İngilis baş nazir bir yandan Ukraynaya silah verir, digər yandan Zelenskini danışıqlara təşviq edir?..

Abutalıb Səmədov: “Nə Ukrayna Rusiyanın işğal etdiyi əraziləri güzəştə gedə bilər, nə də Moskva 1991-ci ildəki sərhədlərə çəkilmək barədə düşünür”

img

Məlum olduğu kimi,  Böyük Britaniyanın baş naziri Rişi Sunak Kiyevə səfər edib və Ukrayna prezidenti Vladimir Zelenski ilə danışıqlar aparıb. Ukrayna prezidenti bildirib ki, Böyük Britaniyanın baş naziri ilə danışıqlar zamanı qlobal təhlükəsizlik məsələləri müzakirə olunub, həmçinin Böyük Britaniya və Ukraynanın birlikdə daha güclü olması və istənilən nəticəni əldə edə biləcəkləri barədə fikirlər səsləndirilib.

Görüşün sonunda Sunak Kiyevə 120 zenit-artilleriya qurğusu, həmçinin pilotsuz uçuş aparatları ilə mübarizə vasitələri ilə təmin ediləcəyini vəd edib.

Hərbi ekspert Yakov Kedmi Telegram kanalında yazır ki, Böyük Britaniyanın baş naziri Rişi Sunakın Ukraynaya verdiyi bütün ictimai hədiyyələr səfərin əsl məqsədini gizlədən pərdə olub:

"Böyük Britaniyanın baş naziri Zelenski ilə görüşdə onu Kremllə sülh danışıqlarını bərpa etməyə inandırıb. Sunak bəyan edib ki, Britaniya artıq Ukraynaya hərbi dəstəyin əsas aktoru ola bilməz və "Vaşinqton razılaşmalarını" yerinə yetirmək lazımdır”.

Qeyd edilir ki, Sunak Ukraynanı  120 ədəd zenit artilleriya  qurğusu və pilotsuz uçan təyyarələrlə  mübarizə üçün silahlarla təmin edəcəklərinə söz verib.

Britaniyanın yeni baş naziri maraqlı və zidiyyətli mövqe ortaya qoyur. Bir tərəfdən deyir ki, sülh lazımdır, digər tərəfdən Ukraynaya silah verir. Bu təzadı nə ilə izah edək?

Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, əslinə qalsa, Böyük Britaniyanın baş nazirinin davranışında təzad yoxdur: “Sülhə gedən yol böyük qələbədən keçir. Bu qələbəni də ya Ukrayna, ya da Rusiya qazanmalıdır. Hələlik Rusiya müəyyən əraziləri işğal edib, ancaq saxlamaqda çətinlik çəkir. Həmin ərazilərin işğalı hələ ki, Ukraynanı sülhə məcbur etmək üçün kifayət deyil.  Buna görədir ki, Donetsk istiqamətində  ağır döyüşlər gedir. Addım-addım olsa da, ruslar irəliləməyə çalışır. Ukrayna da anlayır ki, sülhə gedən yol ciddi qələbədən keçir. Ortada isə bu qələbə yoxdur. Ona görə də,  Ukrayna silahlanmalıdır. Qərb də Ukraynanı silahlandırmalıdır ki, cəbhədə ciddi uğur olsun. Yalnız belə olacağı  təqdirdə ruslar sülhə getməyə məcbur olacaq. Tərəflərin şərtləri kifayət qədər ağırdır. Onların  bu şərtlərlə sülhə gedə bilməsi qeyri-mümkündür. Nə Ukrayna Rusiyanın işğal etdiyi əraziləri güzəştə gedə bilər, nə də Moskva 1991-ci ildəki sərhədlərə çəkilmək barədə düşünür. Qərbdə bütün bunları yaxşı anlayırlar. Qərbdə həm də dərk edirlər ki, Ukraynanın qalibiyyəti çox çətindir, hətta bəzilərinə  qeyri-mümkün görünür. Artıq Ukraynanı güzəştə getməyə çağıranların da sayı artır. Gözləyək görək nəticə nə olur. İstənilən halda, Ukrayna ciddi şəkildə silahlanmalıdır. Buna şübhə ola bilməz. Belə olan təqdirdə Rusiya Kiyevi qane edən  şərtlərlə  razı ola bilər”.

Məhəmmədəli QƏRİBLİ

Peşə etikası

Son xəbərlər