Iki gün əvvəl səhər saatlarında Krım yarımadası ilə Rusiyanı birləşdirən Krım körpüsündə böyük partlayış olub və körpünün dəmir yolu xəttinin yanındakı avtomobil yolunda çökmə baş verib. Rusiya prezidenti Vladimir Putinin 2018-ci ildə açdığı və strateji əhəmiyyət kəsb edən 19 kilometrlik körpüyə hücumdan sonra aparılan istintaqla bağlı Rusiya cəbhəsindən yeni açıqlamalar gəlib.
Rusiya prezidenti Putin hücumun ölkədəki mülki infrastrukturu məhv etmək məqsədi daşıyan terror hücumu olduğunu, Rusiya İstintaq Komitəsinin sədri Aleksandr Bastırkin isə bombalı hücumun səbəbkarlarının müəyyən edildiyini açıqlayıb.
Vladimir Putin Kreml sarayında Aleksandr Bastıkinlə görüşüb. Partlayışın təfərrüatları ilə bağlı Putinə məlumat verən Bastırkin hadisəni törədənləri müəyyənləşdirdiklərini deyib:
"Bizim əməliyyat-istintaq qrupumuz, ekspertlər, Baş İstintaq İdarəsinin kriminal ekspertləri hadisə yerinə çox tez gəliblər. Partladılan yük maşınının Bolqarıstan, Gürcüstan, Ermənistan, Şimali Osetiya və Krasnodar diyarı marşrutu ilə hərəkət etdiyini müəyyən etdik. FTX əməkdaşlarının dəstəyi ilə terror aktını hazırlayan və Rusiya Federasiyası ərazisindən bu hücuma dəstək verən şəxslər müəyyən edilib”.
Putin isə hücumun terror hücumu olduğunu deyib: “Şübhə yoxdur ki, bu, Rusiya Federasiyasının mülki infrastrukturunun kritik əhəmiyyətli hissəsini məhv etməyə yönəlmiş terror aktıdır. Bu hücumu planlaşdıran, həyata keçirən və əmrini verən Ukraynanın məxfi xidmətləridir”.
Sözügedən hücumda yük maşınının partlaması nəticəsində yanacaq daşıyan qatarın vaqonlarında yanğın baş verib, nəticədə 3 nəfər ölüb. Hücumdan sonra Kerç boğazında təhlükəsizlik tədbirləri gücləndirilib.
Tahir TAĞIYEV
