ABŞ Ukraynada müharibəni daha da gərginləşdirə biləcək qərar verə bilər. ABŞ mediası yazır ki, Vaşinqton Ukraynaya “Patriot” raketdən müdafiə sistemi göndərməyə hazırlaşır.
Beynəlxalq agentliklər isə “Patriot”ların Ukraynaya göndərilməsi planının son mərhələyə çatdığını və qərarın cümə axşamı elan oluna biləcəyini bildirirlər.
“The New York Times” qeyd edib ki, adı açıqlanmayan rəsmiləri ABŞ-ın müdafiə naziri Lloyd Ostinin hazırda başqa ölkədə olan “Patriot” batareyasının Ukraynaya göndərilməsi ilə bağlı qərarı bu həftə təsdiq edə biləcəyini bildiriblər.
İddialara görə, “Patriot” sistemi göndərilməmişdən əvvəl Ukrayna qüvvələri Almaniyada təlim keçəcəklər. Kiçik hava hücumundan müdafiə sistemlərindən fərqli olaraq, “Patriot” raket batareyaları daha böyük heyət tələb edir. “Patriot”ları düzgün idarə etmək üçün 90 əsgər lazımdır. Tək raketləri işə salmaq üçün üç əsgərə ehtiyac var.
Hərbi ekspertlər deyirlər ki, çox mürəkkəb sistem olan “Patriot”lardan istifadə etmək üçün tələb olunan təlim aylar çəkə bilər.
“CNN International” yazıb ki, təsdiq olunarsa, Ukraynaya nə qədər buraxılış qurğusu göndəriləcəyi məlum deyil, lakin adi “Patriot” batareyasında hər biri atılmağa hazır dörd raket daşıyan səkkiz buraxılış qurğusu var.
Rusiyanın “Patriot” raketlərinə sərt reaksiya verəcəyi gözlənilir, ilkin reaksiyalar da bunu təsdiqləyir. Putinin sözçüsü Peskov hava hücumundan müdafiə sistemlərinin Rusiya ordusu üçün qanuni hədəf olacağını bəyan edib. Sözügedən reaksiya “Patriot”ların ruslar tərəfindən vurulacağını elan edən ilk rəsmi açıqlamadır.
Bundan əvvəl Putinə yaxınlığı ilə tanınan Rusiyanın keçmiş lideri Dmitri Medvedev də ABŞ və NATO-ya açıq xəbərdarlıq etmişdi.
Qeyde edək ki, “Patriot” raketdən müdafiə sistemi ABŞ-da ən effektiv hava hücumundan müdafiə sistemi hesab olunur. Ekspertlərin fikrincə “Patriot” batareyaları Ukraynanı Rusiya raket və dronlarından qorumaqda fərq yarada bilər. “The New York Times” da “Patriot” sisteminin Rusiyanın ballistik raketləri üzərində heç bir raketdən müdafiə sisteminin olmadığı qədər təsirli ola biləcəyini və əlavə hədəflərin daha sürətli vurula biləcəyini qeyd edib.
Ukraynadakı müharibəni yaxından izləyən rusiyalı ekspert Rob Li “Patriot”ların xüsusilə S-300 və Buk-M1-lər üçün həlledici olacağını deyir. Linin sözlərinə görə, “Patriot”ların şəhərlərdə yerləşdirilməsindən sonra Rusiya raketlərinin qarşısını almaq üçün istifadə edilən S-300 və Buk-M1-lər cəbhə xəttinə göndərilə bilər. S-300 və “Buk”ların cəbhəyə gəlməsi isə Rusiya hava sistemlərinin daha da geri çəkilməsi demək olacaq.
Müşahidəçilər isə hesab edir ki, ABŞ-ın “Patriot” addımı Ukrayna müharibəsində münaqişəni daha da gərginləşdirə bilər.
Tahir TAĞIYEV
