Elşən Mustafayev: “Qazaxıstanın daha da qüdrətli ölkəyə çevriləcəyinə qəti şübhəm yoxdur”
Qazaxıstanın Mərkəzi Seçki Komissiyası (MSK) ölkədə keçirilən növbədənkənar prezident seçkilərinin yekun nəticəsini açıqlayıb. Kasım-Jomart Tokayev səslərin 81,31%-ni toplayaraq yenidən ölkənin Prezidenti seçilib.
“Beləliklə, dünən açıqlanan ilkin nəticələr təsdiq olunub”, - deyə Qazaxıstan MSK-nın rəhbəri Nurlan Abdirov qeyd edib.
Məlumata görə, Tokayevin andiçmə mərasimi noyabrın 26-sı baş tutacaq.
Qeyd edək ki, Tokayev 2019-cu ildə keçirilən seçkilərdə səslərin 70,96%-ni toplamışdı.
ATƏT DTİHB missiyasının rəhbəri Urşula Qatsek bəyan edib ki, növbədənkənar prezident seçkiləri rəqabətdən kənar siyasi şəraitdə keçirilib. Qazaxıstan Xarici İşlər Nazirliyi qeyd edib ki, bu bəyanat obyektivlikdən kənardır və indiyədək respublikanın dəstəyini qazanmış təşkilatın mühüm institutu kimi DTİHB-nin effektivliyini şübhə altına alır. Qazaxıstan hakimiyyəti ATƏT-in Demokratik Təsisatlar və İnsan Haqları Bürosunun respublikada keçirilən prezident seçkilərini tənqidi nəzərdən keçirdikdən sonra bu qurumla qarşılıqlı fəaliyyətə daha çox diqqət yetirəcək. Bu barədə jurnalistlərə Qazaxıstan xarici işlər nazirinin müavini Roman Vasilenko bildirib.
Qazaxıstanın keçmiş prezidenti Nursultan Nazarbayev hazırkı Prezident Kasım-Jomart Tokayevi prezident seçkilərində qələbə qazanması münasibətilə ilk təbrik edən olub.
Bu barədə sabiq dövlət başçısının mətbuat xidməti məlumat yayıb:
“Qazaxıstan Respublikasında keçirilən prezident seçkilərində inamlı qələbəniz münasibətilə sizi ürəkdən təbrik edirəm! Bu qələbə sizin dövlət başçısı kimi yüksək nüfuzunuza dəlalət edir və xalqın apardığınız genişmiqyaslı islahatlar və yeni təşəbbüslərə sarsılmaz inamının danılmaz sübutu, eləcə də dövlətimizin müstəqilliyinin təhlükə altında olduğu kritik saatlarda göstərdiyiniz mətanət, qətiyyət və müdrikliyin etirafıdır. Sizə hər zaman xalqın bütöv dəstəyi və hörmətindən istifadə etməyi arzulayıram”.
Qazaxıstanın bundan sonrakı dönəmində ciddi islahatlar gözləməyə dəyərmi?
Politoliq Elşən Mustafayev “Bakı-Xəbər”ə açıqlamasında bildirdi ki, 20 mart 2019-cu ildə vəzifəsinin icrasına başlamış Prezident Qasım-Comərd Tokayev “eşidən dövlət” konsepsiyası çərçivəsində vətəndaş cəmiyyəti ilə demokratikləşməyə və qarşılıqlı fəaliyyətə yönəlmiş yeni islahatlara başlayıb: “Bunun üçün dövlət planlaşdırma sisteminin, sosial sahənin yenidən formalaşdırılması, iqtisadiyyatın və biznes tənzimlənməsinin şaxələndirilməsi, məhkəmə və hüquq-mühafizə sistemlərinin islahatı, dövlət idarəçiliyi və dövlət xidmətlərinin yenidən qurulması məqsədi ilə islahatlar üzrə Ali Şura və Strateji Planlaşdırma və İslahatlar Agentliyi yaradılıb.
Prezident Tokayev tərəfindən islahatların aparılması göstərir ki, Nursultan Nazarbayevin 30 ilə yaxın rəhbərliyi nəticəsində Qazaxıstan beynəlxalq cəmiyyət tərəfindən tanınmış və bütün zəruri atributları olan suveren dövlət kimi formalaşsa da, hələ də respublikanın gələcək inkişafını məhdudlaşdıran bir sıra problemli amillər mövcuddur. Seçkilərin nəticələri və təqdim olunan seçkiqabağı platformalar göstərdi ki, dövlətin strateji oriyentasiyası sosialyönümlü mövqeyə malikdir.
Qazaxıstanda Nazarbayevin dönəmində də irimiqyaslı iqtisadi və siyasi islahatlar aparılıb və bu islahatlar ölkəyə 2012-ci ildə dünyanın 50 ən rəqabətqabiliyyətli ölkəsi qrupuna daxil olmağa imkan verib. Bununla bərabər, ölkə iqtisadiyyatına 320 milyard dollardan çox birbaşa xarici investisiya yatırılıb. Onu da qeyd etmək lazımdır ki, Qazaxıstan biznes qurmaq və idarə etməyin asanlığına görə “Doing business” reytinqində 25-ci yerdədir. Əlavə olaraq, Qazaxıstanın da Azərbaycan kimi qlobal əhəmiyyətli nəqliyyat-logistika qovşağına çevrilməsi onun iqtisadi potensialını böyük ölçüdə artırır. Bu seçkidən sonra Tokayev daha geniş islahatlar sparacaq. Qazaxıstanın daha da qüdrətli ölkəyə çevriləcəyinə qəti şübhəm yoxdur”.
Məhəmmədəli QƏRİBLİ
