Rusiya qazını daşıyan “Şimal axını-1” və “Şimal axını-2” qaz kəmərlərində baş verən partlayışlar Avropada yeni böhrana səbəb ola bilər. “Qazprom” bütün qaz axınını kəssə də, hər iki kəmər qazla doludur və indiyədək xəttə olan 2 milyard avroluq qaz buxarlanıb.
Danimarkanın energetika naziri Dan Jorgensen bildirib ki, sızıntılar xəttdəki qaz tükənənə qədər, yəni bir həftəyə qədər davam edəcək.
Bu arada, İsveçin “Svenska Dagbladet” qəzeti yazıb ki, Rusiyadan Almaniyaya gedən iki boru kəmərinin ümumilikdə üç yerdə zədələnməsindən sonra Sahil Mühafizəsi dördüncü sızıntını da aşkar edib.
Qeyd edək ki, Ukrayna ilə Rusiya arasındakı müharibədə Avropanın Moskva administrasiyasına tətbiq etdiyi embarqolardan sonra böyük enerji böhranı yaranıb. Ekspertlər hesab edir ki, Rusiya qazını daşıyan “Şimal axını 1” və “Şimal axını 2” kəmərlərində baş verən partlayışlar Qərb ölkələrinin çox çətin qış keçirəcəyi bu dövrdə yeni böhranın başlanğıcı ola bilər. Sankt-Peterburqdan Baltik dənizi vasitəsilə Almaniyaya uzanan qaz xəttində baş verən partlayışlar 20 milyard dollarlıq dəhlizi faktiki olaraq tamamilə sıradan çıxıb.
Baltik dənizdə yaşanan hadisədən sonra Norveç qaz kəmərlərini təxribatdan qorumaq qərarına gəlib. Lakin belə uzun və mürəkkəb şəbəkənin saxlanmasının həm çox çətin olduğu, həm də xərclərinə görə qazın qiymətinə təsir edəcəyi təxmin edilir.
Bu arada, Avropa “Şimal axını 1” və “Şimal axını 2” qaz boru kəmərlərinə edilən hücumlarda dolayısı ilə Rusiyanı günahlandırsa da, Kreml bu iddiaları rədd edib. Kremlin sözçüsü Dmitri Peskov Rusiyanın mümkün təxribatda əli olması ilə bağlı ittihamları “axmaqlıq” adlandırıb: “Biz tədarüklərini artıran Amerikanın mayeləşdirilmiş təbii qaz (LNG) şirkətlərinin böyük gəlirlər əldə etdiklərini görürük. Biz qaz tədarük marşrutlarımızı itirdik”.
Peskov boru kəmərlərinə hücuma görə dolayısı ilə ABŞ-ı günahlandırıb: “ABŞ prezidenti Co Bayden keçmişdə “Şimal axını-2”ni bitirəcəkləri barədə açıqlamalar vermişdi. O nə demək istəyirdi? Biz bilmirik. Dəlilik həddində olan polşalıların buna görə ABŞ-a təşəkkür edən isterik reaksiyasını görürük. Biz bunun nə demək olduğunu bilmirik".
Qeyd edək ki, Polşanın keçmiş xarici işlər və müdafiə naziri Radek Sikorski sosial media hesabında boru kəmərlərindəki partlayışın fotosunu paylaşaraq “Təşəkkürlər ABŞ” ifadəsini işlədib. Sikorski hazırda Avropa Parlamentinin (AP) üzvü və AP-nin ABŞ-la əlaqələr üzrə nümayəndə heyətinin rəhbəridir.
Tahir TAĞIYEV
