Cənubi Çin dənizindəki mübahisəli adalar, ABŞ-la ticarət savaşı və Tayvanın gələcək statusu ilə bağlı gərginliklərin artdığı bir vaxtda Çin Xalq Respublikasının sədri Si Cinpin ordu rəhbərliyi ilə təcili toplantı keçirib.
Baki-xeber.com xarici mediaya istinadən xəbər verir ki, Si toplantıda ordu rəhbərliyinə artan risq və təhdidlərə qarşı hər an hazır olmağı tapşırıb. Qeyd edib ki, silahlı qüvvələr yeni dönəmin təhdidlərinə qarşı strateji baxımdan gücləndirilməli və hər an müharibəyə hazır olmalıdır. Si ordu rəhbərliyinə bunun üçün gərəkən tədbirləri görməyi tapşırıb.
Si Cinpin bildirib ki, hazırda dünya heç vaxt görülməmiş böyük dəyişikliklərlə üz-üzədir: “Çinin inkişafı üçün hələ də önəmli bir fürsət var. Silahlı qüvvələrin fövqəladə vəziyyətlərə dərhal cavab verə bilməsi və birgə əməliyyat bacarıqlarını yüksəltmələri üçün yeni tip hərbi qüvvələrini formalaşdırması çox vacibdir”.
Sinin ordu rəhbərliyi ilə keçirdiyi toplantı və bəyanatları, Tayvanla birləşmək və bunun üçün lazım gələrsə güc tətbiq edəcəyinə dair açıqlamasından sonra verib.
Qeyd edək ki, Çin rəhbəri bir neçə gün əvvəl verdiyi bəyanatda Tayvanla birləşmək üçün hərbi gücdən istifadə edilə biləcəyini istisna etməmişdi. Si deyib ki, güc tətbiq etməyəcəyimizə dair söz vermirik, gərəkli addımları atmaq hüququmuz var. O qeyd edib ki, Tayvandakı hər kəs müstəqilliyin böyük bir fəlakət olduğunu anlamalıdır: “Biz dinc yolla yenidən birləşməyimiz üçün əlimizdən gələn hər şeyi edəcəyik. Çünki bu, bütöv Çin xalqının maraqlarına uyğundur. Biz güc istifadəsini də istisna etməyəcəyik və həmin tədbirləri ehtiyatda saxlayacağıq”.
Çin rəhbəri bu bəyanatı ABŞ prezidenti Donald Trampın Tayvanın təhlükəsizliyinin təmin edilməsi ilə bağlı “Asiya təşəbbüsü” qanununu imzalamasından sonra verib.
Çin ordusunun gücləndirilməsinin səbəbi kimi Cənubi Çin dənizindəki mübahisəli adalar, ABŞ-la ticarət savaşı və Tayvanın statusu ilə bağlı artan gərginlik göstərilir.
Ekspertlərə görə, Amerika və Çin arasında Tayvan, Cənubi Çin dənizi kimi məsələlərlə bağlı gərginlik daha da artacaq.
Bu arada, Cin liderinin “Tayvanın müstəqilliyi böyük bir fəlakət olar” bəyanatından sonra ada rəhbərliyi dünya ölkələrinə müraciət edərək yardım istəyib. Tayvan prezidenti Tsai İnq-ven, adada demokratiyanın və həyat tərzinin qorunması üçün digər ölkələrin də üzərinə məsuliyyət düşdüyünü deyib.
Cin liderinin güc tətbiq etməklə bağlı hədələrini xatırladan Tayvan prezidenti deyib: "Ümid edirik ki, beynəlxalq ictimaiyyət bunu ciddiyə alacaq, bizi dəstəkləyəcək, yardım edəcək. Əgər beynəlxalq ictimaiyyət təhlükə ilə üz-üzə olan demokratik bir ölkəyə dəstək verməsə, o zaman “sıradakı ölkə hansıdır” sualı ortaya çıxacaq".
