının sahibidir.
Mənbə onu da bildirib ki, "Bakı" klubunda futbolçular və texniki işçilər 6 aydır maaş almır. Nəticədə klubun futbolçuların hər birinə 120-180 min dollararası borcu yaranıb. Maaşlarını tələb edən futbolçular hər dəfə "Hafka" tərəfindən yalan vədlərlə aldadılıb. Onlara maaşının yaxın günlərdə ödəniləcəyi bildirilsə də, vədlər yerinə yetirilməyib.
"Bakı" klubu ətrafında baş verənlər bununla da bitmir. O da məlum olub ki, "Hafka" müqavilə bağladığı futbolçuların adına onların sənədlərindən istifadə etməklə müxtəlif banklardan kreditlər götürüb. Futbolçuların isə bundan xəbəri olmayıb. "Hafka"nın bank rəhbərləri ilə qurduğu bu tələ də indi üzə çıxır. Kredit verən banklar "Hafka"nın maddi vəziyyətinin pisləşdiyini bilən kimi adlarına "Hafka" tərəfindən kredit götürülmüş futbolçulara çağırış göndərib.
Futbolçular adlarına kredit götürüldüyünü biləndə klubda daha böyük gərginlik yaranıb. "Hafka" bununla bağlı ittihamlar qarşısında yalnız bir söz deyib: "Hər şey yaxşı olacaq. Mən hələ Avropadakı futbol klubları ilə məşğulam. Sonra hər şeyi həll edəcəm".
Bütün bunlardan o nəticəyə gəlinir ki, "Hafka"nın başında qara buludlar fırlanır. Hətta vəziyyət o yerə çatıb ki, bir vaxtlar avtomobil korteji ilə paytaxtda gəzən "Hafka"nın keçən həftə iki maşını cərimə meydançasına salındı.
Yəqin ki, bu amilin özü gözdən düşmüş biznesmənə verilən ilk siqnal idi. "Hafka"nın həyatının ən böyük səhvini harda buraxması isə olduqca maraqlıdır. Onun özü bunu hamıdan gözəl bilir. Biz isə həmin məqamı da dəqiqləşdirməyə çalışacağıq.