Rusiya prezidentinin mətbuat katibi Dmitri Peskov deyib ki, Türkiyə bankları ABŞ-ın güclü təzyiqi altındadır, ikinci dərəcəli sanksiyalarla hədələnir, vəziyyət ağırdır:
“Aydındır ki, banklar və təsərrüfat subyektləri ABŞ-ın güclü təzyiqi altındadır, Türkiyə bank sistemi ikinci dərəcəli sanksiyalarla hədələnir. Türk banklarının “Mir” kartlarına xidmət göstərməyi dayandırması qərarı, təbii ki, təzyiq altında qəbul edilib”. O bildirib ki, bu təzyiqə qarşı birgə mübarizə yollarını axtarmaq lazımdır:
“Ən azı, ikitərəfli ticarət-iqtisadi əməkdaşlığa xələl gəlməsin və hər il Türkiyəyə gələn milyonlarla rusiyalı turist bundan məhrum olmasın”.
Qeyd edək ki, Türkiyənin bir neçə bankı Rusiyanın “Mir” kartlarına xidmət göstərməyi dayandırdıqlarını açıqlayıb. Bu qərar ABŞ və Böyük Britaniyanın Rusiyaya qarşı sanksiyaları ilə əlaqədar verilib. Bir müddət əvvəl Türkiyənin “İşbank”ı və “Dənizbank” Rusiyanın “Mir” kartlarına xidmət göstərməyi dayandırdıqlarını açıqlayıb.
Belə təzyiqlə ABŞ Türkiyəni Rusiyadan aralaya biləcəkmi? Türkiyənin müqavimətə potensialı varmı?
Politoloq Qabil Hüseynli “Bakı-Xəbər”ə açıqlamasında bildirdi ki, belə bir fikrə düşmək və onu populyarlaşdırmaq çox yanlışdır: “Bütün dünya Rusiyaya qarşı birləşib, ona qarşı böyük sanksiyalar tətbiq edilib. Rusiya bunlardan yayınmaq üçün müxtəlif gedişli siyasətə əl atır. Türkiyə bu oyunlardan kənar durmalıdır. “Mir” kartlarından imtina düz qərardı. Onsuz da Türkiyənin dövlət deyil, yalnız özəl bankları həmin kartlardan istifadə edirdi. Türkiyənin belə məsələdə dirəniş göstərməsi çox ağır nəticələrə səbəb ola bilər. Hər bir dövlət özünün strateji maraqları uğrunda vuruşur. Türkiyə bunu nəzərə alıb, Rusiyaya görə Qərb və ABŞ-la konfrontasiyaya getməməlidir. Rusiyanın hesablanmamış və hazırda acı nəticələr verən siyasətinin qurbanı olmağa dəyməz. Dünyanı özləri qarışdırıblar, özləri də cavabını versinlər. Müharibəni dayandırmağa nə mane olur? Niyə bu oyunlara son demirlər?
Rusiya rəsmisi Türkiyəni dolayı yolla turist amili ilə hədələyir. Bu da absurddu. Ruslar hazırda ölkədən qaçır. Heç Türkiyənin onları qəbul etməyə imkanları da çatmayacaq. Türkiyənin turizm potensialı çox cəlbedicidi. Bütün dünya ölkələri istirahət üçün ora üz tutur. Xidmət, otel qiymətləri o dərəcədə əlverişlidir ki, Türkiyə turistsiz qalmayacaq. Turizmlə bağlı amili siyasiləşdirib, ondan arqument kimi istifadə etməyin heç bir xeyri yoxdur. Hazırda turist kimi deyil, qaçqın olaraq Türkiyədə 85 min rus var, hələ ardı da gəlir”.
Politoloq hesab edir ki, Türkiyə öz balanslı siyasətini davam etdirməlidir: “Hazırda bütün dünya gərginlik içərisindədir. Qardaş ölkə bu dönəmi uğurla keçməlidir. Türkiyə sanksiyalardan yan keçməyi bacarmalıdır. Əks təqdirdə Türkiyənin iqtisadiyyatına ciddi zərbə vurula bilər. Çünki Rusiya ilə bir ölkə deyil, bütün dünya mübarizə aparır”.
Məhəmmədəli QƏRİBLİ
