Rusiya Ukraynanın şərqindəki Xerson, Zaporojye, Donetsk və Luqansk vilayətlərini ilhaq etdiyini elan edəndən bir gün sonra Ukrayna qüvvələri Kremli Donetskdəki strateji əhəmiyyətli Liman şəhərini mühasirəyə alıb. Mühasirə xəbərindən bir neçə saat sonra dalana dirənmiş rus ordusu əsgərlərinin şəhərdən geri çəkildiyini bildirdi.
Bir-birinin ardınca ağır itkilər verən Rusiya, Sovet İttifaqı dövründə şəhərin adı olan Krasnıy Liman adından istifadə edərək “Mühasirə təhlükəsi ilə əlaqədar qüvvələrimiz Krasnı Limandan daha əlverişli nöqtələrə çəkilib” deyə bildirib.
Limandan geri çəkilmə Putinin Ukraynadakı qüvvələrini gücləndirmək üçün ehtiyatların qismən səfərbər edilməsi əmrindən təxminən iki həftə sonra baş verib.
Lymanı itirmək ruslar üçün ciddi uğursuzluqdur. Rusiya ordusu mayın sonlarında Limanı ələ keçirmiş və ondan Donetsk bölgəsi üçün əsas logistika mərkəzi kimi istifadə etməyə başlamışdı. Buradan bölgəyə canlı qüvvə və texnika daşınırdı.
Liman həmçinin Donetsk, Luqansk və Xarkov vilayətlərini birləşdirən dəmir yolu xəttinin üzərindədir. Ukrayna ordusu şəhəri rus qoşunlarından geri ala bilsə, Donetsk vilayətinin şimalına tam nəzarəti ələ keçirə biləcək.
Çeçen lider Ramzan Kadırov isə Rusiyanın kritik Ukrayna şəhərindən qoşunlarını çıxarmaq məcburiyyətində qalmasından sonra dünyanı şoka salan açıqlama verib. Kadırov deyib ki, Vladimir Putin nüvə silahından istifadə etmək barədə düşünməlidir.
Qeyd edək ki, keçmiş prezident Dmitri Medvedev də daxil olmaqla, Putinin digər yüksək rütbəli məmurları Rusiyanın nüvə silahına əl atmalı ola biləcəyini deyiblər, lakin Kadırovun çağırışı bu günə qədər ən açıq çağırış olub.
Putin keçən həftə Rusiyanın bütün mümkün vasitələrlə "ərazi bütövlüyünü" müdafiə etməyə hazır olduğunu deyərkən blef etmədiyini söyləmişdi. Vaşinqton isə nüvə silahından istənilən istifadəyə və Moskvanın üzləşəcəyi “fəlakətli nəticələrə” qəti şəkildə cavab verəcəyini bildirib.
Kadırov bölgədə döyüşən Rusiya qüvvələrinə rəhbərlik edən general-polkovnik Aleksandr Lapini də sərt tənqid edib və Lapinin Moskvanın bir gün əvvəl ilhaq etdiyi Şərqi Donetsk bölgəsindəki Lyman qəsəbəsindəki rus qoşunlarını lazımi rabitə, qarşılıqlı əlaqə və sursatla təmin etmədiyini iddia edib. "Mən Lapini sıravi rütbəsinə endirər, mükafatlarından məhrum edərdim və əlində pulemyotla cəbhəyə göndərərdim" - Kadırov Telegram-da yazıb.
Tahir TAĞIYEV
