Hollandiya İranın Haaqadakı səfirini etirazçıların edamı ilə bağlı narahatlığını bildirmək üçün Xarici İşlər Nazirliyinə çağıracaq.
Bu barədə Hollandiyanın xarici işlər naziri Vopke Hukstra "Twitter" səhifəsində yazıb.
"Nümayişçilərin edam edilməsi məni dəhşətə gətirir" – deyən nazir İranın Haaqadakı səfiri Əlirza Kazemi Abadini Xarici İşlər Nazirliyinə dəvət edəcəyini bildirib.
Hukstra, Mahsa Emini etirazçılarının edamları ilə bağlı narahatlıqlarını səfir Abadiyə çatdıracağını ifadə edib: "Digər Avropa Birliyi (AB) ölkələrini də eyni addımı atmağa dəvət edirəm".
AB-nin İrana daha sərt cavab verməsi gərəkdiyini deyən Hukstra, İrana qarşı 4-cü insan haqları sanksiya paketinin növbəti AB Xarici işlər nazirləri toplantısında müzakirə edilmək üçün hazırlandığını ifadə edib.
Dekabrda da Hollandiya İranın Haaqadakı səfirini oxşar səbəblərlə Xarici İşlər Nazirliyinə çağırmışdı.
İsveçrə də İranda nümayişlər zamanı Kerac şəhərində "bir təhlükəsizlik əməkdaşını öldürmək" ittihamı ilə edama məhkum edilən Məhəmməd Mehdi Keremi və Seyid Məhəmməd Hüseyninin hökmlərinin icrasına sərt reaksiya verib.
İsveçrə Xarici İşlər Nazirliyinin rəsmisi Livia Leu Twitter hesabında yazıb: “İsveçrə Xarici İşlər Nazirliyi Məhəmməd Mehdi Keremi və Seyid Məhəmməd Hüseyninin İrandakı etirazlarla əlaqəsi səbəbi ilə edam edilməsini qətiyyətlə pisləyir".
Hər yerdə və hər şəraitdə ölüm hökmünün əleyhinə olduqlarını qeyd edən Leu, İranın ölkədəki nümayişlərə sərt müdaxiləsini pisləyib.
Qeyd edək ki, 2022-ci il sentyabrın 13-də Tehranda "əxlaq polisi" kimi tanınan İrşad patrulları tərəfindən saxlandıqdan sonra xəstəxanaya aparılan 22 yaşlı Mahsa Emininin sentyabrın 16-da vəfat etməsi ölkə hökumətinə qarşı etirazlara səbəb olub.
Norveç mərkəzli İran İnsan Haqları Təşkilatı 28 dekabr 2022-ci il tarixli hesabatında Eminin ölümündən sonra başlayan küçə nümayişlərinə təhlükəsizlik qüvvələrinin müdaxiləsi nəticəsində 469 etirazçının öldüyünü bildirib. İran mətbuatı isə 70-ə yaxın təhlükəsizlik işçisinin öldüyünü yazır.
Ölkədə 4 aya yaxındır davam edən nümayişlərlə bağlı 10-dan çox adam edam cəzasına məhkum edilib, onlardan 4-ü edam edilib. Ölüm hökmlərinin bəziləri Ali Məhkəmə tərəfindən ləğv edilib.
Tahir TAĞIYEV
