ABŞ prezidenti Donald Trampın Əfqanıstandakı əsgər sayını yarıya endirmə qərarı verdiyinə dair xəbərlərin yayılmasından az qala iki həftə keçib, ancaq bu mövzuda rəsmi bir təlimat hələ Müdafiə Nazirliyinə (Pentaqon) verilməyib.
Baki-xeber.com xəbər verir ki, Tramp rəhbərliyinin Suriyadan çəkilmə qərarından sonra Əfqanıstandakı 14 mindən çox əsgər sayını da yarıya endirəcəyi xəbərləri rəsmi Vaşinqtonda böyük müzakirələrə səbəb olmuşdu. Ancaq indi ABŞ rəhbərliyinin Əfqanıstanla bağlı hələlik rəsmi bir addım atmadığı məlum olur.
Müdafiə Nazirliyindən Əfqanıstanda qoşun sayını azaltmaqla bağlı hələlik imzalı təlimatın olmadığı deyilib.
Pentaqonun sözçüsü podpolkovnik Kone Faulkner isə bildirib: “Talibanla sülh danışıqları davam edir. Əsgərlərin sayı və statusu ilə əlaqədar bütün variantları qiymətləndiririk”.
Tramp qərar verərsə hansı qüvvələrin geri çəkiləcəyinə dair açıqlama verməyən Pentaqonun sözçüsü
Qeyd edib ki, Əfqanıstan ordusunun manevr qabiliyyəti, hava qüvvələrinin əməliyyat qabiliyyəti mühüm dərəcədə inkişaf edib. Təyyarə və vertolyotların sayı 152-yə yüksəlib. Ölkədə fəaliyyət göstərən terror təşkilatlarına qarşı Əfqanıstan ordusu əhəmiyyətli irəliləyişlər əldə edib. NATO missiyası Əfqanıstan ordusunda 20 min xüsusi təyinatlı qüvvəyə təlim keçib.
Ağ Ev Milli Təhlükəsizlik Şurasının sözçüsü Qarret Marquis də Əfqanıstandakı əsgərlərin bir qisminin geri çəkilməsinə dair hələ rəsmi bir qərarın olmadığını söyləyib: “ABŞ prezidenti Əfqanıstandakı qüvvələrin sayını azaltmaqla bağlı hələlik qərar verməyib və Müdafiə Nazirliyinə Əfqanıstandan qoşunların çıxarılmasını tapşırmayıb".
Xatırladaq ki, əvvəlki ABŞ prezidenti Barak Obama Əfqanıstandan tədricən geriçəkilmə strategiyası ilə ölkədəki əsgər sayını 9800-ə endirmişdi. 2017-ci ilin sonuna qədər ABŞ bu rəqəmi 5500-ə endirmək niyyətində idi. 2016-cı il prezident seçkilərini qazanan Donald Tramp isə çəkilmə prosesini dayandırdı və Pentaqondan Əfqanıstandakı vəziyyətlə bağl hesabatı hazırlamasını istədi. Tramp rəhbərliyi Pentaqonun hesabatı əsasında 2017-ci ilin avqustunda Cənubi Asiya Strategiyasını açıqladı və burada ABŞ-ın Əfqanıstandan çəkilmə prosesinin şərtlərə bağlı olacağını bildirildi. Üstəlik, Tramp Əfqanıstanda ABŞ hərbi qüvvələrinin sayını 9800-dən 14,000-ə qaldırdı.
