ABŞ prezidenti Donald Tramp Birləşmiş Ştatların İraqda yerləşdirilmiş hərbi qüvvələrini ziyarət etmək üçün İraqa gözlənilmədən səfər edib. Baki-xeber.com xarici mediaya istinadən xəbər verir ki, ABŞ prezidentinin təyyarəsi Bağdad yaxınlığındakı Əl-Əsəd hərbi bazasında enib.
“Prezident Tramp və birinci xanım hərbi qüvvələrimiz və yüksək rütbəli rəhbərliyə göstərdikləri xidmətə, nailiyyətlərinə və verdiyi qurbanlara görə təşəkkür etmək və Milad bayramı münasibətilə ən xoş arzularını çatdırmaq üçün Milad gecəsi İraqa səfər ediblər” – deyə, Ağ Evin mətbuat katibi Sara Sanders Twitter sosial şəbəkəsində yazdığı mesajında bildirib.
Bu, prezident Trampın münaqişə zonasına etdiyi ilk səfərdir. ABŞ prezidentinin İraqa gözlənilmədən səfəri onun Birləşmiş Ştatların hərbi qüvvələrinin Suriyadan çıxarılacağını elan etməsindən bir neçə gün sonraya təsadüf edir.
İraqdakı ABŞ əsgərlərilə görüşən Tramp İraqdan çəkilməyi planlaşdırmadığını deyib: “Əgər Suriyada bir şey etmək istəsək İraqdan baza kimi istifadə edərik".
Suriya məsələsinə də toxunan Tramp, Suriyadan çəkilmək üçün hərbçilərin ondan əlavə vaxt istədiyini, amma bunu qəbul etmədiyini deyib.
İŞİD-i ortadan qaldırmaq istəyən prezident Ərdoğanla danışdıq. O və digərləri bunu edəcəklər. Çünki biz onların bölgəsindəyik. Yükü və xərci onların daşıması lazımdır, amma onlar bunu eləmirlər. Amerika Birləşmiş Ştatları dünyaya polislik edə bilməz”
"Ərdoğan, İŞİD-in Suriyadakı qalıntılarını bitirmək istəyir və bunu bacaracaq" deyə Tramp bildirib.
Tramp hakimiyyətə gəldiyi vaxtdan ABŞ-ın münaqişə zonalarında yerləşdirilmiş hərbi qüvvələrini ziyarət etmədiyinə görə dəfələrlə tənqidlərə məruz qalmışdı.
Hazırda İraqda hərbi əməliyyatlar aparılmasa da, ABŞ hərbçiləri İslam Dövləti qrupuna qarşı mübarizə aparan İraq hərbi qüvvələrinə təlim verir.
