Tehrandakı molla rejiminin siyasi rəhbəri ilk dəfə olaraq İranda qadınların hicabsız yaşaya və gəzib-dolaşa biləcəklərini açıq şəkildə ifadə edib.
Ayətullah Xamneyinin 4 yanvar tarixli çıxışından sitat: "Hicab İslamdan doğan zəruri şəri məsələdir və şəriətin vacib buyurduğu hökmdür. Hicabın vacibliyinə dair heç bir şəkk və şübhə yoxdur. Bunu hamı bilməlidir ki, hicab şəriətin vacib buyurduğu əmrdir və buna riayət edilməlidir. Amma hicab taxmayanları dinsizlikdə və inqilab düşməni olmaqda ittiham etmək olmaz".
Bu, İranda son zamanlar baş qaldıran iğtişaşların qarşısında molla rejiminin geri addım atmasının ifadəsi sayıla bilərmi?
İlahiyyatçı Tural İrfan “Bakı-Xəbər”ə açıqlamasında bildirdi ki, Xamneynin çıxışında həmin bu məsələni qeyd etməsi məhz geri addım atmaları deməkdir: “İlk öncə bunu belə qiymətləndirmək olar. Həqiqətən də bir neçə aydır İranda olan bu iğtişaşlar, üsyanlar hakimiyyəti vahiməyə salıb. Və onlar Allaha inandıqlarını iddia etsələr də, hakimiyyəti saxlamaq üçün əlacları olsa şeytandan belə umid uma bilərlər. Ona görə də, Xamneynin bu sözündə o təsdiq olunur ki, İslam onlar üçün formal xarakter daşıyır. Biz bunu həmişə demişik. İran hakimiyyəti, İran rejimi üçün adı İslam olsa da, o İslam deyil, formal bir xarakter daşıyır. İslamı hörmətdən salmaq üçün qarşılarına məqsəd qoyublar. İslamın özəyini təşkil edən türklərə qarşı düşmənçilik etmək İslama düşmənçilik etmək deməkdir. Bu da göz qabağındadır. Ona görə Xamneyinin yeri daralır. Və bu baxımdan da güya humanist addımlar atmağa cəhd edir. Mən düşünürəm ki, bunun heç bir xeyri olmayacaq”.
Ekspertin sözlərinə görə, İranda insanları narahat edən təkcə hicab məsələsi deyil: “ Orada çox problemlər var. Qurulmuş sistemdən narazıdır insanlar. Sosial vəziyyətdən, dünya ölkələri, digər müsəlmən ölkələrlə İranın düşmən münasibətindən narazıdırlar. Dünyanın aparıcı dövlətləri ilə, bir çox qonşu ölkələrlə, xüsusən Azərbaycanla bu cür düşmənçilik orada yaşayan çoxsaylı soydaşlarımızı ciddi narahat edir. Yəni hicabsız gəzməyə icazə versələr belə, mən düşünmürəm ki, orda vəziyyət sakitləşəcək. O baxımdan da, Xamneynin bu açıqlaması qorxu, vahimə hisslərindən yaranan bir məsələdir. Bu iğtişaşlar davam etdikcə hakimiyyətin tələbi ilə İslamın aradan aparılmasına da razı olarlar. O qurluşun mayasında, demək olar ki, İslam yoxdur. Bu maya birbaşa Qərbin planları ilə, fars şovinizmin mayası ilə tutulub. Ona görə də onlar hər cür islahat adı ilə hər cür murdar yola getməyə razı olarlar. Bütün bunları da nəzərə alsaq, Xamneynin və digərlərinin bu ifadələri təbiidir. İrana bağlı bəzi təşkilatların Azərbaycana və digər ölkələrə hərbi güc nümayiş etdirməsi də onların hakimiyyətinin laxlamasından xəbər verir. Mən böyük əminliklə deyirəm ki, İran əsla, Azərbaycan da daxil olmaqla, heç bir ölkəyə bir daş atacaq qüdrətdə deyil. Məsələn Suriyada, Liviyada, İraqda Rusiya və böyük başqa himayədarlarına arxalanaraq müəyyən terror aktlarında, Suriyada müsəlmanların qətlə yetirilməsində aktiv iştirak etdi. Amma təkbaşına qalanda heç bir şeyə qadir deyil. Çünki molla hakimiyyəti özünün yanlış yolda olduğunu və nə vaxtsa bunun sübut olunacağını, ədalət məhkəməsi qarşısında mühakimə olunacaqlarını bilir. Mən hesab edirəm ki, bu iğtişaşlar davam edərsə, 6-7 ay ərzində artıq İran hakimiyyətinin xalqın istəyini yerinə yetirdiyini görə bilərik. Çünki İran hakimiyyətinin qalmasında maraqlı olan Fransa kimi, Amerikanın daxilində də bəzi qüvvələr var və 1979-cu ildə bu hakimiyyəti quranlar imkan verməyəcək ki, o hakimiyyət tamamilə getsin. Çünki sünni-şiə balansı pozula bilər. Dünyada Amerika, Qərb, xüsusən də Fransa o dövləti o dövrdə sünni müsəlmanlara qarşı rəqabət olsun deyə yaratdılar. Sünni dövlətlər var: Səudiyyə, Pakistan, Əfqanıstan və başqaları. Amma şiə dövləti yoxdur. Yəni balansı qorumaq lazımdır ki, bir bütünlük yaranmasın. Müsəlmanlar birləşib xaç dünyasına qarşı, başqalarına qarşı güc nümayiş etdirərlər. Ona görə də, lazım gələndə müsəlmanların arasını vurub bir-birinə qırdırmaq, bir-birindən ehtiyat tədbirləri gördürmək üçün məsələlərə bu cür əl atırlar. Bu baxımdan da İranın gələcəyi yoxdur. Rejim dəyişikliyi olmasa belə, rejimi yalnız Xamneynin dediyi kimi, xalqın iradəsini həyata keçirməklə formalaşdıra bilərlər”.
Məhəmmədəli QƏRİBLİ
