İran Atom Enerjisi Təşkilatının (İAET) sədri Əli Əkbər Salehi, İranın 5+1 ölkələri (BMT TŞ-nin 5 daimi üzvü və Almaniya) ilə nüvə razılaşması şərtlərindən biri olan Ərak nüvə reaktoruna beton tökməklə bağlı qarşı tərəfə səhv məlumat verdiklərini etiraf edib.
Baki-xeber.com “Euronews”a istinadən xəbər verir ki, İran televiziyasına açıqlama verən Salehi, Ərak ağır su reaktorunun yanacaq borularına beton tökmədiklərini deyib. O, əvvəlcədən sözügedən borulara bənzər borular aldıqlarını və betonu da bu borulara tökdüklərini deyib.
"Ərak stansiyasındakı reaktor qabına beton tökmədik. Əgər töksəydik reaktor yararsız vəziyyətə düşəcəkdi. Yanacağın içindən keçən təzyiq boruları vardı, sadəcə onlara beton tökdük. O boruları da əvvəlcədən tədarük etmişdik. Beton tökülən borular reaktorda istifadə edilən borular deyildi, bənzərləri idi" - Salehi deyib.
Salehi bununla bağlı təlimatı ölkənin ali dini lideri ayətullah Əli Xamneyidən aldığını ifadə edib: "Bunu təkcə Əli Xamneyi bilirdi. Xamneyi “Diqqətli olun, bunlar sözlərinin üstündə durmaz” deyərək xəbərdarlıq etdi.
Biz də ağıllı bir iş gördük. 2-3 sm diametrdə, 3-4 metr uzunluğunda başlığı olan (əvvəlcədən aldığımız) təzyiqli yanacaq borularına beton tökdük. Əgər müzakirələrdə qarşı tərəf digərlərinə beton tökmədiyimizi bilsəydi, onlara da tökməyimizi istəyəcəkdi".
Salehi, sosial mediada reaktora beton tökülməsilə bağlı yayılan götüntülərin isə “fotoshop”la hazırlandığını deyib.
Qeyd edək ki, İranla BMT Təhlükəsizlik Şurasının 5 daimi üzvü (ABŞ, İngiltərə, Çin, Fransa və Rusiya) və Alminaya arasında danışıqlar 2015-ci ilin aprel ayında başlayıb və 2015-ci ilin iyul ayında başa çatıb. Tərəflər arasında nüvə müqavilə Avstriyanın paytaxtı Vyanada imzalanıb.
Ancaq sonradan ABŞ razılaşmanı birtərəfli şəkildə tərk edib.
