Fransada enerji qənaətinə nümunə göstərmək üçün kabinetin başlatdığı “qalın geyinmə” trendinə prezident Emmanuel Makron da qoşulub.
Ölkədəki qış soyuqları qarşısında temperaturu artırmaq əvəzinə qalın paltar geyinmək kimi enerji qənaəti təklifləri müzakirə edilir. Baş nazir Elisabet Borne palto, İqtisadiyyat naziri Bruno Le Maire isə boğazlı sviter geyərək "qış paltarı geyinmək" kampaniyasını başladıb.
Bu dəfə də Makron kamera qarşısına keçərək pencəyinin altından qalstuk, köynək yerinə boğazlı sviter geyinərək özünü gülünc vəziyyətdə qoyub.
Müxalifət isə hökuməti tənqid edərək qənaətə çağırmaq əvəzinə enerji böhranını həll etməyə çağırıb. Bəzi müxalifət nümayəndələri isə yay mövsümündə bir görüşdə nazirlərin xidməti avtomobillərinin Yelisey sarayının qarşısında motorlarının işlək halda olduğunu göstərən görüntülər paylaşaraq hökumətə sərt reaksiya veriblər.
Digər tərəfdən, bəzi iqtidar deputatlarının Rusiya qazının kəsilməsindən sonra böhrana çevrilən enerji qıtlığı ilə bağlı “quruducu əvəzinə paltar asılağı, yorğanla parlamentə gəlmək kimi qənaət təklifləri” ölkə siyasətçiləri arasında gülüş obyektinə çevrilib.
Fransızlar sosial şəbəkələrdə hökumətin enerji qıtlığını həll etmək əvəzinə enerjiyə qənaət etmək tövsiyəsi ilə gülünc duruma düşdüyünü yazıb.
Digər tərəfdən, enerji qıtlığının yaşandığı ölkədə məişət temperaturunun maksimum 19 dərəcədə saxlanması və buna əməl etməyənlərə qarşı sanksiyaların tətbiqi müzakirə edilir.
Rusiya-Ukrayna müharibəsi ilə əlaqədar Moskvadan enerji təchizatının kəsilməsi və enerji qiymətlərinin kəskin artması, həmçinin 30-dan çox nüvə reaktorunun təmiri Fransada ciddi enerji böhranına səbəb olub.
Qeyd edək ki, fevralın 24-də Rusiya ilə Ukrayna arasında başlayan müharibə dünyada enerji böhranına səbəb olub. Qərb ölkələrinin Rusiyaya qarşı sanksiyalarından sonra ruslar da qaz nəqlini dayandırıb. Belə olan halda Avropada qış aylarının necə keçəcəyi ilə bağlı təlaş başlayıb.
Tahir TAĞIYEV
