Türkiyəyə gələn ABŞ prezidentinin milli təhlükəsizlik üzrə müşaviri Con Bolton səfəri gözlənildiyindən qısa sürüb. Baki-xeber.com Türkiyə mediasına istinadən xəbər veri ki, Boltonu səfəri zamanı ABŞ-ın Baş qərargah rəisi Cozef Dunford və Qlobal Koalisiya üzrə xüsusi nümayəndə Ceyms Cefri müşayiət edib.
Prezident Aparatının sözçüsü İbrahim Kalın, MİT başçısının müavini və digər rəsmi şəxslərlə görüşüb. ABŞ prezidentinin müşavirinin hər hansı türk nazirlə görüşü olmayıb.
İbrahim Kalınla Bolton arasında danışıqlar Prezident Sarayında, qapalı qapılar arxasında keçirilib və 2 saat 10 dəqiqə davam edib. Görüşdən sonra isə planlanlaşdırılan mətbuat konfransı ləğv edilib. Türkiyə mətbuatı yazır ki, Ankara Vaşinqtona müraciət edərək Suriyada olan ABŞ bazasının onlara təhvil verilməsini və ya məhv edilməsini istəyib. mənbələrə istinadən bildirilir ki, Türkiyə ABŞ qoşunlarının Suriyadan çıxarılmasından sonra Suriyada olan 22 bazanın kürd qruplaşmalarına təhvil verilməsinin əleyhinədir.
Bolton İbrahim Kalınla görüşdükdən sonra Türkiyəni prezident Rəcəb Tayyib Ərdoğanla görüşmədən tərk edib. Məlumata görə, onun Ərdoğanla görüşmək tələbi rədd edilib.
Türkiyə mətbuatı, prezidentlə görüşmək istəyən Boltonun ABŞ ordusunun Suriyadan çıxarılması üçün kürdlərin təhlükəsizliyinə dair Ankaradan zəmanət istənilməsi ilə bağlı İsrail səfərində səsləndirdiyi fikirlərinə görə, Ərdoğan tərəfindən qəbul edilmədiyini yazıb.
Məsələyə münasibət bildirən Ərdoğan, Boltonun həmsöhbət olacağı şəxsin İbrahim Kalın olduğunu deyib. Ərdoğanın sözçüsü İbrahim Kalın da buna səbəb kimi Boltonun Türkiyə səfəri öncəsi İsraildə verdiyi açıqlamasını göstərib. “Prezidentin Boltonla təsdiqlənmiş bir görüş vədi yox idi. Buna ehtiyac görmədik. Boltonla həmsöhbət olacaq şəxs bəllidir və bunu etiraz kimi dəyərləndirmək doğru deyil. İsraildə səsləndirdiyi fikirləri qəbul etmədiyimizi özünə də söylədim. Bunu ehtiva edən dosyanı da ona verdim” – Kalın deyib.
Boltona iki dosya verdiyini bildirən Kalın dosyalardan birinin YPG/PKK-nın Suriyada işlədiyi cinayətlər və insan hüquqları pozuntuları ilə əlaqəli olduğunu deyib.
Kalın ABŞ heyətilə Amerika əsgərlərinin Suriyadan çəkilmə prosesinin necə olacağı məsələsinin təfərruatlı şəkildə müzakirə olunduğunu bildirib. O qeyd edib ki, geriçəkilmə prosesindən sonra bölgədə necə vəziyyətin yaranacağı, xüsusilə (terror təşkilatı YPG/PKK-ya ABŞ tərəfindən) verilən ağır silahların nə olacağı, oradaki ABŞ hərbi bazalarının və logistik mərkəzlərinin taleyi kimi mövzular da aydınlaşdırılmalıdır. Görüş zamanı bu mövzular ətraflı şəkildə müzakirə edilib.
“Gözləntimiz verilən silahların geri alınmasıdır. Bununla əlaqədar addımlar atdıqlarını söylədilər, ancaq detallar qarşıdan gələn günlərdə ortaya çıxacaq. Biz hər kəslə koordinasiyalı şəkildə işləyərik, amma heç kəsdən icazə almarıq” - Kalın deyib.
Ərdoğan isə Türkiyə parlamentində hakim partiyanın nümayəndələri önündə çıxışı zamanı Boltonun İsrail səfərində səsləndirdiyi fikirlərə sərt reaksiya verib. "Fərat Qalxanı hərəkatı zamanı haqqında əfsanə danışılan İŞİD-i darmadağın edən Türkiyə olub. Bundan sonra Suriyada sürətlə bu bəladan qurtulma dövrü başladı. Boltonun İsraildən verdiyi mesajı bizim qəbul etməyimiz, udmağımız mümkün deyil. Bunlar bu ölkədə mənim kürd vətəndaşımın kim, PKK, YPG-nin kim olduğunu bilmirlər" - deyə Ərdoğan qeyd edib.
O, qeyd edib ki, PKK terror təşkilatı Türkiyənin kürd vətəndaşlarının təmsilçisi ola bilməz: "Birləşmiş Ştatlar bunları kürd qardaşlarımız kimi dəyərləndirirsə, onda bu onların ciddi bir yanlışlıq içərisində olduğunu göstərir. Terrora yeni bir tərif vermisiniz? Əgər terrorçudursa, lazım olanı edəcəyik".
Qeyd edək ki, 2018-ci il dekabrın 24-də ABŞ prezidenti qoşunların Suriyadan çıxarılması haqqında sərəncam imzalayıb. Ağ Ev tərəfindən qoşunların çıxarılması barədə bəyanat verildikdən sonra ABŞ müdafiə naziri Ceyms Mettis və ABŞ-ın İŞİD-lə mübarizə üzrə xüsusi nümayəndəsi Brett Makqerq istefaya gedib.
