7 yaşlı internat uşağının gözaltı qaraltılarının müəmmalı pərdəarxası üzə çıxır

Tarix: 23.05.2014 / 04:34
Bölmə: Gündəm

Bakının Suraxanı rayonunda yerləşən Sağlamlıq imkanları məhdud uşaqlar üçün 7 saylı internat məktəbində müəllimə tərəfindən rezin dəyənəklə döyüldüyü iddia edilən 7 yaşlı Nahid Zaur oğlu Cavadovun yeni videogörüntüsü yayılıb. Mobil telefonla çəkilmiş görüntüdə Nihad hadisənin təfərrüatlarını danışır və Afaq adlı müəllimə tərəfindən döyüldüyünü bildirir.
APA-nın xəbərinə görə, 2006-cı il təvəllüdlü Nahid Zaur oğlu Cavadovun babası hadisənin baş verdiyi internat məktəbinə gəlib. Özünü uşağın babası kimi təqdim edən Cavadov Racəddin Dilən oğlu deyib ki, onlar Goranboy rayondandırlar. Babanın sözlərinə görə, həftədə 1-2 dəfə gəlib uşağı aparıblar. Onun sözlərinə görə, uşağın özü də ona döyülmədiyini, məktəbdə yıxıldığını deyib: "Həmin gün uşaq həkimə də göstərilib. Mən də internat məktəbinə gəlmişdim. Mənə də dedi ki, yıxılıb. Videoda onun döyülməsi ilə bağlı səsləndirdiyi fikirlər uşağa təzyiq nəticəsində də ola bilər. Ola bilsin ki, uşağa təzyiq olunub. Çünki Afaq müəllimə ona çox yaxşı baxır, hər zaman qulluq edirdi. Hadisə baş verən gün mən gələndə də uşaq mənə dedi ki, onu heç kim döyməyib, yıxılıb".
Nahid Cavadovun babası Racəddin Cavadov və Təhsil Nazirliyinin İnformasiya şöbəsinin müdir müavini, QHT və KİV-lə iş sektorunun müdiri Cəsarət Valehov jurnalistlərə açıqlamalarında uşağın məktəbdə yıxıldığını bildiriblər.
Qeyd olunub ki, hadisə ilə bağlı müvafiq araşdırma aparılır, Təhsil Nazirliyində xüsusi komissiya yaradılıb. Faktla bağlı yekun məlumat ekspertizanın rəyindən sonra məlum olacaq və müvafiq araşdırmanın nəticələri açıqlanacaq.
Hadisə yerində Nahid Cavadovun anası və atası ilə telefon əlaqəsi yaradılıb. Valideynlər jurnalistlərə açıqlamalarında uşağın yıxıldığını deyiblər. Onlar bu hadisənin köhnə müdirlə yeni müdirin ədavətinin nəticəsi ola biləcəyini də güman ediblər.
Daxili İşlər Nazirliyinin (DİN) mətbuat xidmətinin şöbə müdiri, polis polkovnik-leytenantı Orxan Mansurzadə "Trend"ə bildirib ki, həmin məktəb qapalı tipli müəssisədir: "Görünür, kimlərsə məsələnin başqa tərzdə təqdim edilməsində maraqlıdırlar. Ən azından kadr arxasından da görünür ki, kimlərlə uşağı verdiyi əvvəlki ifadəni dəyişməyə yönləndirir və onu konkret ad çəkməyə təhrik edir. Ən azından bu faktın özündən də bilinir ki, həmin videogörüntüdəki fikirlərə qətiyyən etibar etmək olmaz".
O.Mansurzadə deyib ki, həmin xüsusi internat məktəbinə kənar şəxslərin daxil olması qəti qadağandır: "Ola bilər ki, həmin videokadrlar məsələnin bu formada bizim tərəfimizdən təkzib olunmasında maraqlı olmayan şəxslər tərəfindən yayılıb. Təəssüf ki, maraqlı şəxslər bu hadisədən öz məqsədləri üçün istifadə edirlər. Görünür, kimlərsə uşağın sifətindəki göyərmənin döyülmə nəticəsində yaranmaması ilə bağlı fikrimizdən narahatlıq keçirirlər və hadisənin döyülmə nəticəsində baş verdiyini sübut etmək üçün müxtəlif vasitələrə əl atırlar".
Onun sözlərinə görə, bununla əlaqədar həm polis tərəfindən araşdırma, eyni zamanda Suraxanı Rayon Polis İdarəsi 31-ci Polis Bölməsində təhqiqat aparılırdı. Təhqiqat nəticəsində toplanmış materiallar məsələyə hüquqi qiymət verilməsi üçün rayon prokurorluğuna göndərilib.
