Fevralın 24-də başlayan əməliyyatlarla uğur qazana bilməyən Rusiya ilhaq üsulu ilə Ukraynanın 15 faizini ələ keçirdi və Donbasda Luqansk, Donetski, Zaporojya və Xerson vilayətlərinin ilhaqını elan etdi. Amma Ukrayna ordusu ilhaq edilmiş ərazilərdə irəliləməyə başlayanda Rusiya ordusu bu dəfə Ukraynanın enerji infrastrukturunu hədəfə aldı və Kiyev yenidən bombalandı.
Nəhayət, indi isə Rusiyanın Xersonda böyük fəlakətə səbəb olacağı iddia edilir. İddia olunur ki, Rusiya Xerson yaxınlığındakı böyük su anbarını partladacaq və şəhəri su basacaq. Belə bir hücum olacağı təqdirdə bölgədə aylarla davam edəcək su probleminin yaşanacağı bildirilir.
Digər tərəfdən əgər bənd partladıqdan sonra AES-dəki su qurtararsa, nüvə sızması baş verə bilər. Bu vəziyyət həm də yeni köç dalğasını ortaya qoyur. Su basmış və nüvə sızıntısı olan şəhərdən qaçanlar isə təbi ki, Avropaya üz tutacaqlar.
Digər iddia isə Rusiya lideri Putinin ordusunu Xersondan çıxarmaq istəməsidir. İddia olunur ki, rus qoşunlarının təchizatının çətinliyi əsgərlərin bölgədən geri çəkilməsinə səbəb olub. Lakin Rusiya ordusu bölgədən çəkiləcəyi təqdirdə bütün su anbarları və obyektləri məhv edə bilər.
Ukrayna prezidenti Vladimir Zelenski Qərbi Putini bu planı həyata keçirməkdən çəkindirməyə çağırıb. O, belə bir hücumun Ukraynanın cənubunun böyük hissəsinin su altında qalacağına səbəb olacağını bildirib.
Zelenski televiziya ilə verdiyi açıqlamada Rusiya qüvvələrinin Nova Kaxovka su anbarının içərisinə partlayıcı yerləşdirdiyini və onu partlatmağı planlaşdırdığını bildirib.
Xersonda Rusiya tərəfindən təyin edilmiş bir məmur isə Kiyevin rus əsgərlərinin bəndə mina qoyması ilə bağlı iddialarını rədd edib.
Tahir TAĞIYEV
