ABŞ prezidenti Donald Trampın İraqdakı hərbi bazadan İrana qarşı istifadə olunduğuna dair açıqlaması Bağdadda etirazla qarşılanıb. Baki-xeber.com xarici mediaya istinadən xəbər verir ki, Suriyadan çıxacaq amerikalı əsgərlərin İraqdakı hərbi bazada yerləşdiriləcəyini deyən Tramp bundan sonra da bölgədə qalacaqlarını deyib.
İraqdakı ABŞ bazasına çox pul xərcləndiyini və bazanı saxlamaq istədiklərini deyən Tramp bunun səbəbini də açıqlayıb. Tramp deyib ki, İraqdakı bazanı saxlamaqda əsas məqsədlərdən biri İranı izləməkdir: “Çünki İran gerçək bir təhlükədir”.
İranı İraqdan vurub-vurmayacağına dair suala gəlincə Tramp deyib: “Xeyr, məqsədimiz İranı izləməkdir. Bu baza Orta Şərqi izləmək üçün əla yerdir, bəziləri bunu başa düşmür. İzləməkdə davam edəcəyik, nüvə silahlarının yayılıb-yayılmadığını əvvəlcədən öyrənə biləcəyik”.
ABŞ prezidentinin bu açıqlaması həm rəsmi Bağdadda, həm də İraqdakı İran dəstəkli qüvvələr tərəfindən etirazla qarşılanıb.
İraq prezidenti Berhem Salih bəyan edib ki, ABŞ prezidenti İranı izləmək məqsədilə Amerika qoşunlarını İraq ərazisində saxlamaq üçün rəsmi Bağdaddan icazə almayıb. “ABŞ qoşunları Vaşinqtonla Bağdad arasındakı ikitərəfli razılaşma əsasında terrorizmlə mübarizə məqsədilə İraqdadır və biz bu anlaşmaya sadiq qalacağıq. İraqı öz problemlərinizlə yükləməyin.
ABŞ böyük gücdür, amma öz siyasətinizi burada davam etdirə bilməzsiniz, çünki burada yaşayan bizik. İranla və digər qonşu ölkələrlə yaxşı münasibətlərdə olmaq İraq üçün prioritetdir” - Berhem Salih vurğulayıb.
İraqda şiə lider Müqtəda əs-Sədrə bağlı koalisiyanın üzvü və parlament sədrinin birinci müavini Həsən əl-Kəabi isə ABŞ hərbi qüvvələrinin İraqdan çıxarılması üçün parlamentdə qanun layihəsi qəbul edəcəklərini deyib. Kəabi bildirib ki, ABŞ İraq dövlətinin qanunlarını və konsitutsiyasını pozur: "Bu gün də ortaya çıxaraq qüvvələrinin qonşu ölkəyə (İrana) hücum üçün İraqda qalacağını dedi. İraqda ABŞ-ın varlığına son qoymaq üçün hər kəsə çağırış edirik”.
İraqın başqa ölkənin hücum üçün istifadə edilməsini qəbil etməyəcəklərini deyən Kəabi qeyd edib ki, ABŞ əsgərlərinin ölkədən çıxarılması və ABŞ-la təhlükəsizlik anlaşmasını ləğv etmək üçün Məclisdə qərar qəbul ediləcək.
Şiə milis qüvvələri Əsayib Əhlixalq Təşkilatının üzvü Kays əl-Hazeli isə ABŞ ordusu, parlamentin qərarı ilə ölkəni tərk etməyəcəyi halda güc tətbiq edəcəklərini deyib.
Qeyd edək ki, artıq bir müddətdir İraqdakı İran dəstəkli şiə qrupu Haşdi-Şabiyə bağlı təşkilatlar ABŞ ordusunun ölkədən çıxarılması ilə bağlı aktiv fəaliyyətə keçib. Bununla bağlı ölkə rəhbərliyində yaranmış fikir ayrılığına baxmayaraq, sözügedən qruplar ABŞ ordusunun ölkədən çıxarılması ilə bağlı parlamentə qanun layihəsi təqdim etməyə hazırlaşırlar.
