Mollakratiya rejimi əhaliyə qarşı amansız davrandıqca və insanların hüquq və azadlıqlarını boğmağa çalışdıqca, onlara qarşı repressiya maşınını işə saldıqca öz mahiyyətini ortaya qoyur.
Reallıq bundan ibarətdir ki, mollalar bütün resursları vətəndaşlara qarşı səfərbər edib onları yollarından, haqlı mübarizəsindən qaytarmağa çalışır. Lakin rejim 90 günə yaxındır ki, insanların mübarizə, azadlıq əzimi sındıra bilmir. Rəsmi Tehran insanlara nə qədər güc tətbiq edirsə, insanlar da o qədər inadkarlıqla mübarizələrini davam etdirirlər. Camaat elə üsullara əl atır ki, buna mollalar özləri də məəttəl qalır. Məsələn, kütləvi olaraq öz əmanətlərini banklardan çəkirlər.
“Azad İran” Telegram kanalında yayılan məlumata görə, əmanətçilər öz pullarını İran banklarından çıxarırlar. Onlardan biri bildirib ki, pullar bankda qalarsa, xalqı əzmək üçün istifadə ediləcək, bu səbəbdən də pullarını çəkirlər.
Kanalın məlumatına görə, o, bankdan çıxardığı pulları düzərək, “Ölüm olsun Xamneyiyə” şüarını yazıb.
“Xalqın əmanətləri banklardan çıxarması İran iqtisadiyyatına güclü zərbə vuracaq”
İSBAM sədri Samir Adıgözəlli “Bakı-Xəbər”ə bildirdi ki, sözügedən hadisəni o da izləyib: “Əmanətçilərin bu addımı Tehran rejiminə qarşı unikal mübarizə üsuludur. Xalq rejimə qarşı birləşib. Əlbəttə, el bir olsa zərbi kərən sındırar. Yəni el birliyi, əməl birliyi ilə çox şeylərə nail olmaq olur. Xalqın gücü qarşısında dayanmaq çətindir. Tehran rejimi kimi rejimlər xalqın nifrəti qarşısında qalıb və insanların öz pullarını banklardan çıxarması rejimə qarşı nifrətlərinin son həddə olduğunu göstərir. Xalq rejimə nifrət edir. Xalq və rejim bir-birinə qarşıdır. Ona görə də, Tehranda bu cür addımların atılması bir az da dərinləşəcək”. S.Adıgözəlli vurğulayır ki, onsuz da bu ölkənin iqtisadiyyatı dağılmaq həddinə gəlib çatıb və əhalinin davranışı bu sahədə daha ciddi böhranlar yaradacaq. “Xalqın əmanətləri banklardan çıxarması İran iqtisadiyyatına güclü zərbə vuracaq. İnsanların molla rejiminə inamı, etimadı qalmayıb və bilir ki, onların da vəsaitlərindən özlərinə qarşı zorakılıq hallarında istifadə ediləcək, yaxud edilir. Sözsüz ki, “bu pullarla xalqı əzəcəklər” kimi etirazlarla molla rejiminə qarşı çıxmaları artıq bu ölkədə sonun başlanğıcıdır. Orada çox ciddi proseslər müşahidə olunur”-deyə ekspert bildirdi.
Mərkəz sədrinin şərhindən belə qənaətə gəldik ki, əmanətçilərn bu addımı molla rejiminə qarşı ciddi təpkidir, mollaların xalqa qarşı işlətdiyi qanlı cinayətlərə etirazdır. Onu da deyək ki, bankların boşalması bu ölkənin onsuz da ayaq üstə güclə dayanan iqtisadiyyatına da ciddi zərbədir. Əlbəttə, ehtimal ki, biz bu zərbənin təsirini yaxın vaxtlarda daha dərindən müşahidə edəcəyik.
İradə SARIYEVA
