Qanlı vətəndaş müharibəsinin yeddinci ilini geridə qoyan Suriyada son vaxtlar diqqət çəkən hadisələr yaşanır. Xüsusilə bu ayın əvvəlində ABŞ prezidenti Donald Tramp Amerika qoşunlarının Suriyadan çıxarılacağını açıqlamasından sonra bölgədə yeni vəziyyət yaranıb.
Baki-xeber.com xəbər verir ki, bir müddət əvvəl Tükiyə ABŞ-ın çəkiləcəyi Suriyanın şimalındakı əraziyə nəzarət edən kürd PKK/YPG qüvvələrinə qarşı hərbi əməliyyatların olacağını elan edib. ABŞ-ın çəkilmə qərarından sonra Tükiyə ordusu ilə qarşı- qarşıya gəlməkdən qorxan PKK/YPG qruplaşması isə Bəşər Əsəd rejimindən dəstək istəyib. Qruplaşma Əsəd rejimini Amerika əsgərlərinin hələlik tərk etmədiyi Mənbic şəhərinə nəzarəti ələ keçirməyə dəvət edib. Əsəd rejimi bu çağırışdan sonra şəhərə girdiyini desə də hələlik bölgədəki ölkələr bunu təsdiqləmirlər.
Suriyada diqqət çəkən başqa bir məsələ isə indiyə kimi Əsəd rejimini devirməyə çalışan qüvvələri dəstəkləyən ərəb dünyasının ABŞ-ın çəkilmə qərarından sonra rejimlə əlaqələri bərpa etmək cəhdləridir. Son vaxtlar Körfəz ölkələri ilə Suriya arasındakı diplomatik danışıqlar xüsusilə diqqət çəkir. Körfəz ölkələri 2011-ci ildə Əsəd rejiminin xalqa qarşı qəddar zülmünə etiraz olaraq Suriyadakı bütün nümayəndələrini bağlamağa qərar vermişdi. Bu günə qədər Əsəd rejiminə açıq şəkildə qarşı çıxan və müxalif qüvvələri dəstəkləyən Körfəz ölkələri, Suriya ordusunun ölkənin böyük bir hissəsinə nəzarəti ələ keçirdikdən sonra Dəməşqlə diplomatik əlaqələri bərpa etmək yolunda addımlar atmağa başlayıblar. Bu sırada son addım atan ölkə isə isə Birləşmiş Ərəb Əmirlikləridir. BƏƏ administrasiyası yeddi ildən sonra Dəməşqdəki səfirliyinin yenidən açıldığını açıqlayıb.
BƏƏ səfirliyinin açılışı ilə yanaşı, Suriya ilə Tunis arasında 2011-ci ildən dayandırılan təyyarə reysləri də bərpa edilib. Suriya rəsmiləri Monastir hava limanında təyyarənin enişini Suriya bayraqları və Əsədin portretləri ilə qarşılayıblar.
Başqa bir Körfəz ölkəsi, Bəhreyn də, Dəməşqdəki səfirliyinin fəaliyyətə başladığını açıqlayıb. Bu qərar, iki ölkənin xarici işlər nazirlərinin sentyabr ayında Nyu Yorkda BMT Baş Assambleyasının iclası çərçivəsində keçirilən görüşündə verilib.
Bir müddət əvvəl isə İraqın Suriyadakı səfiri digər ərəb ölkələrini də Suriya hökuməti ilə münasibətlərini yenidən qurmağa çağırıb. "Suriya ərəb dünyasında vacib strateji mövqeyə sahib, ərəb dünyanın ürəyi olan bir ölkədir. Suriya ərəb ölkələri tərəfindən gözardı edilə bilməz. Bu, bütün ərəb ölkələrinə Dəməşqdə səfirliklərini açmaq üçün bir çağırışdır." - deyə, səfir Saad Məhəmməd qeyd edib.
Ərəb ölkələrinin Əsədlə əlaqələrini bərpa etmək üçün addımlar atmasından sonra, indi bütün diqqətlər 2019-cu ilin mart ayında Tunisdə keçiriləcək Ərəb Birliyi zirvəsinə çevrilib. Suriyanın təşkilata üzvlüyü dayandırılıb, ancaq Tunis prezidenti Essebsi, ölkəsində keçiriləcək zirvə toplantısında Əsədi də görmək istədiyini açıqlayıb. Digər ərəb ölkələrinin də Əsəd rejiminin Ərəb Birliyinə dönməsinə müsbət yanaşdığı bildirilir.
Onu da qeyd edək ki, bu yaxınlarda Sudan prezidenti Ömər Əl Bəşir gözlənilmədən Dəməşqə səfər edib. Sudan prezidenti 2011-ci ildən bu yana Dəməşqə səfər edən ilk ərəb lideridir.
Bütün bunlar isə Bəşər Əsədin Ərəb dünyasına qayıtması kimi qiymətləndirilir.
TAHİR
