Türkiyənin daxili işlər naziri Süleyman Soylu jurnalistlərə açıqlamasında deyib ki, İstanbulun İstiqlal küçəsində partlayışı törədən terrorçular saxlanılmasaydı, dərhal Yunanıstana qaçacaqdılar:
"ABŞ-nin bu gün verdiyi başsağlığı mesajını sanki qatilin hadisə yerinə ilk çatanlardan biri olduğu kimi dəyərləndirmək vacibdir"
O qeyd edib ki, terror aktının sifarişçiləri partlayışı törədən şəxsin öldürülməsi ilə bağlı əmr verərək sübutları aradan qaldırmağa çalışıb. Soylu əlavə edib ki, Türkiyə terror aktı ilə ona mesaj göndərənlərin cavabını verəcək, antiterror əməliyyatını davam etdirəcək.
“ABŞ-ın başsağlığını qəbul etmirik”, - nazir vurğulayıb.
Soylunun ABŞ-la bağlı səsləndirdiyi bu sərt ifadələrdən hansı nəticəni çıxara bilərik?
Milli Dirçəliş Hərəkatı Partiyasının sədri Fərəc Quliyev “Bakı-Xəbər”ə bildirdi ki, bu mövzuda əvvəldən ümumi narahatlıq var idi: “Bu, dolayısı ilə Amerikanın terrorçulara dəstək verməsini qınamaqdır. Çünki həm Suriya, həm də Türkiyə ərazisində PKK-ya, PYD-yə dəstək veriblər, xeyli silah-sürsat yardımı göstəriblər. Hətta onların kürd muxtariyyəti qurmaqlarına belə dəstək veriblər. Deyirlər ki, bu təşkilatlar burada bir qurum yaratmalıdır. Soylu işarə etmək istəyir ki, sizin verdiyiniz bu dəstəyin nəticəsi olaraq, PKK bu gün gəlib İstanbulda partlayış edir. Ona sahib çıxmaq lazım deyildi. Əksinə, onları qınamaq lazım idi. Soylunun verdiyi açıqlamanın kökündə bu dayanır ki, sən birbaşa özün etməsən də, sənin dəstək və silah verdiyin qrupun üzvü bunu edib. Məncə, çox normal bir yanaşmadır. Çünki tək icraçı yox, kömək edənlər də günahkardır. Necə olur ki, İŞİD-i, “Əl-Qaidə”ni terrorçu adlandırırsan, təqib edirsən, liderlərini öldürürsən, amma Suriyadakı terrorçu liderlərlə görüşlər keçirir, onları silah-sürsatla təmin edirsən? Bu nə dərəcədə doğrudur? Ona görə də, mən Soylunun verdiyi açıqlamanı tamamilə normal hesab edirəm. İstər ABŞ olsun, istərsə də PKK-ya başqa yerlərdə - Belçikada, Rusiyada dəstək verənlərin hamısı günahkardır. Baş verən hadisə onların qidalandırdığı terror təşkilatı tərəfindən törədilib. Burada qəribə bir şey yoxdur. Türkiyənin bununla bağlı atacağı addımlara gəldikdə isə, tək Türkiyə yox, ümumiyyətlə Türk Dövlətlər Təşkilatı hamısı bir yerdə PKK-ya bağlı olan qurumlarla, dövlətlərlə münasibətlərinə yenidən baxmalıdır. Ortaq düşmənlərimizi ümumiləşdirməliyik və ortaq da aradan qaldırmalıyıq. Əgər bir dövlət PKK, onun üzvlərinə dəstək verirsə, kömək edirsə, münasibət saxlayırsa, onlara qarşı da münasibətləri yeniləmək lazımdır. PKK-nın özünün isə, harda olursa olsun, ən sərt tədbirlərlə bütün ocaqlarını söndürmək lazımdır. Türkiyədə PKK-ya dəstək verən HDP adlı partiya var. Onun bağlanması vacib məsələlərdən biridir. Əgər Amerika gəlib Əfqanıstanda talibançı axtarıb tapıb öldürə bilirsə, Türkiyə belə addımlar niyə atmasın? Bundan sonrakı münasibətlərə də bu yanaşma ilə baxacaq Türkiyə. Bölgədə Türkiyənin güclənməsi çoxunu narahat edir. Qarşıdan seçkilər gəlir. Hücum diplomatiyası ilə, hücum xarakterli davranışlarla ortaya çıxmasa, Türkiyəyə qarşı hücumlar daha da artacaq. Profilaktik tədbir kimi də sərt tədbirlərin görülməsi çox vacibdir”.
Məhəmmədəli QƏRİBLİ
