Suriyada bir müddətdir qapalı şəkildə gərginlik yaşayan və maddi maraqlar üzündən zidd düşən Rusiya və İrana bağlı iki silahlı qrup arasında toqquşmalar davam edir.
Baki-xeber.com xəbər verir ki, Anadolu Agentliyi etibarlı mənbələrə istinadən Əsəd rejiminə sadiq Rusiya dəstəkli "Pələng Qüvvələrinin 5-ci Birliyi" ilə Bəşər Əsədin qardaşı Mahir Əsədin rəhbərlik etdiyi İran dəstəkli silahlı qrup arasında keçən həftədən qarşıdurmaların başladığını yazır.
Tərəflər arasında daha bir toqquşma yanvarın 30-da Hamanın qərb hissəsində, Rusiyaya məxsus iki müşahidə nöqtəsi arasında olan Rasif kəndi ətrafında baş verib.
İran dəstəkli qrup həmin toqquşmada Rasif kəndini ələ keçirib. Yerli mənbələr münaqişənin ətrafdakı bölgələrə də yayıla biləcəyini deyir.
Rejim dəstəkli qüvvələr arasında qarşıdurmalar ötən həftə ərzində Hama rayonunun şimal-qərb hissəsindəki Şatha, Bredic, Haydarayye, İnnab kəndlərində baş vermişdi.
Qarşıdurmalarda indiyə qədər ən azı 70 nəfərin öldüyü, çox sayda yaralı olduğu bildirilir.
Tərəflərin ötən həftə atəşkəs razılaşmasına baxmayaraq, döyüşlərin dayanmadığı, əksinə, daha da şiddətlənərək davam etdiyi bildirilir.
Azad Suriya Ordusunun sözçülərindən Məhəmməd Rəşid Rusiya və İranın bölgədə hakimiyyət davası apardığını deyib: "Rusiya hərbi müxaliflərlə təmas xətlərində İran dəstəkli qrupların olmasını istəmir. Bu həmlə Rusiyanın Suriyada minlərlə əcnəbi terrorçu saxlayan İranın orduya da hakim olmasını əngəlləmək cəhdi kimi də dəyərləndirilə bilər".
Rusiya və İran arasında gərginliyin lokal və məhdud bir münaqişəyə çevrildiyini və hələlik bu yöndə davam etdiyini bildirən Rəşid tərəflər arasında nüfuz müharibəsinin maddi maraqlar üzündən başladığını dilə gətirib.
Tərəflərin ticarət yollarına nəzarət, qanunsuz ödənişlər və qaçqın düşən insanların evlərinə qayıdışı kimi məsələlərdə gərginlik yaşadığı bildirilir.
