Böyük Britaniyanın aparıcı qəzetlərindən olan “The Telegraph” hökumətin İran İslam İnqilabı Keşikçiləri Korpusunu (SEPAH) terror təşkilatı elan etməyi planlaşdırdığını iddia edib. Hətta bildirilib ki, qərar həftələr ərzində açıqlana bilər.
"Teleqraf" İngiltərədəki mənbələrə istinadən yazır ki, təhlükəsizlik üzrə dövlət katibi Tom Tugendhat və daxili işlər naziri Suella Braverman da bu qərarı dəstəkləyir. Üstəlik, İngiltərənin bu qərarı bir neçə həftə ərzində açıqlayacağı da xəbərlərdə bildirilib. “Teleqraf” onu da bildirir ki, hökumət aylardır kəşfiyyat orqanları ilə birlikdə SEPAH-a qarşı bu addımı müzakirə edir.
Böyük Britaniya İran İslam İnqilabı Keşikçiləri Korpusunu terror təşkilatı elan edərsə, onlarla danışıqlarında iştirak etmək və fəaliyyətinə dəstək vermək cinayət sayılacaq. Bu qərarın İran rejimi ilə bloklanmış nüvə danışıqlarına da mənfi təsir edəcəyi bildirilir.
“Teleqraf” İngiltərənin müttəfiqləri olan ABŞ və Kanadanın da İnqilab Keşikçilərinə qarşı addımlar atdığını xatırladıb.
Xatırladaq ki, ABŞ-ın keçmiş prezidenti Donald Tramp 2019-cu ilin aprelində SEEPAH-ı xarici terror təşkilatları siyahısına salmışdı. Kanada isə İnqilab Keşikçilərini birbaşa terror təşkilatı elan etməmiş, oktyabr ayında təşkilatdan 10 min nəfərin ölkəyə girişini qadağan etmişdi.
Böyük Britaniyanın daxili kəşfiyyat agentliyi MI5-in baş icraçı direktoru Ken Makkallum noyabr ayında verdiyi açıqlamada İran kəşfiyyatının təhdid olaraq gördükləri iranlı Britaniya vətəndaşlarını qaçırıb öldürmək üçün ən azı 10 cəhd etdiyini deyib. Makkallum bildirib ki, İran təcavüzkar kəşfiyyat xidmətləri vasitəsilə Birləşmiş Krallıq üçün birbaşa təhlükə yaradır.
İnqilab Keşikçiləri isə Mahsa Amini etirazlarına rəhbərlik etdikləri və Böyük Britaniya adından fəaliyyət göstərdikləri səbəbi ilə dekabr ayında İrandan qaçmağa cəhd edən 7 nəfəri saxladıqlarını açıqlamışdı. Bundan sonra Britaniya parlamentinin Xarici Əlaqələr Komitəsinin sədri Alisiya Kirns İrandakı Britaniya vətəndaşlarını bu ölkəni tərk etməyə çağırıb.
Tahir TAĞIYEV
