İranda Muhsin Şikari adlı nümayişçi noyabrın 20-də Tehrandakı etirazlar zamanı ittiham edilərək İnqilab Məhkəməsi tərəfindən edam cəzasına məhkum olunub. O, “odlu silah gəzdirmək, yolu bağlamaq, nəqliyyat vasitələrini saxlamaq, təhlükəsizliyi pozmaq, Bəsic qüvvələri ilə döyüşmək, mühafizəçini yaralamaq, dövlətə qarşı müharibə aparmaq” ittihamları ilə edam edilib.
Muhsin Şikari İranda Mahsa Əmininin ölümündən sonra başlayan etirazlarla bağlı edam edilən ilk nümayişçidir. İranda artıq 3 aya yaxındır davam edən nümayişlərlə bağlı indiyədək 11 nəfər barəsində ölüm hökmü çıxarılıb. Edam cəzasına məhkum edilmiş şəxslərin bəzilərinin hökmləri təsdiqlənib və onların tezliklə icrasına başlanacağı bildirilib. İran Cinayət Məcəlləsinə əsasən, “ictimai asayişi pozmaq, yer üzündə fitnə-fəsad törətmək və dövlətə qarşı müharibə aparmaq” kimi cinayətləri törədənlər ölüm cəzası ilə mühakimə olunur.
Qeyd edək ki, son günlər, BMT başda olmaqla, beynəlxalq təşkilatlardan, o cümlədən insan haqları təşkilatlarından, dünya ölkələrindən İran rejiminin ünvanına ard-arda çağırışlar, tələblər səsləndirilir. İlk növbədə etirazçılar barədə ölüm hökmünün ləğvi istənilir.
Maraqlıdır, bu təzyiqlər işə yarayacaqmı?
“Baş verən proseslər, rejimin daha da kəskinləşməsi, vətəndaşların daha çox sıxışdırılması nəticə etibarı ilə Güney Azərbaycanın azadlığına səbəb olacaq”
Siyasi şərhçi Azər Həsrət “Bakı-Xəbər”ə açıqlamasında bildirdi ki, İranda baş verən proseslər fars-molla rejimini bir qədər ağıllandırmalı idi. Onlar ərəb coğrafiyasında baş verən qanlı inqilablardan nəticə çıxarmalı idilər: “Zorakılıqla nəticə əldə olunmur, xalq etirazlarının qarşısında dayanmaq olmaz. Az-çox siyasətdən anlayışları olsa idi bu cür sərt addımlar atmazdılar. Bu ölkə vətəndaşların azad yaşayışını, onların hüquq və azadlıqlarını təmin etmək əvəzinə şəxsi mənafelərini düşünür. Təəssüf ki, bu ölkə hələ də orta əsr təfəkkürü ilə yaşayır”.
Həmsöhbətimizin sözlərinə görə, İran rejimi bu günlərdə bir gənci edam etdi və bir neçə şəxsin edam ediləcəyi də bəyan edilib. Fars-molla rejimi bununla insanları qorxutmaq istəyir: “Ancaq İran bu mərhələdən qurtula bilməyəcək. Bu ölkə dağılacaq və onun yerində Güney Azərbaycan Cumhuriyyəti yaranacaq. Cənubi azərbaycanlılar öz müstəqilliyinə qovuşacaq. Onların müstəqil olmaq təbii haqlarıdır. Fars-molla rejimi özünün son əməllərilə bu haqqın gerçəkləşməsinə şərait yaradır. Baş verən proseslər, rejimin daha da kəskinləşməsi, vətəndaşların daha çox sıxışdırılması nəticə etibarı ilə Güney Azərbaycanın azadlığına səbəb olacaq. Həmçinin, dünyada “xalqlar həbsxanası” kimi tanınan İranın digər azadlıqsevər xalqları da azadlıqlarına qovuşacaq. Fars-molla rejiminin bu prosesdən qurtuluşu görünmür və onlar nə qədər tez bunun fərqinə varsalar, öz canlarını xilas edə bilərlər. Ancaq rejimi, hakimiyyəti xilas etmək mümkün olan deyil”.
Günel CƏLİLOVA
