Rusiya İrandan aldığı pilotsuz təyyarələr müqabilində Ukraynada ələ keçirdiyi Qərb hərbi sistemlərini və 140 milyon avro nağd pulu təyyarələrlə gizli şəkildə İrana göndərib.
“Sky News” məxfi mənbələrə istinadən bildirir ki, ABŞ və Böyük Britaniya tərəfindən Ukraynaya göndərilən NLAW, Javelin tank əleyhinə raketlər və Stinger zenit raketləri Rusiya tərəfindən ələ keçirilərək 140 milyon avro nağd pulla birgə İrana göndərilib.
Rusiya bu “kömək” müqabilində İrandan Ukrayna infrastrukturlarını sıradan çıxarmaq üçün istifadə etdiyi kamikadze dronları alır. İran isə başqa ölkələrin gizli texnologiyasını ələ keçirir.
Anonimlik şərti ilə “Sky News”a danışan mənbə Ukraynaya göndərilən sursatların rusların əlinə keçdiyini açıqlayıb.
“Sky News”a görə, 140 milyon avro nağd pul və Britaniyanın NLAW tank əleyhinə raketi, ABŞ-ın Javelin tank əleyhinə raketi və Stinger zenit raketindən ibarət 3 hərbi sistem avqustun 20-də səhər saatlarında gizli şəkildə rus təyyarələri ilə Tehrana çatdırılıb.
Mənbə bununla bağlı görüntülər də paylaşıb. Yayımlanan fotolardan görünür ki, təyyarələr ilk dəfə avqustun 20-də səhər saat 01:17-də Tehrana enib. Tehranda təxminən 3 saat yarım qalan təyyarələrin addım-addım necə hərəkət etdiyi müşahidə edilir. Xəbərdə diqqət çəkən başqa bir detal isə pul və sursat daşıyan təyyarələrin daha sonra İran pilotsuz təyyarələrini götürərək geri qayıtmasıdır.
Üstəlik, iddialar bununla məhdudlaşmır. Mənbə bildirib ki, yük daşınması ilk dəfə deyil reallaşır, avqustun 20-dən bəri İrandan ən azı beş Rusiya təyyarəsinin PUA daşıdığı barədə məlumatlar var.
Gizli sövdələşmənin əsas məqsədinə gəlincə, mənbə xəbərdarlıq edib ki, bu silahlar İran İslam İnqilabı Keşikçiləri Korpusu (SEPAH) tərəfindən Qərbin hərbi texnologiyalarını kopyalamaq üçün istifadə oluna bilər.
Üstəlik, bu, İrandan gözlənilməz bir addım deyil. Mənbənin bildirdiyinə görə, 2011-ci ildə istehsal olunan “Shahed Kamikaze” dronlarının (kamikadze təyyarələri) ABŞ kəşfiyyat təyyarəsinin texnologiyası barədə əldə edilən məlumatlar əsasında istehsal edildiyi bildirilir.
Mənbə bildirib ki, tərəflər arasında Rusiyaya dəyəri 200 milyon dollardan çox kamikadze pilotsuz uçan aparatların tədarükü üçün daha bir sövdələşmə üzərində iş gedir.
Həm Moskva, həm də Tehran aylardır Ukrayna müharibəsində İran istehsalı olan dronların istifadə edilməsi ilə bağlı çoxsaylı xəbərləri təkzib edir. Lakin bir neçə gün əvvəl İranın xarici işlər naziri Hüseyn Əmir-Abdollahian İranın dronları Rusiyaya təhvil verdiyini etiraf edib, lakin bunun Ukrayna müharibəsindən aylar əvvəl və məhdud sayda olduğunu iddia edib. Ancaq Ukrayna Tehranın açıqlamalarının tam əksini sübut edən faktlar ortaya qoyur və bildirir ki, Rusiyanın əlində kifayət qədər İran istehsalı dronlar var. Üstəlik Kiyev döyüşlərdə gündə azı onlarla İran istehsalı olan dronlar vurduqlarını bildirirlər.
Londonda yerləşən analitik mərkəzi olan Kral Birləşmiş Xidmətlər İnstitutunun baş elmi işçisi Castin Bronk da deyir ki, İran pilotsuz təyyarələri Rusiyanın müharibədə istifadə etdiyi silahların mühüm hissəsini təşkil edir.
Tahir TAĞIYEV
