Ukraynaya hücumlarını davam etdirən Rusiyanın nüvə təhdidləri Qərbi təşvişə salıb. Putinin “hər cür silahdan istifadə edəcəyik” təhdidindən sonra elan etdiyi qismən hərbi səfərbərlikdən sonra gərginlik artıb.
NATO ard-arda bəyanatlar verib və Vladimir Putinin nüvə addımlarının izləndiyini və istifadə ediləcəyi təqdirdə ciddi nəticələrin olacağını açıqlayıb. Rusiya isə bütün dünyaya çağırış edərək, Ukraynanın NATO-ya daxil olmasının 3-cü Dünya Müharibəsinin başlamasına səbəb olacağını bəyan etdi.
Qarşılıqlı dialoqlar, atışmalar davam edərkən Qərbi ayağa qaldıracaq görüntülər yayılıb. Ukraynanın itirilmiş torpaqları geri almaq üçün başlatdığı hücum, Krım körpüsünə hücum və dərhal sonra Kiyevə atılan raketlər və qarşılıqlı çəkişmələrdən sonra yayılan peyk görüntüləri ciddi narahatlığa yol açıb.
Finlandiya və Norveç sərhədləri yaxınlığında yerləşən Rusiyanın Olenya aviabazasından çəkilən peyk görüntüləri Tu-160 nüvə bombardmançılarının sayının artdığını göstərir. Kritik hava bazasında avqustun 12-də heç bir bombardmançı görünməyib, avqustun 21-də bu rəqəm 4-ə, indi isə 11-ə yüksəlib.
İsrailin “ImageSat Intl” kəşfiyyat firmasının əldə etdiyi görüntülərdə Rusiyanın Kola yarımadasındakı hərbi bazasında bombardmançılar aydın görünür. Son peyk görüntüləri isə təyyarələrin sayının artdığını göstərir.
İki həftə əvvəl “Jerusalem Post” hava bazasında 7 nüvə bombardmançısının yerləşdirildiyini iddia etmişdi. Peykdən çəkilən son görüntülər, Rusiyanın NATO sərhədində hərəkətliliyi Qərbdə narahatlıq yaradıb.
“Armageddon” və ya “qiyamət təyyarələri” kimi tanınan TU-160 və TU-95-lər adətən Moskvadan 450 mil cənub-şərqdə yerləşən Engels aviabazasında yerləşdirilir. Lakin yeni görüntülər bombardmançıların NATO üzvü Norveçin və tezliklə alyans üzvü olacaq Finlandiyanın burnunun dibində olduğunu göstərir.
Adi silahlarla da təchiz edilə bilən TU-160-lar davamlı yanacaq doldurmadan 7500 mil uça və 12-yə qədər qısa mənzilli nüvə raketi daşıya bilir. Tu-95 strateji bombardmançı təyyarələri isə Putinin hava qüvvələrinin ən böyük təyyarələrindən biri kimi tanınır. Təyyarələr qanadlı raketlər və iri nüvə bombaları daşımağa qadirdir.
Rusiyanın Ukraynanın paytaxtı Kiyevə edilən hücumlarda KH-101 qanadlı raketindən istifadə etdiyi iddia edilib. Qərb mediası Olanyada yerləşdirmənin iddianı da təsdiqlədiyini iddia edir.
Kh/101-lər KH-102-lər kimi havadan-yerə hədəflərə atılan raketlərdən biridir. Raket buraxıldıqdan sonra 30-60 metr hündürlükdən aşağı enərək, yəni az qala ağacların üstündən uçaraq hava hücumundan müdafiə sistemlərindən qaça bilər.
Tahir TAĞIYEV
