Rusiya Prezidenti Vladimir Putin Ukraynada təmas xətti boyunca 6 yanvar, Moskva vaxtı ilə saat 12:00-dan 7 yanvar saat 00:00-dək atəşkəs elan edilməsi barədə müdafiə naziri Sergey Şoyquya təlimat verib.
Bu barədə Kremlin mətbuat xidməti məlumat yayıb.
Bundan öncə Moskva və Bütün Rusun Partiarxı Kirill Milad bayramı ilə bağlı 6-7 yanvar tarixlərində Ukraynada atəşkəs elan edilməsi üçün çağırış etmişdi.
ABŞ Prezidenti Co Bayden rusiyalı həmkarı Vladimir Putinin Ukraynada 36 saatlıq atəşkəs qərarına cavab vermək istəməyib.
Ağ Ev rəhbəri Putinin qərarının özlərinə sərf etdiyini bildirib:
"Putinin dediklərinə cavab vermək istəmirəm. Düşünürəm ki, o, bir az oksigen almağa çalışır".
Ukrayna tərəfi Rusiyanın təmas xətti boyunca atəşkəs elan etməsinə mənfi münasibət bildirib. Bu barədə Ukrayna prezidentinin aparat rəhbərinin müşaviri Mixail Podolyak məlumat verib: “Rusiya işğal etdiyi əraziləri tərk etməlidir. Yalnız bundan sonra müvəqqəti atəşkəs başlayacaq”.
Ukraynanın xarici işlər naziri Dmitri Kuleba Rusiya Prezidenti Vladimir Putinin atəşkəslə bağlı qərarına münasibət bildirib. Bu barədə o, tviter hesabında bunları yazıb:
“Ukrayna Prezidenti Volodimir Zelenski aydın on addımlıq sülh formulu təklif etdi. Rusiyanın hazırkı “birtərəfli atəşkəs”i ciddi qəbul edilə bilməz və ciddi qəbul edilməməlidir”,
Görünən budur ki, sanki müharibənin dayandırılması ABŞ-a və Ukraynaya sərf etmir. Bu atəşkəs müharibənin bitməsi ilə nəticələnə bilərmi, yoxsa yenidən pozulacaq?
Hərbi-siyasi ekspert ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki,
müharibənin bitməsi ilə bağlı təşəbbüslər çox olub: “ Əvvəl bu təşəbbüslə Türkiyə prezidenti Ərdoğan aktiv çıxış edirdi. Ötən il Türkiyə prezidenti Rəcəb Tayyib Ərdoğan Rusiya prezidenti Vladimir Putin və Ukrayna prezidenti Volodomir Zelenskiyə belə təklifləri dəfələrlə edib.
Ərdoğan müharibənin dayandırılması üçün var gücüylə çalışdı. Hətta Putinə də təklif etdi ki, birtərəfli qaydada atəşkəs elan etsin. Putin müharibənin ölkəsi üçün yorucu hala gəldiyini anlayaraq Ərdoğanın çağırışına müsbət reaksiya verərək atəşkəsə və Kiyevlə dialoqa meylli olduğunu göstərdi. Ancaq Putin eyni zamanda Kiyevin Krımın və Ukraynanın 4 bölgəsinin Rusiyaya “birləşməsi reallığını” qəbul etməsini istədi. Ukrayna Rusiyanın belə mövqedə olduğunu bilir. Belə olan halda nə atəşkəs, nə də dialoq faydalı olmur.
Kiyev işğalı uzadacaq atəşkəsin Ukraynanın ərazi bütövlüyü üçün təhlükə yaradacağından ehtiyat edir. Çünki uzun atəşkəsdən sonra yenidən Rusiya ilə müharibəyə başlamaq çətin olacaq, atəşkəs dövründə isə Rusiya işğal etdiyi ərazilərdə möhkəmlənəcək. Azərbaycan nümunəsində də gördük ki, 26 illik atəşkəs işğalın uzanmasına şərait yaratdı”.
Ekspertin sözlərinə görə, ABŞ və Qərb müharibənin tezliklə bitməsində maraqlı deyil: “Onlar istəyir ki, Rusiya üzücü müharibədə daha da zəifləsin. Buna görə də, Putinin bu təşəbbüsünü bir qədər ciddi qəbul etmirlər. Putin də, dini amili əsas gətirərək, əslində nəbz yoxlayır. Bir daha əmin oldu ki, müharibə uzun sürəcək. Qarşı tərəf Rusiyanın Ukrayna ərazisini tam tərk etməsini istəyir. Rusiya isə mövcud durumu saxlamaqla atəşkəsə nail olmağa çalışır. Görünən budur ki, ABŞ və Qərb Ukraynaya da lazımi yardımı göstərmir ki, müharibə tez bitməsin. Bu üsulla onlar həm də Rusiyanı nəzarətdə saxlayırlar. Ona təzyiq rıçaqı əldə edirlər”.
Məhəmmədəli QƏRİBLİ
