ABŞ tərəfindən neftin azaldılması ilə bağlı OPEC+ qrupunun qərarına qarşı Səudiyyə Ərəbistanına edilən xəbərdarlıq və ittihamlara qarşı ərəb ölkələri Ər-Riyadı dəstəklərini bəyan ediblər.
Xatırladaq ki, OPEC+ qrupunun enerji və neft nazirləri oktyabrın 5-də Avstriyanın paytaxtı Vyanada keçirilən toplantıda gündəlik neft hasilatının noyabr ayından etibarən 2 milyon barel azaldılması qərarı Səudiyyə Ərəbistanı ilə ABŞ arasında gərginliyi artırıb. Buna görə, ən çox tənqidlə təşkilatın ən böyük tərəfdaşı olan Səudiyyə Ərəbistan üzləşib. ABŞ qərarın siyasi xarakter daşıması və Rusiyaya dəstək mənasına gəldiyini iddia edir.
Ağ Ev rəsmisi Con Kirbi oktyabrın 11-də ABŞ prezidenti Baydenin Səudiyyə Ərəbistanı ilə münasibətləri yenidən nəzərdən keçirdiyinə dair açıqlamalar verib. Səudiyyə Ərəbistanının xarici işlər naziri Feysəl bin Farhan isə “Əl Ərəbiyyə” televiziyasına açıqlamasında ölkəsinin ABŞ ilə strateji əlaqələri olduğunu və OPEC+ ölkələrinin xam neft hasilatını azaltma qərarlarının iqtisadi səbəblərlə bağlı olduğunu bildirib.
Ər-Riyad rəsmiləri OPEC+ qərarının üzv dövlətlər tərəfindən birgə qəbul edildiyi və bunun arxasında heç bir siyasi məna olmadığı vurğulanaraq, ABŞ-ın mövqeyini yumşaltmağa yönəlmiş bəyanatlar səsləndirilir.
Bunun ardınca Mərakeş, Misir, Bəhreyn, Fələstin, Yəmən, Oman, Əlcəzair, Birləşmiş Ərəb Əmirlikləri, İraq və Küveytdən müxtəlif səviyyələrdə verilən açıqlamalarda OPEC+ qərarları ilə bağlı ABŞ-Səudiyyə Ərəbistanı gərginliyində Ər-Riyadın tərəfində olduqlarını açıqlayıblar.
Bir çox ərəb ölkəsindən Səudiyyə Ərəbistanına dəstək və həmrəylik mesajlarında OPEC+ qərarının ilk növbədə iqtisadi səbəblərdən doğduğu və siyasi məqsədlərdən uzaq olduğu vurğulanıb.
İslam Əməkdaşlıq və Körfəz Əməkdaşlıq təşkilatları, Ərəb Liqası və Ərəb Parlamenti də Səudiyyə Ərəbistanı ilə həmrəy olduqlarını və onu sarsıtmağa çalışan hər hansı bəyanatı rədd etdiklərini bəyan ediblər.
Tahir TAĞIYEV
