ABŞ prezidentinin milli təhlükəsizlik üzrə müşaviri Con Bolton ölkəsinin qoşunlarının Suriyadan çıxarılmasının Türkiyənin “kürd döyüşçülərin” təhlükəsizliyinə zəmanət verməsi və İŞİD-in məhv edilməsindən asılı olduğunu deyib.
Baki-xeber.com xəbər verir ki, Bolton Türkiyəyə çağırış edərək ABŞ-la razılaşdırılmayan və əlaqələndirilməyən hərbi əməliyyatlar keçirməməyə çağırıb. Boltonun sözlərinə görə, Ankaranın addımları nəinki ABŞ qoşunlarına, eləcə də Vaşinqtonun Suriyadakı müttəfiqlərinə təhlükə yaratmamalıdır.
Prezidentin müşaviri onu da bildirib ki, ABŞ qoşunlarının çıxarılması bəyanatı konkret vaxtı nəzərdə tutmur: “Qoşunların çıxarılması qrafiki siyasi qərarlardan asılıdır”.
O qoşunların çıxarılmasının bir neçə ay çəkə biləcəyini də deyib.
Bolton ölkəsinin qoşunlarının Suriyadan çıxarılmasına dair İsrailə zəmanət də verib. Bolton İsrailin baş naziri Binyamin Netanyahu ilə ortaq mətbuat konfransıda, Suriyadakı Amerikan əsgərlərinin çəkilməsinin Vaşinqtonun müttəfiqlərini müdafiəsini təmin edəcəyi ilə müşayiət olunacağını söyləyib.
ABŞ prezidenti Donald Tramp da Birləşmiş Ştatların Suriyadakı qoşunlarının bu ölkədən tezliklə çıxarılacağı barədə məlumatı təkzib edib. Tramp Amerika hərbçilərinin Suriyadan çəkilməsində qərarlı olduqlarını, ancaq qoşunların tezliklə Suriyadan çıxarılacağına dair heç nə demədiyini söyləyib.
ABŞ-ın Suriyadan çəkilmə planına dair açıqlama verən Tramp, prezident olduğu tarixlərdə Suriya və İraqın böyük hissəsinin İŞİD-in nəzarətində olduğunu, ancaq özünün hakimiyyəti dövründə İraqın terrorçulardan tamamilə azad edildiyini, Suriyada isə az sayda terrorçunun qaldığını xatırladaraq deyib ki, artıq Suriyadan çıxırıq, amma heç vaxt çox tez zamanda çıxacağımızı ifadə etmədim. Tramp İŞİD-lə artıq bölgə ölkələrinin döyüşməsinin lazım olduğunu deyib: “Rusiya, İran İŞİD-ə nifrət edir. Türkiyə, bəlkə bizim qədər olmasa da İŞİD-ə nifrət edir”.
Bu açıqlamalardan sonra dünya mediasında ABŞ ordusunun Suriyadan çıxarılıb-çıxarılmayacağı yenidən müzakirə mövzusu olub. Hətta son açıqlamalar Trampın Suriya ilə bağlı fikrini dəyişdirməsi kimi şərh olunur. Bolton açıqlamasında hətta qoşunların çıxarılmasının aylar və ya illər çəkə biləcəyini deyib. Bununla bağlı açıqlama yayan Ağ Ev isə prezidentin qoşunların Suriyadan təhlükəsiz şəkildə çıxarılmasını istədiyini deyib: “Prezident bu məsələ ilə bağlı mövqeyini dəyişməyib və özünün də vurğuladığı kimi, ilk məqsəd əsgərlərimizin və müttəfiqlərimizin təhlükəsizliyini təmin etməkdir. Pentaqon əsgərlərin Suriyadan təhlükəsiz şəkildə çıxarması üçün plan hazırlayacaq”.
Onu da qeyd edək ki, Boltonun terrorçulardan “kürd döyüşçü” kimi bəhs etməsi rəsmi Ankaranın sərt reaksiyasına səbəb olub.
