Böyük Britaniya baş naziri Tereza Mey Avropa Birliyi ilə əldə etdiyi “Brexit” anlaşması parlament tərəfindən rədd edilib. “Brexit” razılaşması Britaniya parlamentində dəstək ala bilməyib.
Razılaşma 202 leyhinə, 432 əleyhinə olmaqla rədd edilib.
Səsvermədən sonra açıqlama verən baş nazir Tereza Mey, müxalifət sorgu verərsə bunun təkrar müzakirə edilə biləcəyini deyib.
Ana müxalifətdəki İşçi Partiyasının lideri Jeremi Corbin, səs vermədən əvvəl parlamentdə deputatlara müraciət edərək “Bu razılaşmanın bu gecə rədd edilməsinin ən yaxşı nəticəsi ümumi seçki olacaq” deyib.
Anlaşmanın rədd edilməsi ilə Britaniyada bir sıra variantlar, o cümlədən erkən seçkilər və yeni referendumun keçirilməsinin gündəmə gələcəyi gözlənir.
Yanvarın 9-da parlamentin qəbul etdiyi qərara əsasən, parlament Brexit müqaviləsinin əleyhinə səs verdiyi halda, hökumət 3 parlament iş günü ərzində alternativ Brexit planı təqdim etməlidir.
Avropa Ədalət Məhkəməsinin çıxardığı qərara görə, Britaniya Aİ əsasnaməsinin 50-ci maddəsindən istifadə edərək Brexit-i dayandıra da bilər. Çox güman ki, belə bir addım yalnız Britaniyada yeni referendum keçiriləndən və ya hökumət dəyişəndən sonra baş verə bilər.
Daha bir ehtimal ondan ibarət ola bilər ki, Mey, öz planını yenidən və hətta təkrar-təkrar səsverməyə qoymağa cəhdlər edə bilər.
Heç nə baş verməsə, Brexit müqaviləsiz qüvvəyə minəcək. Mövcud qanuna görə, Britaniya 2019-cu il martın 29-da Aİ-ni tərk etməlidir.
Müqaviləsiz “Brexit”i istəməyən parlament yanvarın 8-də qəbul etdiyi qərarla Maliyyə Nazirliyinin müəyyən vergiləri yığmaq imkanlarını məhdudlaşdırıb. Bu qərar deputatların müqaviləsiz “Brexit”in qarşısını almaq əzminin nümayişi kimi qiymətləndirilir.
Parlamentin hökumətə qarşı ən sərt qərarı isə etimadsızlığın bildirilməsi ola bilər.
Mey dalan vəziyyətindən çıxışı erkən ümumi seçkilərin elan edilməsində də görə bilər, çünki bu yolla o, öz müqaviləsinə seçicilərdən dəstək almış olar. Erkən seçkiləri elan etmək üçün isə baş nazir parlamentdə deputatların üçdə ikisinin dəstəyini qazanmalıdır.