Baş Prokurorluğun mətbuat xidmətinin rəhbəri Eldar Sultanov isə APA-ya açıqlamasında qeyd edib ki, Nahid Cavadovun döyülməsi ilə əlaqədar Suraxanı rayon Polis İdarəsində toplanmış materiallar araşdırmanın davam etdirilməsi üçün Suraxanı Rayon Prokurorluğuna göndərilib: "Material üzrə müvafiq ekspertizalar - məhkəmə-tibbi, məhkəmə-psixoloji ekspertizaları təyin olunub, zəruri izahatlar alınıb. Ekspertizaların rəyi alındıqdan sonra toplanmış sübutlara hüquqi qiymət verilməklə, qanunamüvafiq qərarın qəbul olunması təmin ediləcək. Hazırda material üzrə araşdırmalar rayon Prokurorluğunda davam etdirilir".
Onu da qeyd edək ki, Təhsil Nazirliyi şagirdinin müəllimi tərəfindən döyüldüyü iddia edilən 7 nömrəli xüsusi internat məktəbinin rəhbərliyini və məsələdə adı hallandırılan digər şəxsləri vəzifəsindən müvəqqəti kənarlaşdırıb. Bu barədə "Trend"ə Təhsil Nazirliyinin KİV və QHT-lərlə iş sektorunun müdiri Cəsarət Valehov deyib.
Onun sözlərinə görə, həmin təhsil müəssisəsinin idarə olunması Təhsil Nazirliyinin müvafiq məsul şəxslərinə həvalə edilib.
Bu məsələnin araşdırılması bilavasitə təhsil naziri Mikayıl Cabbarovun şəxsi nəzarətinə götürülüb.
İlkin araşdırma zamanı bu qənaətə gəlinib ki, ötən gün mediada yayılan video həmin gün deyil, daha öncə çəkilib və Təhsil və Daxili İşlər nazirliklərinin məsələ ilə bağlı rəsmi açıqlaması yayıldıqdan sonra mediaya yol tapıb. Əgər videonu yayan şəxslərin məqsədi hadisənin daha operativ və hərtərəfli araşdırılmasına kömək etmək idisə, bu video daha öncədən dövlət qurumlarına təqdim olunardı. Dövlət qurumlarına, o cümlədən Təhsil Nazirliyinə müraciət edilmədən informasiyanın və videonun rəsmi qurumların ilkin rəyini açıqladıqdan sonra bu ardıcıllıqla yayılması müəyyən suallar doğurur.
Eyni zamanda hadisənin və ondan sonra gedən proseslərin baş vermə səbəbinin hərtərəfli öyrənilməsi məqsədilə hüquq-mühafizə orqanlarına müraciət edilib.
Bütün hallarda 7 nömrəli xüsusi internat məktəbində azyaşlı Nahid Cavadovun döyülməsi məsələsi bəzi suallar doğurub. Bu suallardan biri məktəblərdə təhlükəsizlik kameraları quraşdırılmasına rəğmən, bu kimi halların araşdırılmasında nə üçün kamera görüntülərindən istifadə olunmamasıdır. APA TV-də yayımlanan "Sosium" verilişinə telefonla qoşulan Təhsil Nazirliyinin QHT və KİV-lə iş sektorunun müdiri Cəsarət Valehov deyib ki, internat məktəbdə müşahidə kameraları olsa da, baş vermiş hadisəni bu kameralar vasitəsilə izləmək mümkün deyil.
Cəsarət Valehov bildirib ki, hadisə ayaqyolunda baş verib, bu kimi yerlərdə isə etik səbəblərdən kameralar quraşdırılmır.
Xatırladaq ki, Təhsil Nazirliyinin hadisə ilə bağlı yaydığı məlumatda bildirilir ki, may ayının 16-da saat 17:00 radələrində II sinif şagirdi, 2006-cı il təvəllüdlü Nahid Cavadov internat məktəbinin sanitar qovşağında sürüşərək yıxılıb və alın nahiyəsindən zədə alıb. X sinif şagirdi onu yerdən qaldıraraq tərbiyəçinin yanına aparıb və uşağa ilkin yardım göstərilib. Aldığı zədə nəticəsində səhəri gün onun gözlərinin altı qaralıb.
Təhsil Nazirliyinin əməkdaşları ilə söhbət zamanı N.Cavadov yıxıldığını təsdiqləyib. Şagird bildirib ki, ona qarşı heç bir fiziki təzyiq halı baş verməyib. Şagird eyni sözləri iki gün əvvəl internat məktəbinə gəlmiş MTN və DİN-in əməkdaşlarına da söyləyib. Sonradan isə "youtube"də Nahid Cavadovun videosu yayılıb. O, Afaq adlı müəllimə tərəfindən döyüldüyünü deyib.
Mövzunu davam etdirəcəyik.