Rusiyanın Kiyev və Ukraynanın digər şəhərlərinə zərbələri bizim Ukrayna xalqını nə qədər lazımdırsa, o qədər də dəstəkləmək öhdəliyimizi gücləndirir. Bu sözləri ABŞ prezidenti Co Bayden Rusiyanın bu gün Ukrayna şəhərlərinə kütləvi raket hücumu haqda danışarkən deyib. Sitat:
“Biz müttəfiqlərimiz və tərəfdaşlarımızla birlikdə təcavüzünə görə Rusiyanı əvəz ödəməyə, Putin və Rusiyanı vəhşiliklərinə və müharibə cinayətlərinə görə məsuliyyətə cəlb etməyə və Ukrayna qüvvələrinə öz ölkələrini və azadlıqlarını müdafiə etmək üçün lazım olan dəstəyi verməyə davam edəcəyik”.
Bayden bir daha Rusiyanı bu səbəbsiz aqressiyanı dayandırmağa və ordusunu Ukraynadan çıxarmağa çağırıb.
Qeyd edək ki, bir sıra Qərb ölkələri də Rusiyanın bu addımını kəskin tənqid edib və Ukraynaya hərbi dəstəklərini artıracaqlarını deyiblər. Rusiyanın Ukraynanın böyük şəhərlərinə endirdiyi raket zərbələrindən sonra yaranmış vəziyyət müharibənin perspektivi üçün nə vəd edir?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, ABŞ və Qərbin bu ritorikası müharibənin ömrünün uzanmasına xidmət edir:
“Ümumiyyətlə, Ukraynada müharibə başlayan ilk gündən Amerika birləşmiş ştatları və Qərb ölkələri müharibənin dayandırılması üçün vasitəçilik missiyasını icra etmək əvəzinə, müharibəni alovlandırmaq və Rusiyanı daha da qəzəbləndirərək müharibənin miqyasını genişləndirməyə təkan verən addımlar atmağa başladılar. Yəni bu gün Rusiyaya hədə-qorxu gələn Co Bayden Rusiya rəhbərliyi ilə hər hansı danışıqlar aparmaq niyyətində olmadığını bildirdi. Mövcud vəziyyətdə Ukraynanı müharibənin dərinliyinə aparıb çıxartdı. Belə deyək, müharibənin ölkənin bütün ətrafına yayılmasına təkan verdi. Türkiyənin bu istiqamətdə vasitəçilik missiyasına isə Amerika, Qərb imkan vermədi. Əvəzində elə bir vəziyyət yaratdı ki, Ukrayna bundan imtina etdi. Bu gün artıq proses bir az da dərinləşib, vəziyyət bir az da dəyişib. ABŞ müharibənin dayandırılması üçün heç bir addım atmır. Ukraynada vəziyyətin gərgin olmasına baxmayaraq, Rusiya dayanmadan hərəkətə keçir. Buna baxmayaraq, Amerika bunun qarşısını almağa cəhd etmir. Əksinə, müharibəni alovlandırmaqla Ukraynada hökümətin fərdi olaraq qərar verməsinə mane olur. Belə çıxır ki, Amerika Ukraynada müharibənin uzun müddət davam etməsində maraqlıdır. Öz məqsədləri üçün Ukraynanı və onun xalqını hədəfə çevirməklə məşguldur. Bu cür qərarlar vəziyyəti daha da dərinləşdirəcək. Məsələnin digər tərəfi isə, texniki dəstəklə bağlıdır. Bu texniki dəstək Rusiyanı dayandırmaq, məğlub etmək niyyəti daşıyır. Vaziyyətin belə gərginləşdirilməsi Rusiyanı Ukrayna ərazisində daha güclü silahlardan istifadə etməyə məcbur edəcək. Ötən gün raket zərbələri də artıq bunu deməyə əsas verir. Hesab edirəm ki, Ukrayna rəhbərliyi özündə siyasi iradə tapmalı və Rusiya ilə birbaşa danışıqlara gedib, müharibənin qarşısını almalıdır. Ən azı, bir müddət atəşkəs imzalamağa nail olmalıdır”.
Məhəmmədəli QƏRİBLİ
